އެންމެ ފަހު ވަގުތު އިންތިގެ ޓީމުން ގިނަ ޝަކުވާތަކެއް ހުށަހަޅައިފި
އެމްޑީޕީގެ ޗެއަރޕާސަން އިންތިޚާބުގެ ވޯޓުލުން ނިމެމުން ދަނިކޮށް، އިންތިޚާބުގައި ވާދަކުރަމުންދާ އިމްތިޔާޒް ފަހުމީގެ ޓީމުން ގިނަ ޝަކުވާތަކެއް ހުށަހަޅައިފިއެވެ.
ވޯޓުލާ މަރުކަޒުތަކުގައި ވޯޓުލުން ފެށުން ލަސްވުމުގެ ސަބަބުން ހަވީރު 6:00އާ ހަމައަށް ވޯޓްލުމުގެ ވަގުތު އިތުރުކުރުމާ ގުޅިގެން އިންތިގެ ގާނޫނީ ޓީމުން ވަނީ ނޫސްވެރިންގެ ބައްދަލުވުމެއް ހަވީރުގެ ވަގުތެއްގައި ބާއްވައިފައެވެ.
އެ ބައްދަލުކުރެއްވުމުގައި އިންތިގެ ޓީމުން ވަނީ ހަވީރު ހަތަރެއް ޖަހަންދެން ކުރިއަށް ގެންދަން ނިންމި ވޯޓް ނެގުން އިތުރު ދެ ގަޑިއިރަށް ދަންމައިލީ އުސޫލުތަކާ ޚިލާފަށް ކަމަށް ވިދާޅުވެފައެވެ. އަދި ވޯޓްލާ ވަގުތު އިތުރުކުރީ ހަތަރެއް ޖެހި ފަހުން ކަމަށާއި އެއީ އާންމު އުސޫލުން ބަލާ ނަމަ ނިންމޭނެ ނިންމުމެއް ނޫން ކަމަށް ވިދާޅުވިއެވެ.
މީގެ އިތުރުން ހައެއް ޖެހުމާ ހަމަޔަށް ވަގުތު އިތުރުކުރި ނަމަވެސް ބައެއް ރަށްރަށުގައި ހަތަރެއް ޖެހިއިރު ވޯޓުފޮށިތައް ބަންދުކޮށް ގުނަން ފަށާފައިވާ ކަމަށްވެސް އިންތިގެ ޓީމުން ވިދާޅުވިއެވެ.
އަދި އެކަމަކީ ދުނިޔޭގެ އެއްވެސް ތަނެއްގައި އަމަލު ކުރާނެ ގޮތެއް ނޫން ކަމަށާއި އެއް ބަޔަކު ވޯޓު ގުނާއިރު އަނެއް ބަޔަކު ވޯޓުލުން އެއީ އުސޫލާ ހިލާފުކަމެއް ކަމަށް ވިދާޅުވިއެވެ. މީގެ އިތުރުން ވޯޓުލާ ކަރުދާސްކޮށް ވޯޓު ފޮއްޓަށް ވައްޓައިލުމުގެ ކުރިން ދެއްކުމުގެ މައްސަލައާއި ޑަބަލްކޮށް ވޯޓުލުމުގެ މައްސަލަ ވެސް އެ ޓީމުން ކޮމިޓީއަށް ހުށަހަޅައިފައިވެއެވެ.
ވޯޓުލުން ކުރިޔަށް ދިޔަ ގޮތާ ގުޅޭ ގޮތުން ވާހަކަދައްކަވަމުން އިންތިގެ ކެންޕެއިން މެނޭޖަރު މުޙައްމަދު ވަހީދު (ވައްޑެ) ވިދާޅުވީ އެކަކަށް ގިނަ ފަހަރު ވޯޓުލުމުގެ ފުރުސަތު ލިބިދެވޭ ގޮތަށް އިނގިލީގައި މާކަރުން ފާހަގަ ނުޖަހާކަމުގެ ޝަކުވާ ގިނަ އަދަދަކަށް ލިބެމުންދާ ކަމަށެވެ. “މިއީ ޕާޓީން ނެރެފައިވާ އުސޫލާ ކަނޑައެޅިގެން ޚިލާފުކަމެއް” ވައްޑެ ވިދާޅުވިއެވެ.
މިއަދު ވާދަވެރިކަމާއެކު ކުރިއަށް ގެންދިޔަ އެމްޑީޕީގެ އެތެރޭގެ އިންތިޚާބުގައި ވޯޓުލާ މަރުކަޒުތަކުގައި އިރުއޮއްސި 6:00 ޖެހުމުން ވޯޓުލުން ބަންދުކުރުމަށް ފަހު މިހާރު އަންނަނީ މަރުކަޒުތަކުގައި ނަތީޖާ އިއުލާންކުރަމުންނެވެ.
އެމްޑީޕީގެ ޗެއަރޕާސަންގެ މަޤާމަށް ވާދަކުރެއްވީ އިކޮނޮމިކް މިނިސްޓަރ ފައްޔާޒް އިސްމާޢީލާއި، މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއެވެ.
