ފިޔޯރީ އަލިފާނުގެ ހާދިސާ: 5 ކްލާސްރޫމެއް ބޭނުން ނުކުރެވޭ ވަރަށް އަނދައިފި

ގދ. ފޮޔޯރީ ސްކޫލުގައި މިއަދު ހިނގި އަލިފާނުގެ ހާދިސާގައި 5 ކްލާސްރޫމެއް ބޭނުން ނުކުރެވޭ ވަރަށް އަނދައިފިއެވެ.

އެމްއެންޑީއެފުން ވިދާޅުވީ ގދ. ތިނަދޫ ފަޔަރ ސްޓޭޝަނުގެ ފަޔަރމަނުން 18:54 ގައި ގދ.ފިޔޯރީއަށް ގޮސްފައިވާ ކަމަށެވެ. އަދި އަލިފާން ރޯވެފައިވަނީ ފިޔޯރީ ސްކޫލުގައި ހޯލެއްގެ ގޮތުގައި ބޭނުންކުރަމުން އަންނަ އިމާރާތެއްގައި ކަމަށާއި އެ ހޯލުގައި ޕާޓިޝަން ޖަހައިގެން، ކިޔަވައިދިނުމަށް 5 ވަރަކަށް ކުލާސް ހަދާފައިވާ ކަމަށް އެމްއެންޑީއެފުން ވިދާޅުވިއެވެ.

“ މި ކުލާސްރޫމުތައް ވަނީ ބޭނުން ނުކުރެވޭ ވަރަށް އަނދާފައި. އިމާރާތުގެ ފާރުން ބަޔަކާއި ފުރާޅުން ބައެއް ވެއްޓި އިމާރާތް ހުރީ ބަންދުވެފައި. ގދ.ތިނަދޫ ފަޔަރ ސްޓޭޝަނުގެ ފަޔަރމަނުން ގދ.ފިޔޯރީއަށް ދިޔައިރު އަލިފާން ހުރީ ކޮންޓްރޯލް ކުރެވިފައި” އެމްއެންޑީއެފުން ވިދާޅުވިއެވެ.

މީގެ އިތުރުން އަލިފާން ރޯވާން މެދުވެރިވި ސަބަބު އަދި ދެނެގަނެވިފައި ނުވި ނަމަވެސް އަލިފާން ރޯވެފައިވަނީ އެތާގައި ހުރި ކަރަންޓު ޑިސްޓްރިބިޔުޝަން ބޯޑެއްގައި ކަމަށް އެ ސްކޫލުން ބުނެފައިވާ ކަމަށް އެމްއެންޑީއެފުން ވިދާޅުވިއެވެ.