މާލެ އަންނަ ދޯނިތަކުގެ ފަޅުވެރިން މާލެ ނުފޭބުމަށް އިލްތިމާސްކޮށްފި
އަތޮޅު ތެރެއިން މާލެ އަންނަ ދޯނިފަހަރުތަކުން މީހުން މާލެއަށް ފައިބާ ނުހެދުމަށް ހެލްތު އެމަޖެންސީ ސެންޓަރުގެ ތަރުޖަމާނު ޑރ. ނަޒްލާ ރަފީގް އިސްތިމާސް ކުރައްވައިފިއެވެ.
އެޗްއީއޯސީގައި ރޭ ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޑރ. ނަޒްލާ ވިދާޅުވީ ދޯންޏަށް މުދާ އަރުވަންދާ މީހުންވެސް ތިބެންޖެހޭނީ ދޯނީގެ ފަޅުވެރިންނާއި ދިމާ ނުވާ ގޮތަށް ކަމަށާއި އެއްވެސް މީހެއްގެ ގައިން ބަލީގެ އަލާމާތް ފެނިއްޖެ ނަމަ އެކަން ލަސްނުކޮށް ކަމާ ބެހޭ ފަރާތްތަކަށް އަންގާ ޓެސްޓު ކުރުމަށް އިލްތިމާސްކުރާ ކަމަށެވެ.
ނަޒްލާ މިފަދައިން ވިދާޅުވެފައި މިވަނީ ދާދިފަހުން މާލެ ދަތުރުކުރާ ދެ ބޯޓެއްގެ ބަޔަކު ކޮވިޑް-19 އަށް ފައްސިވެ، އަތޮޅު ތެރޭގައި ގިނަ ރަށްތަކެއްގައި ކޮވިޑް ފެތުރެން ފެށުމާ ގުޅިގެންނެވެ.
ޑރ. ނަޒްލާ ވިދާޅުވީ އެންމެ މުހިއްމީ މާލެއިން ދާ ފަރާތްތައް 14 ދުވަހުގެ ކަރަންޓީނެއްގައި ތިބުން ކަމަށެވެ. އެގޮތުން މީހުން ކަރަންޓީންކުރަނީ 14 ދުވަހުގެ ތެރޭގައި އެމީހެއްގެ ގައިން ބަލީގެ އަލާމާތްތައް ފެނޭތޯ ބެލުމަށް ފަހު ބައްޔަށް ޓެސްޓްކުރުން ކަމަށެވެ. އަދި ބަލީގެ އަލާމާތް ނުފެނުނަސް 14 ދުވަސް ހަމަވުމުން ޓެސްޓްކޮށް ބަލި ހުރެެއްޖެނަމަ ރަށުގެ އެހެން މީހުންނާއި ބައްދަލުވިޔަ ނުދީ ވަކިން ބައިތިއްބާ ކަމަށެވެ.
މާލެ ސަރަހައްދުގައި އިއުލާންކުރި ލޮކްޑައުނަށް ބޮޑެތި ލުއިތަކެއް ދިން ފަހުން އަނެއްކާވެސް މި ބައްޔަށް ފައްސިވާ މީހުންގެ އަދަދު ވަނީ ބޮޑުތަނުން އިތުރުވާން ފަށާފައެވެ. އެގޮތުން އިއްޔެ އެކަނި ވެސް 156 މީހަކު މި ބައްޔަށް ފައްސިވި ވިއިރު، އޭގެތެރެއިން 134 މީހުންނަކީ ދިވެހިންނެވެ.
އިއްޔެ ފައްސިވި މީހުންނާއެކު ރާއްޖޭގެ އަދަދު ވަނީ 3,949 އަށް އަރާފައެވެ. މީގެތެރެއިން ފަރުވާ ދެމުން އަންނަނީ 1305 މީހުންނަށެވެ. އެގޮތުން 72 މީހަކަށް ފަރުވާ ދެމުން އަންނަނީ ހޮސްޕިޓަލުގައެވެ. އަދި މި ބަލިން ރަނގަޅުވި މީހުންގެ ޖުމްލަ އަދަދު 2،613 އަށް އަރާފައިވާއިރު މި ބަލީގައި 17 މީހަކު ވަނީ މަރުވެފައެވެ.
