އެމްއެމްސީގެ ކޯޑް އޮފް އެތިކްސްއަށް 60 އަށް ވުރެ ގިނަ މީޑިއާއިން އެއްބަސްވެއްޖެ
މޯލްޑިވްސް މީޑިއާ ކައުންސިލްގެ ކޯޑް އޮފް އެތިކްސްއަށް 60 އަށް ވުރެ ގިނަ މީޑިއާއިން އެއަށް އަމަލު ކުރުމަށް އެއްބަސްވެއްޖެއެވެ.
މޯލްޑިވްސް މީޑިއާ ކައުންސިލުން އެކުލަވާލި "ދިވެހި މީޑިއާގެ އަހުލާޤީ މިންގަނޑު" އިފްތިތާހްކޮށް މީޑިއާތަކުން އެންޑޯސްކޮށް ސޮއިކުރުމުގެ ރަސްމިއްޔާތު ބާއްވައިފައިވަނީ މިއަދުއެވެ.
މީޑިއާ ކައުންސިލުން ބުނެފައިވަނީ ދިވެހި މީޑިއާ ކޮންމެ މީހަކީ މި އަޚްލާޤީ މިންގަނޑަށް ތަބާވާ އަދި މި އަޚްލާޤީ މިންގަނޑަށް އަހުލުވެރި މީހަކަށް ވާންވާނެކަމަށެވެ.
ކޯޑް އޮފް އެތިކްސްގައި ބަޔާންކޮށްފައިވާ ކަންކަމުގެ ތެރޭގައި އިސްލާމް ދީނާއި ދިވެހި ޖުމްހޫއްރިއްޔާގެ ޤާނޫނުއަސާސީއާއި ޤާނޫނުތަކަށް ހުރުމަތްތެރިކޮށް ހިތުން، އާންމުންނަށް ހަގީގަތް އެނގުމުގެ ހައްގަށް އިހުތިރާމް ކުރުން، އިންސާނީ ހައްގުތަކަށް ހުރުމަތްތެރިކޮށް ހިތައި އިޖުތިމާޢީ އަޚްލާޤު ހިފެހެއްޓުން ހިމެނެއެވެ.
މީގެ އިތުރުން ނޫސްވެރިކަމަށް ނުރަނގަޅު އަސަރު ފޯރާނެފަދަ މަންފާތަކާއި ނުފޫޒުތަކުން އެއްކިބާވުމުގެ އިތުރުން ނޫސްވެރިކަމުގެ ހަމަތައް ހިފަހައްޓައި އެއްވެސް ބިރަކަށް ޖެހިލުންނުވުންވެސް ހިމެނެއެވެ.
މީޑިއާ ކައުންސިލުން ވަނީ ހުރިހާ މީޑިއާތަކުންވެސް "ދިވެހި މީޑިއާގެ އަޚްލާޤީ މިންގަނޑު"އާ އެއްގޮތްވާ ގޮތުގެ މަތިން ހަބަރު ފެތުރުމަށް އިލްތިމާސްކޮށްފައެވެ.
Ads by STO
