ކެފޭތަކުން ހިދުމަތް ހޯދާ މީހުން މާސްކް އަޅާކަށް ނުޖެހޭނެ: އެޗްޕީއޭ
ހޮޓާ، ކެފޭ، ރެސްޓޯރަންޓު ފަދަ ކާބޯތަކެތީގެ ހިދުމަތް ފޯރުކޮށްދޭ ތަންތަނުން ހިދުމަތް ހޯދާ މީހުން މާސްކް އެޅުމުން އިސްތިސްނާކޮށް، އުސޫލު އިސްލާހުކޮށްފި އެވެ.
ލޮކްޑައުންއަށް ދިން ލުއިތަކާއެކު ރާއްޖޭގައި ކޮވިޑަށް ފައްސިވާ މީހުން އިތުރު ވުމާއި ގުޅިގެން އެންމެންގެ ރައްކާތެރިކަމަށްޓަކައި ބޭރުތެރޭ އުޅޭއިރު މާސްކު އެޅުން މަޖުބޫރުކޮށްފައިވަނީ މިދިޔަ ބުރާސްފަތި ދުވަހުއެވެ.
އެޗްޕީއޭއިން މީގެކުރިން ކުރި އިއުލާނުގައި ބުނެފައި ވަނީ މާސްކު އެޅުމުން އިސްތިސްނާ ވާނީ، އުމުރުން ދެ އަހަރުން ދަށުގެ ކުޑަކުދިންނާއި ކަސްރަތު ކުރާ ވަގުތުގައި ކަސްރަތު ކުރާ މީހުން އަދި އެހެން މީހެއްގެ އެހީއާ ނުލާ މާސްކް އަޅައި ނަގާ ނުހެދޭ ހާލަތުގައި ތިބޭ މީހުން ކަމަށެވެ.
ނަމަވެސް ރޭ އެޗްޕީއޭއިން ނެރުނު އެންގުމެއްގައި ބުނީ އެ ފަރާތްތަކުގެ އިތުރުން، މާލެ ސަރަހައްދު(މާލެ، ހުޅުމާލެ، ވިލިމާލެ، ތިލަފުށި، ގުޅިފަޅު އަދި ހުޅުލޭ)ގައި އެޗްޕީއޭ އިން އާންމުކޮށްފައިވާ ގައިޑްލައިންތަކާ އެއްގޮތަށް ހޮޓާ، ކެފޭ، ރެސްޓޯރަންޓު ފަދަ ކާބޯތަކެތީގެ ހިދުމަތް ފޯރުކޮށްދޭ ތަންތަނުން ހިދުމަތް ހޯދާ މީހުން މާސްކް އެޅުމުން އިސްތިސްނާ ވާނެ ކަމަށެވެ.
އެ ފިޔަވަޅު ތަންފީޒުކޮށް، ފިޔަވަޅުތަކަށް ފުރިހަމައަށް އަމަލުކުރުމަށް ހުރިހާ އިދާރާތަކަށް ވަނީ އަންގައިފަ އެވެ. އަދި އެ ފިޔަވަޅުތައް ތަންފީޒުކުރުމަށް ދައުލަތުގެ މުއައްސަސާތަކުން އަދާކުރަންޖެހޭ ޒިންމާ އަދާކުރުމަށް ދޭ އިރުޝާދުތަކަށް އަމަލުކުރުމަށް ހުރިހާ ރައްޔިތުންނަށް އެޗްޕީއޭއިން ވަނީ އިލްތިމާސްކޮށްފަ އެވެ.
އެޗްޕީއޭއިން ބުނީ މާސްކް އެޅުން މަޖުބޫރު ކުރީ، އާންމު ސިއްހަތުގެ ގާނޫނުގެ ދަށުން ރައްކާތެރި ކަމުގެ ގޮތުން އަޅަން ޖެހޭ ފިޔަވަޅުތައް އެޅުމަށް މަގުފަހިކުރުމުގެ ގޮތުން އެ ގާނޫނުގެ 33 ވަނަ މާއްދާގެ ދަށުން ކަމަށެވެ.
Ads by STO
