އަބުދުﷲ ރަޝީދުގެ ހަށިގަނޑު ހޯދަން އާއިލާއިން ކޯޓަށް

މަސްތުވާތަކެތީގެ ތުހުމަތުގައި ފުލުހުންގެ ހައްޔަރުގައި ހުއްޓާ ނިޔާވި، ގދ. ހޯޑެއްދޫ އަބުދުﷲ ރަޝީދުގެ ހަށިގަޑު ހޯދުމަށް އޭނާގެ އާއިލާއިން ސިވިލް ކޯޓަށް މައްސަލަ ހުށަހަޅައިފިއެވެ.

އާއިލާގެ ފަރާތުން ބައެއް މީޑިއާތަކަށް މައުލޫމާތު ދީފައިވާ ގޮތުގައި، މައްސަލާއިގެ ޝަރީއަތަށް މާދަމާ ސިވިލް ކޯޓަށް ހާޒިރުވުމަށް ކޯޓުން މިހާރުވަނީ އަންގާފައެވެ.

ރަޝީދު ނިޔާވެފައިވަނީ ފުލުހުންގެ ބެލުމުގެ ދަށުގައި ހުއްޓާ އޭނާގެ މެއަށް ތަދެއް އަރައި ފިޓް ޖެހުމުގެ ޢަލާމާތްތަކެއް ފެނުމާއި ގުޅިގެން އޭނާ ގދ. މަޑަވެލި ސިއްޙީ މަރުކަޒަށް ގެންދިޔަ މަގުމަތީގައިކަމަށް ފުލުހުން މީގެކުރިން ވިދާޅުވެފައިވެއެވެ.

ނޭޝަނަލް އިންޓަރގްރިޓީ ކޮމިޝަނުން ވަނީ ރަޝީދުގެ ޕޯސްޓްމޯޓަމް ހެދުމަށް ނިންމާފައެވެ. ނަމަވެސް އާއިލާއިން ދަނީ އެކަމާ ދެކޮޅު ހަދަމުންނެވެ.

މި މައްސަލައިގާ ކަން ހިނގައިދިޔަ ގޮތް އާއިލާގެ ފަރާތުން ވަނީ އާންމުންނާ ހިއްސާކޮށްފައެވެ.

https://dhen.mv/165375