މީޑިއާނެޓް އޮފީހަށް ވަދެ މާރާމާރީ ހިންގި މައްސަލާގައި އިތުރު މީހަކު ހައްޔަރުކޮށްފި
އޯކިޑުމަގުގައި ހުންނަ މީޑިއާނެޓްގެ އޮފީހަށް ވަދެ މާރާމާރީ ހިންގި މައްސަލާގައި އިތުރު މީހަކު ހައްޔަރުކޮށްފިއެވެ.
އެ މައްސަލާގައި ފުލުހުން މީގެ ކުރިން ވަނީ 22 އަހަރުގެ ޒުވާނަކާއި 19 އަހަރުގެ ޒުވާނަކު ހައްޔަރުކޮށްފައެވެ. މި މައްސަލައިގައި އިއްޔެ ހައްޔަރުކޮށްފައި ވަނީ 23 އަހަރުގެ ފިރިހެނެކެވެ.
އޭނާގެ ބަންދާމެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން ވަނީ ޝަރީއަތް ނިމެންދެން ބަންދުކޮށްފައެވެ.
މީޑިއާނެޓު އޮފީހަށް ބަޔަކު ވަދެ އެތަނުގެ މުވައްޒަފަކު ޒަހަމުކޮށްލާފައިވަނީ އޮގަސްޓު މަހުގެ 18ވަނަ ދުވަހުގެ ހަވީރު 17:48 ހާއިރުއެވެ. އޭނާއަށް ހަމަލާދިނީ މަރުތޭލަކުން ކަމަށް މަޢުލޫމާތު ލިބިފައިވެއެވެ.
އޭނާ ބަންދުކުރި ކޯޓު އަމުރުގައި ބުނެފައިވަނީ އޭނާ މީޑިއާނެޓް އޮފީހަށް ވަދެ މާރާމާރީ ހިންގުމުގައި ބައިވެރިވެފައިވާ ކަމަށް ސީސީޓީވީ ފޫޓޭޖްތަކުން ފެނިފައިވާ ކަމަށެވެ. އަދި އޭނާ ހައްޔަރުކޮށްފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާ ކުރުމުގެ ގާނޫނަށް ރިޔާޔަތްކޮށް، މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެކަމަށްޓަކައި ކަމަށްވެސް އަމުރުގައި ބުނެފައިވެއެވެ.
