ބަޖެޓު ބަހުސް މާދަމާ ފަށަނީ
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅުއްވާފައިވާ ބަޖެޓުގެ ބަހުސް މަރުހަލާ މާދަމާ ފެށުމަށް ތާވަލުކޮށްފިއެވެ.
ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ މިއަދު ވިދާޅުވީ ބަހުސް ބޭއްވުމަށް ތާވަލު ކުރެވިފައިވާ ދުވަސްތަކުގައި ހެނދުނު 9 އިން ރޭގަނޑު 10 ޖަހަންދެން ބަހުސްކުރުމަށް ހަމަޖެހިފައިވާ ކަމަށެވެ.
ބަޖެޓު ބަހުސް މަދާމާއިން ފެށިގެން ބުރާސްފަތު ދުވަހުގެ ނިޔަލަށް ކުރިއަށް ގެންދިއުމަށް ވަނީ ހަމަޖެހިފައެވެ.
އަންނަ އަހަރަށް ލަފާކޮށް ދައުލަތުން ރައްޔިތުންގެ މަޖިލީހަށް ހުށަހަޅުއްވާފައިވަނީ 42.6 ބިލިޔަން ރުފިޔާގެ ބަޖެޓެކެވެ. ބަޖެޓު ހުށަހެޅުއްވުމަށްފަހުގައި މެމްބަރުން ބަޖެޓު ދިރާސާ ކުރެއްވުމަށް ތިން ދުވަހުގެ މުއްދަތެއް ދީފައިވެއެވެ.
ބަޖެޓު ދިރާސާ ކުރުމުގެ މަސައްކަތް ކުރައްވާނީ މާލިއްޔަތު ކޮމެޓީއާއި، އިޤްތިޞާދީ ކޮމެޓީ ގުޅިގެން އުފައްދާފައިވާ ޖޮއިންޓް ކޮމެޓީއަކުންނެވެ.
ބަޖެޓުގެ ބަހުސަށްފަހު، ކޮމެޓީ މަރުހަލާގެ މަސައްކަތް ނިންމައި މަޖިލީހުން ބަޖެޓު ފާސް ކުރުމަށް އަމާޒު ހިފާފައިވަނީ މިމަހުގެ 30 ވަނަ ދުވަހަށެވެ.
އަންނަ އަހަރަށް ލަފާކުރާ ބަޖެޓު މަޖިލީހަށް ހުށަހަޅުއްވަމުން ފިނޭންސް މިނިސްޓަރ ވިދާޅުވީ އެންމެ ބޮޑު އަމާޒަކީ ހައްލުނުވެ ހުރި އަސާސީ މައްސަލަތައް ހައްލު ކުރުމާއި ރާއްޖޭގެ އިޤްތިޞާދަށް ދިމާވި ބޮޑެތި މައްސަލަތައް ހައްލުކުރުމުގެ މަސައްކަތް ކުރުން ކަމަށެވެ.
