ދެން އެކުލަވާލާ ސަރުކާރުގައި އައްޑޫގެ ހިއްސާ ބޮޑުވާނެ: ރައީސް ޞާލިޙް
ރިޔާސީ އިންތިޚާބު ކާމިޔާބު ކުރެއްވުމަށްފަހު، ރައީސް އިބްރާހީމް މުޙައްމަދު ޞާލިޙް އެކުލަވާލާ ސަރުކާރެއްގައި އުފެދޭނީ އައްޑޫ ސިޓީގެ ބޮޑު ހިއްސާއަކާއެކުގައި ކަމަށް އެމަނިކުފާނު ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ، ރިޔާސީ ޕްރައިމަރީއަށް ކެމްޕެއިން ކުރެއްވުމަށް މިހާރު އައްޑުއަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު މަރަދު އަށް ވަޑައިގެން ކެމްޕެއިން ޖަގަހައެއް ހުޅުވައި ދެއްވުމަށްފަހު، މިއަދު ދެއްކެވި ވާހަކަފުޅުގައެވެ.
"އިރާދަ ކުރެއްވިއްޔާ 2023 ވަނަ އަހަރު ރިޔާސީ އިންތިހާބު ކާމިޔާބުކޮށް، އަޅުގަނޑުމެން އެކުލަވާލާ ސަރުކާރު ވެގެންދާނީ މި އައްޑޫ ސިޓީގެ ބޮޑު ހިއްސާ އެ ސަރުކާރުގައި އެކުލެވޭ ސަރުކާރަކަށ." ރައީސް ވިދާޅުވިއެވެ.
ރައޯސްގެ ވާހަކަފުޅުގައި ވިދާޅުވީ، މި އިންތިހާބުން ނިންމާ ނިންމުމެއްގެ ސަބަބުން ކުރިއަށް އޮތް ރިޔާސީ އިންތިހާބު އެމްޑީޕީ އަށް ކާމިޔާބު ކުރުމަށް އަސަރުތަކެއް ކުރާނެ ކަމަށާއި ފާއިތުވި ތަނުގައި ރިޔާސީ އިންތިހާބުތައް ކާމިޔާބު ކުރެވިފައި އޮތް ގޮތާއި މެދު ވިސްނާލަންޖެހޭ ކަމަށެވެ. އަދި ސަރުކާރަށް އާދެވޭނީ ކޯލިޝަނަކާ އެކުގައި ކަމަށް އެމަނިކުފާނު ވިދާޅުވާ ވިދާޅުވުން ތަކުރާރު ކުރެއްވިއެވެ.
ރައީސް ވިދާޅުވީ، އެމްޑީޕީއަކީ ބޮޑު ޕާޓީއެއް ކަމަށާއި ނަމަވެސް އެމްޑީޕީ އަށް އެކަނި ނިކުމެ އިންތިހާބު ކާމިޔާބު ކުރެވޭ ވަރަށް ނަމްބަރު އަދި ނެތް ކަމަށެވެ. އަދި ވެރިކަމަށް އާދެވެނީ އެހެން ޕާޓީތަކުގެ އެހީއާއެކު ކަމަށް ރައީސް ވިދާޅުވިއެވެ.
އޭގެ އިތުރުން އައްޑޫ ރައްޔިތުންނަކީ ވަރަށް ވިސްނުންތެރި ކަމާއެކު ސިޔާސީ ނިންމުން ނިންމާ ބައެއް ކަމަށާއި އެމްޑީޕީ ވެރިކަމުގައި ނެތި އައްޑޫގެ ތަރައްގީގެ މަސައްކަތް އަނެއްކާވެސް ހުއްޓޭނެ ކަމަށް ރައީސް ވިދާޅުވިއެވެ.
ރައީސް ޞާލިޙް މިހެން ވިދާޅުވެފައިވާއިރު، އަންނަ ރިޔާސީ އިންތިޚާބަށް އެމްޑީޕީގެ ޓިކެޓް ލިބިވަޑައިގެންފިނަމަ ނައިބަކަށް ހަމަޖައްސަވާނީ އައްޑޫ ޒުވާނެއް ކަމަށް، ރައީސް ޞާލިޙްގެ ވާދަވެރި ކެނޑިޑޭޓް ރައީސް ނަޝީދު ވަނީ ދާދިފަހުން ވިދާޅުވެފައެވެ.
ޑޮނ ބެލިވެ