އައްޑޫ ބަހުރުވައިން ޚުޠުބާ އިއްވައި ހެދުމަކީ އައްޑޫ މީހުންގެ ޙައްޤެއް: ފާރިސް
އައްޑޫ ބަހުރުވައިން ޚުޠުބާ އިއްވައި ހެދުމަކީ އައްޑޫ މީހުންގެ ޙައްޤެއްކަމަށް މޯލްޑިވްސް ރިފޯމް މޫވްމަންޓް (އެމްއާރްއެމް) ގެ ރައީސް ފާރިސް މައުމޫން މިއަދު ވިދާޅުވެއްޖެއެވެ.
އައްޑޫ ސިޓީ މީދޫގައި ހުންނަ މަސްޖިދުއް މަޖްދުއްދީނުގައި މިދިޔަ ހުކުރު ދުވަހު އައްޑޫ ބަހުރުވައިން ޚުޠުބާ ކީ މައްސަލައެއްގައި ވަނީ މުޙައްމަދު ރަޝީދު ކިޔާ މުދިމަކު ސަސްޕެންޑްކޮށްފައެވެ. އޭނާ ސަސްޕެންޑްކުރީ ޚުޠުބާއަށް އުނިިއިތުރު ގެނައި މައްސަލައެއްގައެވެ.
ފާރިސް މިއަދު ކުރެއްވި ޓުވީޓެއްގައި ވިދާޅުވީ ''އައްޑޫ ބަަހުރުވައިން، އައްޑޫ ލާއި ރަސްމީ މުޢާމާލާއް ކޮށް ޚުޠުބާ އިއްވައި ހެދުމަކީ އައްޑޫ މީހުންގެ ޙައްޤައް'' ކަމަށެވެ.
އައްޑޫ ބަހުރުވައިން ޚުޠުބާ ކީ މައްސަލައާ ގުޅިގެން ހެރިޓޭޖް މިނިސްޓަރު ޔުމްނާ މައުމޫން ވިދާޅުވީ ދިވެހި ބަހުގެ ތެރޭގައި ރާއްޖޭގެ އެކި ހިސާބުތަކުގައި ވާހަކަދައްކާ ބަހުރުވަތައް ވެސް ހިމެނޭ ކަމަށާއި, ދިވެހި ބަސް ރައްކާތެރިކޮށް ކުރިއެރުވޭނީ ދިވެހި ބަހުގެ ބަހުރުވަތައް ވެސް ރައްކާތެރިކޮށް ކުރިއަރުވައިގެން ކަމަށެވެ. އަދި ބަހުރުވަތަކުން މުޢާމަލާތުކުރާނެ ފުރުސަތުތައް ތަނަވަސް ވެގެން ކަމަށެވެ.
ބަހުރުވައަކީ އެ ބަހަކުން ވާހަކަ ދައްކާ ރަށެއްގެ ނުވަތަ އަތޮޅެއްގެ މީހުންގެ ދިރިއުޅުމާއި ސަގާފަތާއި ގުޅިލާމެހިފައި އޮންނަ އެއްޗެއް ކަމަށާއި, އެއީ އެ ރަށެއްގެ ނުވަތަ އެ އަތޮޅެއްގެ މުހިންމު މާނަވީ ސަގާފީ ތަރިކައެއްކަން ވެސް ޔުމްނާ ފާހަގަ ކުރެއްވިއެވެ.
އިޖުތިމާއީ ބޮޑު މައްސަލަގަނޑެއް ފަށަންދޯ މި ވެރީން މި ރާވަނީ؟؟