ދަޢުލަތުގެ ފުދުންތެރިކަން ހުރި މިންވަރުން، ރަށްރަށުގައި ފުލުހުންގެ ޚިދުމަތް ޤާއިމު ކުރެވޭނެ: އިމްރާން
ރަށްރަށުގައި ފުލުހުންގެ ޚިދުމަތް ޤާއިމު ކުރަމުންދަނީ ދަޢުލަތުގެ މާލިއްޔަތުގެ ފުދުންތެރިކަން ހުރި މިންވަރުން ކަމަށް ހޯމް މިނިސްޓަރު އިމްރާން މިއަދު ވިދާޅުވެއްޖެއެެެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، މިލަންދޫ ދާއިރާގެ މެމްބަރު އަލީ ރިޒާ ވަނީ އެ ރަށުގެ ޕޮލިސް ސްޓޭޝަންގެ ޢަމަލީ މަސައްކަތް ފަށާނެ ތާރީޚަކާއި، ށ. ނަރުދޫގައި ފުލުހުންގެ ޚިދުމަތް ޤާއިމު ކުރެވޭނީ ކޮން އިރަކުންތޯ އައްސަވައިފައެވެ.
ރިޒާ ވަނީ ތިންހާހެއްހާ މީހުން ދިރިއުޅެމުން އަންނަ މިލަންދޫގައި ފުލުހުން މަދުވުމަކީ އެރަށުގެ ރައްޔިތުންގެ ބޮޑު ކަންބޮޑުވުމެއްކަން ފާހަގަކުރައްވައި، އެކަން ރަނގަޅު ކުރެވޭނީ ކޮން އިރަކުންތޯވެސް އައްސަވައިފައެވެ.
މި ސުވާލުތަކުގެ ޖަވާބުގައި، ޢަދާލަތު ޕާޓީގެ ރައީސްކަންވެސް ކުރައްވާ އިމްރާމް ވިދާޅުވީ ފުލުހުންގެ އަދަދު އިތުރު ކުރުމާއި، ހުރިހައި ރަށެއްގައިވެސް ފުލުހުންގެ ޕޯސްޓްތައް ޤާއިމު ކުރުމަކީ ސަރުކާރުން ބޭނުންވާ ކަމެއް ނަމަވެސް، އެކަން ކުރުމުގައި ގިނަ ކަންކަމަށް ބަލަން ޖެހޭ ކަމަށެވެ.
ފުލުހުންގެ އަދަދު އިތުރު ކުރުމަކީ ގިނަ ޚަރަދުތަކެއް ހިނގާ ކަމެއްކަން ފާހަގަކުރައްވައި، މިކަމުގައި ގޮންޖެހުންތައް ހުރިކަން މިނިސްޓަރު ފާހަގަކުރެއްވިއެވެ.
"ދަޢުލަތުގެ ނިޒާމުގެ ތެރެއިން، ކޮންމެ އަހަރަކުވެސް، ފުލުހުން އިތުރު ކުރުމަށް މި ކަނޑައަޅަނީ ވަކި މިންވަރެއް. ފުލުހުން ބޭނުންވާ އެކި ދިމަދިމާލަށް ފުލުހުން ފޮނުވުމަކީ ގޮންޖެހުންތައްވެސް ބޮޑު ކަމެއް."
އިމްރާން އިތުރަށް ވިދާޅުވީ ޕޮލިސް ޕޯސްޓްތައް ރަށްރަށުގައި ހުޅުވާއިރު، އެންމެ ބޮޑަށް އިސްކަން ދެނީ އެ ޚިދުމަތް އެންމެ ބޮޑަށް ބޭނުންވާ ސަރަހައްދުތަކަށް ކަމަށެވެ.
