ބައިރޫތު ސުންނާފަތި ކޮށްލީ ކޯއްޗެއް؟

ލުބުނާނުގެ ވެރިރަށް ބައިރޫތުގައި ރޭ ބާރުގަދަ ގޮވުންތައް ގޮވި ސަބަބު ބަލަން ހާއްސަ ތަހުގީގެއް ފަށައި ބައިރޫތުގައި ކުއްލި ނުރައްކަލުގެ ހާލަތު އިއުލާންކޮށްފިއެވެ.

Ads by WAMCO

ބައިރޫތުގެ މައި ބަނދަރާ ކައިރި ހިސާބެއްގައި ގޮވި ގޮވުންތަކާއި ގުޅިގެން މިހާތަނަށް 78 ވުރެ ގިނަ މީހުން މަރުވެ 4000 ވުރެ ގިނަ މީހުން ޒަހަމްވެފައިވާ ކަމަށް ރިޕޯޓުތައް ބުނެއެވެ. އަދި ހޮސްޕިޓަލްގައި އިމަޖެންސީ ހާލަތުގައި އެތައް ސަތޭކަ ވުރެ ގިނަ މީހުންނަށް ދަނީ ފަރުވާ ދެމުންނެވެ.

ބައިރޫތުގައި ގޮވީ ކޮން އެއްޗެއްކަމެއް ސީދާ އަދި ދެނެގަނެވިފައި ނުވާއިރު، ކަމާބެހޭ ފަރާތްތަކުން ބުނާ ގޮތުގައި އެތަނުގައި ގޮވީ ވަރަށް ފަސޭހައިން ގޮވާ ކެމިކަލްގެ ބާވަތެއް ކަމަށްވާ އެމޯނިއަމް ނައިޓްރޭޓެވެ. އެއީ ދަނޑުވެރިކަމުގައި ގަސްކާނާގެ ގޮތުގައްޔާއި ބޮންތަކުގައި ބޭނުންކުރާ އެއްޗެކެވެ. ގޮވި ގުދަނުގައި މީގެ 2،700 ޓަނުގެ ކެމިކަލް ހުރި ކަމަށްވެ އެވެ.

ސައިންސްވެރިން ބުނާ ގޮތުގައި މި އެއްޗަކީ އެހާ ފަސޭހައިން އަމިއްލަ ޒާތުގައި ގޮވާ އެއްޗެއް ނޫން ކަމަށާއި އެއީ އެއްޗެއްގައި ރޯވުމަށް ބޭނުންވާ އޮކްސިޖަން ފަސޭހައިން ފޯރުކޮށްދިނުމަށް އެހީވާ މާއްދާއެއް ކަމަށެވެ.

ނަމަވެސް އެމޯނިއަމް ނައިޓްރޭޓަށް ތެލުގެ އަސަރުކުރުން ފަދަ ކަމެއް ދިމާވެގެން އެއީ ގަދަޔަށް އަލިފާން ހިފާ އެއްޗަކަށް ބަދަލުވެދާނެ ކަމަށާއި ބެއިރޫތުގައި ހިނގީ މިފަދަ ހާދިސާއެއް ކަމަށް ސައިންސްވެރިން ބުނެއެވެ.

ލުބުނާނުގެ އޮފިޝަލުން ބުނާ ގޮތުގައި މި ހާދިސާ ގައި މަރުވި މީހުންގެ އަދަދު އިތުރުވާނެކަމަށް ބެލެވެއެވެ. މީހުން ސަލާމަތްކުރުމުގައި ހަރަކާތްތެރިވާ ޓީމްތައް ދަނީ ވެއްޓިފައިވާ އިމާރާތްތައް ނަގާ އެތަނުގެ ދަށުގައި އެއްވެސް މީހަކު ވޭތޯ ބަލަމުންނެވެ. އަދި ބައިރޫތުގެ ހޮސްޕިޓަލްތައް ފުރުމުން ޒަހަމްވި މީހުންނަށް ފަރުވާދިނުމަށް ސިޓީން ބޭރަށް ގެންދާކަމަށް ވެސް އޮފިޝަލުން ބުނެއެވެ.

ހަބަރުތައް ބުނާ ގޮތުން ބައިރޫތުގައި ބާރުގަދަ އެއްޗެއް ގޮވާފައި މިވަނީ އެގައުމުގެ ކުރީގެ ބޮޑުވަޒީރު ރަފީޤު ހަރީރީ އަވަހާރަކޮށްލި މައްސަލާގައި ހުކުމް އިއްވަން ތައްޔާރުވެފައިވަނިކޮށެވެ.

ބައިރޫތުގައި މި ގޮއްވި ގޮވުންތަކީ ފަހުގެ ތާރީހެއްގައި އެ ޤައުމުގައި ގޮވި އެންމެ ބާރު ގަދަ ގޮވުންތަކެވެ. މި ގޮވުމުގެ އަޑު އެ ޤައުމާއި 150 މޭލު ދުރުގައި އޮންނަ ސައިފްރަސްއާއި ހަމައަށް އިވުނުކަމަށް ހަބަރުތައް ބުނެއެވެ.