އެންމެންގެ ހެޔޮ ދުޢާއަށް އެދެމުން ކިޑްނީ ބަދަލު ކުރުމުގެ އޮޕަރޭޝަނަށް ސާއިދު ފުރައިފި
ދެ ކިޑްނީ ފެއިލްވެ ހަތަރު އަހަރަށް ވުރެ ގިނަ ދުވަސް އެ ހިތާމައާއި ވޭނުގައި ހޭދަ ކުރުމަށް ފަހު، ޕީއެސްއެމްގެ ސްޕޯޓްސް ނޫސްވެރިޔާ އަހްމަދު ސާއިދު، ކިޑްނީ ބަދަލު ކުރުމުގެ އޮޕަރޭޝަނަށް މިއަދު ރާއްޖެއިން ބޭރަށް ފުރައިފިއެވެ.
އެނގިފައިވާ ގޮތުުގައި ސާއިދުގެ ކިޑްނީ ބަދަލު ކުރުމުުގެ އޮޕަރޭޝަން ކުރުމަށް ހަމަޖެހިފައި ވަނީ ޝްރީލަންކާގައެވެ.
ކުޅިވަރުގެ ޚަބަރުތައް ގެނެސްދިނުމުގައި އެއްވެސް ވަރުބަލިކަމެއް ނެތި މަސައްކަތް ކުރަމުން ދިޔަ ސާއިދުގެ މުޅި ދިރިއުޅުން ބަދަލުކޮށްލީ 2018ވަނަ އަހަރު، އޭނާގެ ސިއްޙަތާ ބެހޭ ގޮތުން ލިބުނު ހިތްދަތި ޚަބަރުންނެވެ. ސާއިދުގެ ދެ ކިޑްނީ ފެއިލް ވެފައިވާކަމަށް ޑޮކްޓަރުން އެންމެ ފުރަތަމަ ބުނި ދުވަހުން ފެށިގެން، މިއަދާ ޖެހެންދެން ވެސް އޭނާ ގެންދަނީ އެކަމާ ހަނގުރާމަކޮށް އެކަމަށް ފަރުވާ ކުރެވިދާނެ ގޮތެއް ފެނޭތޯ މަސައްކަތް ކުރަމުންނެވެ.
"ދެން"އާ ވާހަކަ ދައްކަމުން މީގެ ކުރިން ސާއިދު ބުނީ، 2018ވަނަ އަހަރު އޭނާ އެންމެ ފުރަތަމަ ، ޑޮކްޓަރަށް ދެއްކީ މޭނުބައިކޮށް ވަރުބަލި ވާން ފެށުމުން ކަމަށެވެ.
"އޭރު މޭ ނުބައިކޮށް، ވަރުބަލިވެ ގޮތްގޮތް ވާން ފެށީ. ހުން ވެސް އައި. ދެން ކުޑަކަމު ދާއިރު ލޭ ވެސް އަންނާތީ ޑޮކްޓަރަށް ދެއްކީ. ފުރަތަމަ ދެއްކީ އޭޑީކޭއަށް. އެތަނުން ބުނީ އަވަހަށް އައިޖީއެމްއެޗްއަށް ދާށޭ. އެކޮޅުން ބަލައިފައި ބުނީ ދެ ކިޑްނީ ފެއިލްވެފައި ހުރި ވާހަކަ" ސާއިދު ބުންޏެވެ.
އެޚަބަރު އެންމެ ފުރަތަމަ ލިބުން ދުވަހުން ފެށިގެން ސާއިދުގެ ޙަޔާތް ވަނީ އެފުށް މިފުށަށް ޖެހިފައެވެ. އާއިލާގެ ތެރެއިން ވެސް ކިޑްނީއެއް ނުލިބުމުގެ އިތުރުން، އޭނާގެ އަމިއްލަ ދިރިއުޅުމަށް ވެސް މިހާރު ވަނީ ވަރަށް ބޮޑު އަސަރެއްކޮށްފައެވެ. އެގޮތުން ސާއިދު މިހާރު ވަނީ ވަރަށް ބޮޑަށް ހިކިފައި ވެސް މެއެވެ. އޭގެ އިތުރުން އޭނާއަށް މިހާރު މާގިނައިން ފެން ވެސް ނުބޮވެއެވެ.
ސާއިދަކީ ވަރަށް ވެސް ހިތްވަރުގަދަ މީހެކެވެ. އެކަން ހާމަކޮށްދޭ އެއް ކަމަކީ، ފާއިތުވީ އަހަރުތަކުގައި ދެ ދުވަހުން އެއް ދުވަހު ޑައިލިސިސް ހަދަން ޖެހުނު ނަމަވެސް، ހިތްވަރާ އެކު އޭނާ މަސައްކަތު ނުކުންނަ ކަމެވެ. ވަޒީފާގެ މައިދާނުގައި ސާއިދަކީ އަދިވެސް ހަމަ ހިތްވަރު ގަދަ އަދި އެހާމެ ކުޅަދާނަ ނޫސްވެރިއެކެވެ.
ކިޑްނީ ބަދަލު ކުރުމަށް މަސައްކަތް ކުރި މަސައްކަތުގައި މީގެ ކުރިން ސާއިދު ހޭދަކޮށްފައި ވަނީ ވަރަށް ވެސް ހިތްދަތި ދުވަސްތަކެކެވެ.
ދެ ކިޑްނީ ވެސް ފެއިލް ވެފައިވާކަން 201 ވަނަ އަހަރު އެނގުނު ދުވަހުން ފެށިގެން ސާއިދު ގެންދިޔައީ އޭނާއަށް ކިޑްނީއެއް ހަދިޔާ ކޮށްދޭނެ ފަރާތެއް ލިބޭތޯ މަސައްކަތް ކުރަމުންނެވެ.
އެގޮތުން އޭނާ ބުނި ގޮތުގައި، ކިޑްނީ ހަދިޔާ ކުރުމާ ގުޅޭ ގޮތުން 12 މީހަކާ ވާހަކަ ދެކެވިފައި ވެއެވެ.
"ވާހަކަ ދެއްކި މީހުންގެ ތެރެއިން ތިން މީހަކު ކިޑްނީ ހަދިޔާ ކުރުމުގެ ކުރިން ފުރިހަމަ ކުރަންޖެހޭ ހުރިހައި މަރުހަލާތަކެއް ވެސް ފުރިހަމަކުރި. ނަމަވެސް ވަކި ހިސާބަކުން ފެއިލްވީ. ދެން ރީޗެކަޕް ހަދަން ޖެހޭ ހިސާބުން އެމީހުން ހަބަރެއް ނުވޭ. އަނެއް ބަޔަކު ޓެސްޓް ހަދަން ދާނެ ކަމަށް ބުނެ، ޓެސްޓް ހަދަން ޖެހޭ ދުވަހު ގުޅާގުޅާ ފޯނު ވެސް ނުނަގާ. އެހެންބަޔަކު އަހަންނަށް އެހީވާން ކުރިމަތިލައިފައި، އަަހަންނާ އެކު ފޮޓޯއެއް ނަގައިފައި ފަހުން ޚަބަރެއް ނުވޭ" ސާއިދު ބުންޏެވެ.
"މިހެން ކަންތައްވީމަ އަހަރެން މިހުންނަނީ އުންމީދު ކަނޑައިލައިގެން. އަހަރެން އުންމީދެއް ނުކުރާނަން. އެކަމަކު އަަހަރެން މިކަމަށް މަސައްކަތް ވެސް ކުރާނަން. ކިޑްނީއެއް ލިބޭތޯ ކުރަމުން އަންނަ މަސައްކަތް ހުއްޓައެއް ނުލާނަން" ކުރިން ކުރިމަތިވި ހިތްދަތިކަމާ އެކު ސާއިދު ބުނެފައިވެއެވެ.
ކިޑްނީ ބަދަލު ކުރުމަށް މާތް ﷲގެ އިރާދަފުޅާއެކު ސާއިދަށް މިހާރު ވަނީ ޑޯނަރެއް ލިބިފައެވެ. ސާއިދަށް އެއް ކިޑްނީ ހަދިޔާ ކުރުމުގެ ދީލަތި އެހީތެރިކަމުގެ އަތެއް ދިއްކޮށްލި އެ ޑޯނަރ ވެސް މިއަދު ވަނީ އޭނާއާ އެކު ސާޖަރީއަށް ފުރައިފައެވެ.
ފުރުމުގެ ކުރިން މީސް މީޑިއާގައި ސާއިދު ކުރި ޕޯސްޓުގައި އެންމެންގެ ކިބައިން ވެސް އެދިފައި ވަނީ އޭނާއަށާއި އޭނާގެ ޑޯނަރަށް ހެޔޮ ދުޢާ ކޮށްދޭށެވެ. މިކަމަށް މާލީ އެހީތެރިކަމެއް ދެވެން ނެތަސް، ހެޔޮ ދުޢާއަކީ ދެވޭ ވަރަށް ބޮޑު ހަދިޔާއެއްކަމަށް ސާއިދު ބުނެފައިވެއެވެ.
މާތް ﷲ ސާއިދާއި އޭނާއަށް ކިޑްނީ ހަދިޔާކޮށްދޭ ޑޯނަރަށް ފުރިހަމަ ރަނގަޅު ސިއްޙަތެއް ދެއްވައި، އެ އޮޕަރޭޝަން ކާމިޔާބު ކުރައްވާށިއެވެ. އާމީން!
އާމީން
آمين يارب العالمين
އާމީން