އަމާޒަކީ ޚިދުމަތް ދިނުމުގައި ދުވަހަކުވެސް ނުދާ ހިސާބަކަށް ކައުންސިލް ގެންދިއުން: މުޢިއްޒު
ސީޓީ ކައުންސިލްގެ އަމާޒަކީ ރައްޔިތުންނަށް ޚިދުމަތް ދިނުމުގައި މީގެ ކުރީގެ ކައުންސިލްތަކުން ނުދާ ހިސާބަކަށް ދިއުން ކަމަށް މާލެ ސިޓީގެ މޭޔަރު ޑރ. މުޙައްމަދު މުޢިއްޒު ވިދާޅުވެއްޖެއެވެ.
މާލެ ސިޓީ ކައުންސިލުގެ ފުރަތަމަ "ސްޓާފް ނައިޓް" ގައި ވާހަކަފުޅު ދައްކަވަމުން މޭޔަރު ވިދާޅުވީ މާލެ ސިޓީ ކައުންސިލުން ސްޓްރެޓެޖިކް އެކްޝަން ޕްލޭނެއް ފާސްކޮށްފައިވާއިރު އެ އަމާޒުތައް ހާސިލު ކުރުމުގައި ސިޓީ ކައުންސިލްގެ މުވައްޒަފުން ކުރާ މަސައްކަތްތައް ހިތުގެ އަޑިން ބަލައިގަންނަ ކަމަށެވެ.
މޭޔަރު ވިދާޅުވީ އުންމީދަކީ ކުރިއަށް އޮތްތަނުގައި ކައުންސިލްގެ އެންމެހާ މުވައްޒަފުން ގުޅިގެން މި އަމާޒަށް ވާސިލްވުމަށް މިހާރަށްވުރެ ގަދަޔަށް މަސައްކަތް ކުރައްވާނެ ކަމަށެވެ. މިއާއިއެކު މާލެ ސިޓީ ކައުންސިލްގެ ޓީމަކީ ރައްޔިތުންނަށް ޚިދުމަތް ކުރުމުގައި ބަދަހިކަމާއެކު މަސައްކަތް ކުރަމުންދާ ޓީމެއް ކަމަށް މޭޔަރު ފާހަގަކުރެއްވިއެވެ.
މޭޔަރު އިތުރަށް ވިދާޅުވީ ކައުންސިލްގެ އަމާޒަކީ ކައުންސިލް އެއްކޮށް ޑިޖިޓަލައިޒް ކުރުމާއިއެކު މާލެ ސިޓީ ގެ ރައްޔިތުންނަށް ޚިދުމަތް ދިނުމުގައި ރައްޔިތުންނާ ގާތަށް ދިއުމަށް މަތީ ހަރުފަތްތަކަަށް ދިއުންކަމަށެވެ. އަދި މިކަމަށްޓަކައި ކައުންސިލްގެ މުވައްޒަފުން ހީވާގި ކަމާއެކު މަސައްކަތް ކުރައްވާނެ ކަމަށް މޭޔަރު ވިދާޅުވިއެވެ.
