ކަނޑަށް ގެއްލުނު މީހާ އަދިވެސް ނުފެނޭ
ގދ.ފަރެސްމާތޮޑާއިން ފުރައިގެން ހަތަރު މީހުންނާ އެކު އައްޑޫއަށް ދަތުރުކުރަމުން ދަނިކޮށް ދިޔަވެ، ބަންޑުން ޖަހާލި ލޭންޑިންގކްރާފްޓުން ގެއްލުނު ބިދޭސީ ފަޅުވެރިޔާ ހޯދުމަށް ބޮޑު ސަރަހައްދެއް ބަލައިފިއެވެ.
އެމްއެންޑީއެފުން ވިދާޅުވީ ގދ. ފަރެސްމާތޮޑާއިން ފުރައިގެން ހަތަރު މީހުންނާ އެކު އައްޑޫއަށް ދަތުރުކުރަމުން ދަނިކޮށް ދިޔަވެ، ބަންޑުން ޖަހާލި ލޭންޑިންގކްރާފްޓުން ގެއްލުނު ފަޅުވެރިޔާ ހޯދުމަށް ކަނޑުމަގުންނާއި، ވައިގެމަގުން 5118 ސްކެއަރ ނޯޓިކަލް މޭލުގެ ސަރަހައްދެއް އެމްއެންޑީއެފް ސަދަން އޭރިއާ ކޯސްޓްގާޑު ފޯތު ސްކޮޑްރަންއިން ބަލައިފައިވާ ކަމަށެވެ.
އެގޮތުން ވައިގެ މަގުން ކޯސްޓްގާޑުގެ ސިފައިން ވަނީ 4854 ސްކެއަރ ނޯޓިކަލް މޭލުގެ ސަރަހައްދެއް ބަލާފައެވެ. އަދި ކޯސްޓްގާޑު ޝިޕް ޢާޒީއާއި އެމްއެންޑީއެފް ސަދަން އޭރިއާ ކޯސްޓްގާޑް ފޯތު ސްކޮޑްރަންގެ ސިފައިން ގުޅިގެން ވަނީ ކަނޑުމަގުން 264 ސްކެއަރ ނޯޓިކަލް މޭލުގެ ސަރަހައްދެއް ބަލާފައެވެ.
އެ މީހާ ހޯދުމަށް ކުރެވުނު މަސައްކަތުން އަދިވެސް އެ މީހާ ފެނިފައެއް ނުވާ ކަމަށް އެމްއެންޑީއެފުން މަޢުލޫމާތު ދެއްވިއެވެ.
