12 ރަށެއްގެ މަގުބައްތިތައް ބެލެހެއްޓުމާ ސްޓެލްކޯ އިން ހަވާލުވެއްޖެ
ވ. އަދި ކ. އަތޮޅުގައި ސްޓެލްކޯ އިން ހިދުމަތްދޭ ރަށްތަކުގެ މަގުބައްތިތައް މަރާމާތުކޮށް، ބެލެހެއްޓުމާ އެ ކުންފުނިން މިއަދު ހަވާލުވެއްޖެއެވެ.
ސްޓެލްކޯއިން ވިދާޅުވީ ކ. އަދި ވ. އަތޮޅުގެ 12 ރަށެއްގެ މަގުބައްތި މަރާމާތުކޮށް ބެލެހެއްޓުމާ މިއަދު ހަވާލުވެފައިވާ ކަމަށެވެ. އަދި މިއާއެކު އއ. އަދި އދ. އަތޮޅު ހިމެނޭހެން، އެކުންފުނިން ހިދުމަތް ދެމުންގެންދާ ރަށްތަކުގެ ތެރެއިން ކ. ކާށިދޫ ފިޔަވާ އެހެން ހުރިހާ ރަށެއްގެ މަގުބައްތި މަރާމާތުކޮށް ބެލެހެއްޓުމާއި މިކުންފުނިން ހަވާލުވެފައިވާ ކަމަށެވެ.
މި 12 ރަށާއެކު ޖުމަލް 29 ރަށެއްގެ މަގު ބައްތިތައް ބެލެހެއްޓުމާ އެ ކުންފުނިން މިވަނީ ހަވާލުވެފައެވެ. ސްޓެލްކޯއިން މަގު ބައްތިތައް ބެލެހެއްޓުމާއި ހަވާލުވެފައިވަނީ އެ ކުންފުނިން ކަރަންޓުގެ ޚިދުމަތް ފޯރުކޮށްދެމުން އަންނަ އަތޮޅުތަކުގެ ރަށްތަކުގައެވެ.
މިކަމުގެ އެއްބަސްވުމުގައި ސޮއި ކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ސްޓެލްކޯގެ މެނޭޖިން ޑިރެކްޓަރ އަޙުމަދު ޝަރީފް ވިދާޅުވީ، މިހާތާނަށް ސޮއިކުރި ރަށްތަކުގެ މަގުބައްތިތައް މަރާމާތުކުރަން ބޭނުންވާ މިންވަރުގެ އޮޑިޓެއް ހަދާފައިވާ ކަމަށެވެ.
އެގޮތުން އިތުރަށް މަގު ބައްތި ޖެހަންޖެހޭ މިންވަރާ، މަރާމާތުކުތުކުރަން ބޭނުންވާ މިންވަރު ދެނެގަނެވި، އެކަމަށް ބޭނުންވާ ސަމާނު ގެނައުމުގެ މަސައްކަތްވެސް ފެށިގައިވާ ކަމަށް ޝަރީފް ވިދާޅުވިއެވެ.
