ޖޭޕީ އާއެކު މަޝްވަރާ ކުރުމަށް އެމްޓީޑީގެ ޓީމެއް އެކުލަވައިލައިފި
2023ގެ ރިޔާސީ އިންތިޚާބުގައި ޖުމްހޫރީ ޕާޓީގެ ފަރާތުން ވާދަކުރާ ރިޔާސީ ކެންޑިޑޭޓު ޤާސިމް އިބްރާހީމުގެ ކޯލިޝަންގައި ބައިވެރިވުމަށް މަޝްވަރާކުރުމަށް ކުރީގެ ނައިބު ރައީސް އަޙްމަދު އަދީބުގެ މޯލްޑިވްސް ތާޑް-ވޭ ޑިމޮކްރެޓްސް (އެމްޓީޑީ) އަށް ދިން ދައުވަތާއި ގުޅިގެން އެޕާޓީއާއެކު މަޝްވަރާ ކުރުމަށް އެމްޓީޑީ އިން ޓީމެއް އެކުލަވައިލައިފިއެވެ.
އެމްޓީޑީ އިން އެކުލަވައިލި މި ޓީމުގައި ހިމެނެނީ އެ ޕާޓީގެ ސީނިއަރ ކައުންސިލް މެންބަރު އަބްދުލް ރަޝީދު ނާފިޒާއި އެ ޕާޓީގެ ސެކްރެޓަރީ ޖެނެރަލް އަޙްމަދު އަޝްރަފް (ޝުމްބާ)ގެ އިތުރުން އެ ޕާޓީގެ ލީގަލް އެޑްވައިޒަރު މުޙައްމަދު ހަލީމް (ހަލީމްބައި) އެވެ.
އެމްޓީޑީ އަށް ޖޭޕީން ފޮނުވި ސިޓީގައި ބުނެފައިވަނީ 2023ގެ ރިޔާސީ އިންތިހާބު ކާމިޔާބު ކުރުމަށް ޖުމްހޫރީ ޕާޓީއިން މަތިކޮށްފައިވާ ޒިންމާއާއިގެން ކުރިޔަށް ދިޔުމަށް، ގިނަ ބައެއްގެ ބައިވެރިވުން އޮންނާނެ ގޮތެއްގެ މަތިން ޤައުމުގެ ކަންކަން އިސްލާޙުގެ މަގަށް ގެނައުމަށް އެމްޓީޑީ އާއި އެކު ޤާސިމް އިބްރާހީމު މަޝްވަރާކުރުމަށް ބޭނުންވާކަމަށެވެ.
އެ ޕާޓީއާއެކު މަޝްވަރާ ކުރުމަށް އެމްޓީޑީއިން ޓީމެއް އެކުލަވައިލި ނަމަވެސް މަޝްވަރާތައް ފަށާނެ ތާރީޚެއް އަދި އިޢުލާނުކޮށްފައެއް ނުވެއެވެ.
Ads by STO
