ލާމު އަތޮޅުން ރައީސަށް ބޮޑު ތަރުޙީބެއް؛ ވިދާޅުވީ ޕްރައިމަރީ ކާމިޔާބު ކުރައްވާނީ ބޮޑު ތަފާތަކުން ކަމަށް
މިމަހު ފަހު ކޮޅު އޮންނަ އެމްޑީޕީގެ ރިޔާސީ ޕްރައިމަރީ ކާމިޔާބު ކުރައްވާނީ ތަފާތު ބޮޑު ނަތީޖާއަކުން ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ، މިރޭ ލ. ކައްދޫގައ ބޭއްވި ޖަލްސާއެއްގައި ދެއްކެވި ވާހަކަފުޅުގައެވެ. ލާމު އަތޮޅަށް ރައީސް ޞާލިޙް ވަޑައިގަތުމުން އެރަށުން ވަނީ ހޫނު މަރުޙަބާއެއް ކިޔާފައެވެ. ރައީސް ހައްދުންމައްޗަށް ވަޑައިގެންނެވީ ބޮޑުތިލަދުންމައްޗަށް ކުރެއްވި ކެމްޕެއިން ދަތުފުޅަށް ފަހުގައެވެ.
"މި ޕްރައިމަރީ ތަފާތު ބޮޑުކޮށް ކާމިޔާބުކޮށް ކުރިއަށް މިއޮތް ރިޔާސީ އިންތިހާބު ތި ބޭފުޅުންނަށް ކާމިޔާބުކޮށްދެވޭނެ ކަމުގެ ޔަގީންކަން އަޅުގަނޑަށް މިހާރު އެބައޮތް،" ކައްދުއަށް ރައީސް ޞާލިޙް ވަޑައިގެންނެވި ތަނަށް ޖަމާވެފައި ތިބި މީހުންނާ ވާހަކަފުޅު ދައްކަވަމުން ރައީސް ޞާލިޙް ވިދާޅުވިއެވެ.
ރައީސް ޞާލިޙްގެ ވާހަކަފުޅުގައި ވިދާޅުވީ، ރިޔާސީ އިންތިހާބު ކާމިޔާބު ކުރުމަށް ވަކި ފަރާތަކަށް ނުޖެހި ތިބި ފަރާތްތަކާއި އެހެން ޕާޓީތަކުގެ މީހުންގެ ވޯޓު ބޭނުންވާ ކަމަށެވެ. އަދި އެކަން ކުރެވޭނެ ފަރާތަކީ އެމަނިކުފާނު ކަމަށާއި، ޕްރައިމަރީ އަށް ކުރިމަތިލެއްވީ އެމްޑީޕީ މަގުމަތި ވާން ނޭދޭތީ އާއި އެނބުރި އަނިޔާވެރިކަމުގެ ތެރެއަށް ރައްޔިތުން ގެންދަން ބޭނުން ނުވާތީ ކަމަށެވެ.
ރައީސް ޞާލިޙްގެ ވާހަަކަފުޅުގައި ލާމު އަތޮޅުގައި އިޤްތިޞާދީ މަސައްކަތްތައް ކުރިއެރުވޭވެ ގޮތަކާއި ގުޅޭ ގޮތުން ވާހަކަފުޅު ދެއްކެވިއެވެ. މިގޮތުން ވިދާޅުވީ، ލާމު އަތޮޅުގެ މުސްތަގުބަލަށް ބޭނުންވަނީ އެއާޕޯޓާއި ރަނގަޅު ބަނދަރެއް ކަމަށެވެ. އަދި ކައްދޫ އެއާޕޯޓު ރަނގަޅު ފެންވަރަކަށް ތައްޔާރު ކުރާތަން ލަސްތަކެއް ނުވެ ފެނިގެންދާނެ ކަމަށް ވިދާޅުވިއެވެ. ކައްދޫ އެއަރޕޯޓްގެ މަޝްރޫއު ކްރޮސްސަބްސިޓީ އުސޫލުން ކޮށްދޭނެ ފަރާތެއް ހޯދަން ދާދިފަހުން ވަނީ އިއުލާންކޮށްފައެވެ.
