ޕޯސްޓްމޯޓަމް ހަދަން އަބްދުﷲ ރަޝީދުގެ ހަށިގަނޑު ފޮނުވަނީ ހޯމަ ދުވަހު
ފުލުހުންގެ ބެލުމުގައި ދަށުގައި ހުއްޓާ ނިޔާވި އަބްދުﷲ ރަޝީދުގެ ހަށިގަނޑު ޕޯސްޓްމޯޓަމް ހެދުމަށް ރާއްޖެއިން ބޭރަށް ފޮނުވަނީ ހޯމަ ދުވަހު ކަމަށް ސިވިލް ކޯޓުން ވިދާޅުވެއްޖެއެވެ.
ރަޝީދު ނިޔާވެފައިވަނީ ފުލުހުންގެ ބެލުމުގެ ދަށުގައި ހުއްޓާ އޭނާގެ މެއަށް ތަދެއް އަރައި ފިޓް ޖެހުމުގެ ޢަލާމާތްތަކެއް ފެނުމާއި ގުޅިގެން އޭނާ ގދ. މަޑަވެލި ސިއްޙީ މަރުކަޒަށް ގެންދިޔަ މަގުމަތީގައިކަމަށް ފުލުހުން ވަނީ ވިދާޅުވެފައިވެއެވެ.
ނޭޝަނަލް އިންޓަރގްރިޓީ ކޮމިޝަނުން ވަނީ ރަޝީދުގެ ޕޯސްޓްމޯޓަމް ހެދުމަށް ނިންމާފައެވެ. ނަމަވެސް އާއިލާއިން ދަނީ އެކަމާ ދެކޮޅު ހަދަމުންނެވެ. އަބުދުﷲ ރަޝީދުގެ ހަށިގަނޑު ހޯދުމަށް އޭނާގެ އާއިލާއިން ސިވިލް ކޯޓަށް ވަނީ މައްސަލަ ހުށަހަޅައިފައެވެ.
މި މައްސަލައިގެ ފުރަތަމަ އަޑުއެހުން މިއަދު ވަނީ ބާއްވާފައެވެ. އެ އަޑުއެހުމަށްފަހު ނޫސްވެރިންނާ ވާހަކަ ދައްކަމުން، ރަޝީދުގެ އާއިލާގެ ވަކީލުން ވިދާޅުވީ އަންނަ ހޯމަ ދުވަހު ރަޝީދުގެ ހަށިގަނޑު ރާއްޖެއިން ބޭރަށް ގެންދަން ނިންމާފައިވާ ކަމަށް ދައުލަތުން ކޯޓުގައި ބުނެފައިވާ ކަމަށެވެ.
