ޤާސިމްގެ ކޯލިޝަން ދައުވަތަށް ކަންކުރާނެ ގޮތަކާމެދު އެމްޓީޑީން މަޝްވަރާ ކުރަނީ
2023ގެ ރިޔާސީ އިންތިހާބުގައި ޖުމްހޫރީ ޕާޓީގެ ފަރާތުން ވާދަކުރާ ރިޔާސީ ކެނޑިޑޭޓު ޤާސިމް އިބްރާހީމުގެ ކޯލިޝަންގައި ބައިވެރިވުމަށް މަސްވަރާކުރުމުގެ ދައުވަތައް ކަންކުރާނެ ގޮތަކާއިމެދު، ކުރީގެ ނައިބު ރައީސް އަހްމަދު އަދީބުގެ މޯލްޑިވްސް ތާޑް-ވޭ ޑިމޮކްރެޓްސް (އެމްޓީޑީ)އިން މަޝްވަރާ ކުރަން ނިންމައިފިއެވެ.
މިއަދު އެ ޕާޓީން ކުރި ޓްވީޓެއްގައި ވިދާޅުވީ، ޖޭޕީގެ ފަރާތުން ކޯލިޝަން ހެދުމާއިމެދު މަޝްވަރާ ކުރަން ސިޓީފުޅެއް ލިބިފައިވާ ކަމަށާއި، އެ ސިޓީއާމެދު ކަންތައް ކުރާނެ ގޮތަކާމެދު އެ ޕާޓީގެ ކައުންސިލުން މަޝްވަރާ ކުރަން ނިންމާފައިވާ ކަމަށެވެ.
ޤާސިމް އެމްޓީޑީއަށް ފޮނުވި ސިޓީގައި ބުނެފައިވަނީ 2023ގެ ރިޔާސީ އިންތިހާބު ކާމިޔާބު ކުރުމަށް ޖުމްހޫރީ ޕާޓީއިން މަތިކޮށްފައިވާ ޒިންމާއާއިގެން ކުރިޔަށް ދިޔުމަށް، ގިނަ ބައެއްގެ ބައިވެރިވުން އޮންނާނެ ގޮތެއްގެ މަތިން ޤައުމުގެ ކަންކަން އިސްލާހުގެ މަގަށް ގެނައުމަށް އެމްޓީޑީ އާއި އެކު ޤާސިމް އިބްރާހީމު މަސްވަރާކުރުމަށް ބޭނުންވާކަމަށެވެ.
މީގެ ކުރިން ސަރުކާރު ކޯލިޝަންގައި ހިމެނޭ އެމްއާރުއެމްއާއި، އެމްއެންޕީގެ އިތުރުން އިދިކޮޅު ޕީޕީއެމްއަށް ވެސް ޤާސިމް ވަނީ ކޯލިޝަން ދައުވަތު ދީފައެވެ. އަދި ރިޔާސީ އިންތިހާބުގައި ވާދަކުރާނެ ކަމަށް އިއުލާން ކުރައްވާފައިވާ ކުރީގެ ހޯމް މިނިސްޓަރު އުމަރު ނަސީރު އަދި ކުރީގެ ބަންޑާރަ ނައިބު ޑރ. މުހައްމަދު މުނައްވަރަށް ވެސް ޖޭޕީން ވަނީ ކޯލިޝަން ދައުވަތު ފޮނުވައިފައެވެ.
ރިޔާސީ އިންތިޚާބުގައި ދެން ވާދަކުރައްވާ، އެމްޑިޕީގެ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުހައްމަަދު ޞާލިޙްވަނީ ވަނީ އަދާލަތު ޕާޓީ އާއި އަހުމަދު ސިޔާމް މުހައްމަދުގެ އެމްޑީއޭއާއެކު ކޯލިޝަން ހައްދަވައިފައެވެ. ރައީސް ޞާލިޙްގެ ފަރާތުން އެމްއާރުއެމްއަށް ވެސް ވަނީ ކޯލިޝަން ދައުވަތު ހުށަހަޅާފައެވެ.
