ޑްރަގް މައްސަލައެއްގައި މީހަކު ހައްޔަރުކުރަން އުޅުނު 6 ފުލުހަކު ކޮވިޑަށް ފައްސިވެއްޖެ
ޑްރަގާ ގުޅުން ހުރި މައްސަލައެއްގައި މީހަކު ހައްޔަރުކުރަން އުޅުނު ހަ ފުލުހަކު ކޮވިޑް-19 އަށް ޕޮޒިޓިވް ވެއްޖެ އެވެ.
މިކަން ހާމަކުރައްވަމުން ރޭ ، ރާއްޖެ ޓީވީގެ "ފަލަ ސުރުހީ" ޕްރޮގްރާމުގައި ހޯމް މިނިސްޓަރ ޝައިޚް އިމްރާން ވިދާޅުވީ އެންމެ މީހަކު ހައްޔަރުކުރަން މިދިޔަ ހަފުތާގައި ހަރަކާތްތެރިވި ހަ ފުލުހަކު ކޮވިޑަށް ފައްސިވި ކަމަށާއި އެފަދަ ކަންކަމާ ހެދި މި އަހަރު ހޭދަކުރަމުން ދަނީ ދަތި އަދި އުނދަގޫ މަރުހަލާއެއް ކަމަށެވެ.
ހަ ފުލުހަކު ފައްސިވި ނަމަވެސް، އެ މައްސަލައިގައި ހައްޔަރުކުރި މީހާއަށް ކޮވިޑް ޖެހިފައިވާކަން ނުވަތަ ނޫން ކަން އިމްރާން ވިދާޅެއްނުވެ އެވެ.
އިމްރާން ރޭ ވިދާޅުވީ ކޮވިޑް-19 އަށް ފައްސިވާ މީހުން ގިނަވާތީ ފުލުހުންގެ މުއައްސަސާ އިސްލާހުކޮށް ރައްޔިތުންގެ އިތުބާރު ހޯދަން ކުރަމުން އަންނަ މަސައްކަތަށް، މަޑުޖެހުމެއް އައިސްފައިވާ ކަމަށް ގަބޫލުކުރައްވާ ކަމަށެވެ.
ޕޮލިސް ކޮމިޝަނަރު މުހައްމަދު ހަމީދު މީގެ ކުރިން ވިދާޅުވި ގޮތުގައި ފުލުހުންގެ އިދާރާގައި މަސައްކަތް ކުރާ 93 މީހަކު މިހާތަނަށް ކޮވިޑަށް ފައްސިވެފައިވާ ކަމަށެވެ.
