ބާބުރީ މިސްކިތް ހުރި ބިމުގައި ފައްޅިއެއް އަޅަން މޯދީ ބިންގާ އަޅައިފި
އިންޑިއާގެ އުއްތުރަ ޕްރަދޭޝްގައި އޮންނަ އާޔޯދްޔާ ސިޓީގައި ކުރިން ހުރި މުސްލިމުންގެ ތާރީޚީ ބާބުރީ މިސްކިތް ހުރި ބިމުގައި ހިންދޫ ދީނުގެ ފައްޅިއެއް އަޅަން އިންޑިއާގެ ބޮޑުވަޒީރު ނަރެންދްރަ މޯދީ ބިންގާ އަޅައިފިއެވެ.
މީލާދީން 1519 ވަނަ އަހަރު އިންޑިއާގެ ބޮޑުބައެއްގައި ރަސްކަން ކުރެއްވި ޝާހު ޖަހީރުއްދީން މުޙައްމަދު ބާބަރު ބިނާ ކުރެއްވި އެމިސްކިތް ބިނާ ކޮށްފައިވަނީ، އޭގެ ކުރިން އެތަނުގައި ހުރި ހިންދޫއިންގެ ފައްޅިއެއް ތަޅާލާފައި ކަމަށް އެޤައުމުގެ ހިންދޫން ދިޔައީ އަބަދު ވެސް ތުހުމަތު ކުރަމުންނެވެ.
އެހެންކަމުން ބާބުރީ މިސްކިތް ތަޅާލާފައި އެތަނުގައި ފައްޅިއެއް އެޅުމުގެ މަސައްކަތް އިންޑިއާގެ ހިންދޫންގެ އިސް މަސައްކަތެކެވެ. އެހެންކަމުން 1992 ވަނަ އަހަރުގެ ޑިސެމްބަރު މަހުގެ 6 ވަނަ ދުވަހު ހިންދޫންގެ ހަރުކަށި ފިކުރުގެ ބަޔަކު ވަނީ އެމިސްކިތް ތަޅާލާފައެވެ.
އެކަމުގެ ސަބަބުން އިންޑިއާގެ ހިންދޫންނާއި މުސްލިމުންނާއި ދެމެދު ހަމަނުޖެހުންތަކެއް ވެސް އުފެދުނެވެ.
ބާބުރީ މިސްކިތް ހުރި ބިމުގައި ހިންދޫއިން ފައްޅި އެޅުމަށް އެބިން ހަވާލު ކުރުމަށް އެޤައުމުގެ ސުޕްރީމް ކޯޓުން އަމުރު ކޮށްފައިވަނީ މިދިޔަ އަހަރުގެ ނޮވެމްބަރު މަހުގައެވެ.
ނަމަވެސް އެކޯޓުން ވަނީ ބާބުރީ މިސްކިތް ތަޅާލުން ވެސް ކުށްވެރި ކޮށްފައެވެ. އަދި މުސްލިމުން މިސްކިތެއް އެޅުމަށް އަޔޯދިޔާގެ އެހެން ސަރަޙައްދުތަކުން ފަސް އޭކަރުގެ ބިމެއް އިންޑިޔާގެ މުސްލިމުންގެ ސުންނީ ސެންޓްރަލް ވަޤްފު ބޯޑަށް ދިނުމަށްވެސް އިންޑިއާގެ މަތީ ކޯޓުން އަމުރު ކޮށްފައިިވެއެވެ.
މުސްލިމުންގެ މިސްކިތެއް ތަޅާލާ، އެބިމުގައި ހިންދޫއިންގެ ފައްޅިއެއް އަޅަން ބިންގާ އަޅާފައިވާއިރު، އެރަސްމިއްޔާތަށް އިންޑިއާގެ ބައެއް ނުފޫޒުގަދަ މުސްލިމުންނަށް ވެސް ދައުވަތު ދީފައިވެއެވެ.
