ވައުދެއް ވެއްޖެނަމަ އެކަމެއް ދޫކޮށްނުލާނަން: ރައީސް ޞާލިޙް
ވައުދެއް ވެވަޑައިގެންފިނަމަ އެކަމެއް ދޫކޮށް ނުލައްވާނެ ކަމަށް ރައީސް އިބްރާހިމް މުހައްމަދު ޞާލިޙް ވިދާޅުވެއްޖެއެވެ.
އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ހއ. ހޯރަފުއްޓަށް ވަޑައިގެން ވާހަކަ ދައްކަވަމުން ރައީސް އިބްރާހިމް މުހައްމަދު ޞާލިޙް ވިދާޅުވީ ބޮޑު އަޣުލަބިއްޔަތަކުން އަނެއްކާވެސް އެމްޑިޕީ މި ރާއްޖެއައިގެން ކުރިއަށްގެންދާ މަސައްކަތް ކާމިޔާބު ކުރައްވާނެ ކަމަށެވެ.
އަދި ތަރައްގީއަށްޓަކައި ކުރާ މަސައްކަތުގައި އެންމެ އިސްކަމެއް ދެނީ ވަކިވަކި ފަރުދުންނާ ގުޅުން ހުރި އަސާސީ މަސައްކަތްތައް ކަމަށް ވިދާޅުވިެއެވެ.
ހޯރަފުއްޓަކީ ވެސް ރައްޔިތުން އުންމީދުތަކެއް ކުރާ ރަށެއް ކަމަށާއި ނަމަވެސް އެ ވާހަކަތައް މީގެ ކުރިން ހުރީ ލިޔުމާއި ވާހަކައިގައި އެކަނި ކަމަށް ރައީސް ވިދާޅުވިއެވެ.
ހޯރަފުށީގައި މި ސަރުކާރުން ކުރިއަށްގެންދިޔަ ތަރައްގީގެ މަޝްރޫއުތައް ފާހަގަކުރައްވާ ރައީސް ޞާލިޙް ވިދާޅުވީ ހޯރަފުށީ އެއާޕޯޓް، ފުޓްބޯޅަ ދަނޑު، ގޮނޑުދޮށް ހިމާޔަތް ކުރުމާއި އައިސްޕްލާންޓް އެޅުން ފަދަ ތަރައްގީގެ މަސައްކަތްތައް ނިމިފައިވާ ކަމަށެވެ. ރައީސް ޞާލިޙް ވިދާޅުވީ މިސަރުކާރަކީ ވައުދެއް ވެއްޖެނަމަ އެކަން ދޫކޮށްނުލާނެ ބައެއް ނޫން ކަމަށެވެ.
"ޔަގީން ކުރައްވައްޗޭ، އަޅުގަނޑުމެންނަކީ ވައުދެއް ވެފައި، އެކަން ދޫކޮށްލާނެ ބައެއް ނޫން. މިއަދު އެވަނީ ހޮސްޕިޓަލް ޓެންޑާކޮށް ފައިނަލް މަރުހަލާގައި." ރައީސް ޞާލިޙް ވިދާޅުވިއެވެ.
އެމްޑީޕީގެ ރިޔާސީ ޕްރައިމަރީގެ ވޯޓުލުން ކުރިއަށް ގެންދިއުމަށް ހަމަޖެހިފައިވަނީ ޖެނުއަރީ 28 ވަނަ ދުވަހުއެވެ.
