އުރީދޫން ފުރަތަމަ ހެލްތުކިޓް ހޯޑެއްދުއަށް ހަދިޔާކޮށްފި
ދުޅަހެޔޮ ދިރިއުޅުން ޕްރޮމޯޓު ކުރުމުގެ ގޮތުން އުރީދޫން ފުރަތަމަ ހެލްތު ކިޓް ގދ. ހޯޑެއްދޫ ސިއްހީ މަރުކަޒަށް މިއަދު ހަދިޔާ ކޮށްފިއެވެ.
ދުޅަހެޔޮ ސިއްހަތެއް ރާާއްޖޭގައި ދެމެހެއްޓުމަށް އުރީދޫ މޯލްޑިވްސްއިން ކުރަމުންދާ މަސައްކަތުގެ ދަށުން، ދިވެހިރާއްޖޭގެ ހުރިހާ ސިއްހީ މަރުކަޒުތަކަށް މުހިންމު ހެލްތު ކިޓްތަކެއް ހަދިޔާކުރުމަށް ނިންމައި އެކަން އިއުލާނުކޮށްފައި ވަނީ މިއަހަރުގެ ފެބްރުއަރީ މަހުގެ 28ވަނަ ދުވަހުގައެވެ.
ރާާއްޖޭގެ އެކި ހިސާބުތަކުގައިވާ 167 ހެލްތް ސެންޓަރު އަދި ހެލްތު ޕޯސްޓްތަކަށް މި ކިޓްތައް ހަދިޔާ ކުރާކަަަން ހާމަކޮށްފަައި ވަނީ ހެލްތު މިނިސްޓަރ އަހްމަދު ނަސީމާއި އުރީދޫ މޯލްޑިވްސްގެ މެނޭޖިންގ ޑިރެކްޓަރ އަދި ޗީފް އެގްޒެކަޓިވް އޮފިސަރ މިސްޓަރ ޚާލިދު އަލް-ހަމާދީއާއި ކުންފުނީގެ އިސް އޮފިޝަލުންނާ އެކު ބޭއްވުނު ހާއްސަަ ބަައްދަަލުވުމެއްގަަައެވެ.
މި ހަރަކާތުގެ ދަށުން އެންމެ ފުރަތަމަ ހެލްތު ކިޓު އުރީދޫގެ ފަރާތުން ހަދިޔާކޮށްފައި މިވަނީ ހޯޑެއްދޫ ސިއްހީ މަރުކަޒަށެވެ.
ދުޅަހެޔޮ ދިރިއުޅުން ޕްރޮމޯޓު ކުރުމުގެ ގޮތުން ހަދިޔާ ކުރާ ހެލްތު ކިޓުގައި ހިމެނެނީ ސްޓެތެސްކޯޕް، ޑިޖިޓަލް ސްފިގްމާނޯމީޓަރ، ޕަލްސް އޮކްސިމީޓަރ، އޮޓޮސްކޯޕް، ޑިޖިޓަލް ތާމޯމީޓަރ އަދި ނެބިއުލައިޒަރ މެޝިން ފަދަ ސިއްހީ ފަރުވާއަށް އާންމުކޮށް ބޭނުންކުރާ މުހިއްމު އާލާތްތަކެވެ. މި ކިޓްތައް މިއަހަރު ކުރީކޮޅުގައި ހެލްތު ސެންޓަަރުތަކަށް ފޯރުކޮށްދޭން ފަށާނެ ކަމަށް އެ ދުވަހު ވެސް އުރީދޫން ހާމަކޮށްފައިވެއެވެ.
އުރީދޫ މޯލްޑިވްސްއަކީ އދ.ގެ ދެމެހެއްޓެނިވި ތަރައްގީގެ 3 ވަނަ ލަނޑުދަނޑި ("ގްލޯބަލް ގޯލްސް")ކަމަށްވާ "ގުޑް ހެލްތް އެންޑް ވެލްބީންގް" ހާސިލްކުުރުމަށް އެއްބާރުލުން ދިނުމުގެ ގޮތުން ދިވެހިންގެ ތެރޭގައި ދުޅަހެޔޮ ސިއްހަތެއް ގާއިމް ކުރުމަަށް ގިނަ މަސައްކަތްތަކެއް ކުރަމުންދާ ކުންފުންޏެކެވެ.
ރާއްޖޭގެ އެކި ހިސާބުތަކުގެ ކައުންސިލްތަކާއި، ރެކްރިއޭޝަނަލް ކްލަބްތަކާއި، ރާއްޖޭގެ އެކި ކަންކޮޅުތަކުގައި ބާއްވާ ގިނަ މުބާރާތްތައް ސްޕޮންސަރުކޮށް، ދުޅަހެޔޮ ދިރިއުޅުމަކަށް މުޖުތަމަޢު އަހުލުވެރިކުރުވުމަށް ވެސް އުރީދޫން ދަނީ މިހާރު ވެސް މަސައްކަތްކުރަމުންނެވެ. އެގޮތުން 2017ވަނަ އަހަރުން ފެށިގެން ކޮންމެ އަހަރަކު ވެސް ބޭއްވޭ އުރީދޫ ކަލަރ ރަންއަކީ ހުރިހާ އުމުރުފުރައެއްގެ މީހުން ބައިވެރިވާ އެންމެ ބޮޑު އިވެންޓް ވެސްމެއެވެ.
2018ވަނަ އަހަރު އުރީދޫ މޯލްޑިވްސްއިން ވަނީ ދިވެހި ސަރުކާރުން ރައްޔިތުންނަށް ފެންވަރު ރަނގަޅު ސިއްހީ ހިދުމަތް ފޯރުކޮށްދިނުމަށް ކުރަމުންދާ މަސައްކަތްތަކަށް އެއްބާރުލުން ދިނުމުގެ ގޮތުން ރައްކާތެރިކަމުގެ އާލާތްތަކުގެ އިތުރުން އޮކްސިޖަން ސިލިންޑަރާއި، އެންމެ ފަހުގެ ނެވިގޭޝަން އަދި މުވާސަލާތީ ނިޒާމު ހަރުކޮށްފައިވާ ތިން ސީ އެމްބިއުލާންސް މިނިސްޓްރީ އޮފް ހެލްތަށް ހަދިޔާ ކޮށްފައެވެ.
މީގެ އިތުރުން، ކޮވިޑް-19 ޕެންޑެމިކްއާ ގުޅިގެން މުޖުތަމައުއަށް އެހީތެރިކަން ފޯރުކޮށްދިނުމުގެ ގޮތުން ކަސްޓަމަރުންނާއި ކުންފުނިތައް ގުޅުވައިލަދީ، އާންމުން ހޭލުންތެރިކުރުވައި، އޮންލައިން ތައުލީމާއި ސިއްހީ ހިދުމަތްތަކާއި ވިޔަފާރިތަކަށް މަގުފަހިކޮށްދޭ ޑިޖިޓަލް ހައްލުތައް ވަނީ އުރީދޫ އިން ފޯރުކޮށްދީފައެވެ. ހަމަަ އެއާާ އެކު، މި ބަލިމަޑުކަމާ ދެކޮޅަށް މަސައްކަތްކުރުމަށް ބޭނުންވާ މުހިންމު އާލާތްތަކާއި ސާމާނު ހޯދުމަށް އުރީދޫ ގްރޫޕާ ގުޅިގެން އުރީދޫ މޯލްޑިވްސްއިން 2،500،000.00 ރުފިޔާ ދިވެހި ސަރުކާރަށް ހަދިޔާކޮށްފައިވެއެވެ.
މުޖުތަމައުތަކުގެ ކުރިއެރުމަށް މަސައްކަތްކުރާ ކުންފުންޏެއްގެ ހައިސިއްޔަތުން، އުރީދޫ މޯލްޑިވްސްއަކީ ކާރިސާގެ ވަގުތުތަކުގައި، ޑިޖިޓަލް ޒަރިއްޔާާތައް މެދުވެރިކޮށް ފެންވަރު ރަނގަޅު ހިދުމަތްތަކާ ގުޅުވައިލަދޭ، މުހިންމު މައުލޫމާތުތައް ލިބިގަތުން ފަހިކޮށްދީ، ގޮންޖެހުންތަކުން އަރައިގަތުމަށް މަގު ފަހިކޮށްދޭ ގާތް ބައިވެރިއެކެވެ. ޑެންގީ، ހިމަބިހި ފަދަ ބަލިމަޑުކަމުގެ ވަގުތުތަކުގައި އުރީދޫ މޯލްޑިވްސްގެ ޕްލެޓްފޯމްތަކުގެ އެހީގައި ބަލިން ރައްކާތެރިކަން ހޯދާނެ ގޮތުގެ މައުލޫމާތު ވެސް ވަނީ ފޯރުކޮށްދީފައެވެ.
