"އިންޑިއާ އައުޓް"ގެ ނަމުގައި އުޅެނީ ބަޣާވާތެއް ގެންނަން: ނިހާދު
ރާއްޖޭގައި ތިބި އިންޑިއާ ސިފައިން ބޭރުކޮށްލުމަށް ގޮވައިލައި އިދިކޮޅު ލީޑަރު އަދި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް އިސްވެ ހުންނަވައިގެން ކުރިއަށް ގެންދާ ”އިންޑިއާ އައުޓް” ކެމްޕެއިން އަކީ ބަޣާވާތެއް ގެންނަން ކުރަމުންދާ މަސައްކަތެއް ކަމަށް ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.
ނިހާދު މިފަދައިން ވިދާޅުވީ އިދިކޮޅު ފަރާތްތަކުން އިސްނަގައިގެން ކުރިއަށްގެންދާ "އިންޑިއާ އައުޓް" ހަރަކާތުގެ ތެރެއިން ރައީސް ޔާމީން ދިރިއުޅުއްވާ ގެކޮޅުގައި އިންޑިއާ އައުޓް ޖަހައިފައިވާ ބެނާއެއް ހަރުކުރުމުން އެ ބެނާ ނެގުމަށް މިއަދު ފުލުހުން ހަރަކާތްތެރިވެފައިވާ ދަނޑިވަޅެއްގައެވެ.
ނިހާދު ވިދާޅުވީ "އިންޑިއާ އައުޓް"އޭ ކިޔައިގެން ބޮޑު ބަޣާވާތެއް ގެންނަން ކުރާ މަސައްކަތަކީ ގައުމާއި ރައްޔިތުންނަށް އޮތް ބޮޑު ނުރައްކަލެއް ކަމަށެވެ. އަދި އެ ނުރައްކާ ހުއްޓުވައި ގާނޫނީ ވެރިކަން ދެމެހެއްޓުމުގެ ޒިންމާ އޮންނާނީ ވަލިއްޔުލްއަމްރަށް ކަމަށް ނިހާދު ވިދާޅުވިއެވެ.
މީގެ އިތުރުން "ފިޔަވަޅު އެޅުއްވިލެއް ލަސްކަމަށް ފެނުނަސް އެޅުއްވި ފިޔަވަޅު ކިތަންމެހައި ރަނގަޅު" ކަމަށް ނިހާދު ވިދާޅުވިއެވެ.
ރާއްޖޭގައި ތިބި އިންޑިއާ ސިފައިން ބޭރުކުރުމަށް ގޮވައިލައި އިދިކޮޅުން ދަނީ ރާއްޖޭގެ އެކި ކަންކޮޅުތަކުގައި ހަރަކާތްތައް ކުރިޔަށްގެންދަމުންނެވެ. ރައީސް ޔާމީން ޖަލުން މިނިވަންވުމަށް ފަހު މި ހަރަކާތް ވަނީ އިތުރަށް ވަރުގަދަކޮށްފައެވެ.
އިންޑިއާ އައުޓް ހަރަކާތަކީ ގައުމީ ސަލާމަތަށް ނުރައްކަލެއް ކަމަށް ކަނޑައަޅައި ރައީސް އިބްރާހިމް މުހައްމަދު ޞާލިޙް މިއަދު ވަނީ ގަރާރެއް ނެރުއްވައިފައެވެ.
އޮއިި ތޯ ހުންގާނިއައު ނިކޭ ކައްލަބާ!