ކްރިކަށް ކޮށްފައިވާ ދަޢުވާތައް އަނބުރާ ގެންދިއުމަށް ޕީޖީން ނިންމައިފި
އެމްއެމްޕީއާރްސީ މެދުވެރިކޮށް ރ. ފުއްގިރި ޓޫރިޒަމް ބޭނުމަށް ދޫކުރުމުގެ މުޢާމަލާތުގައި ރިޝްވަތު ހިފައި މަނީ ލޯންޑަރކުރި މައްސަލައިގައި ދަޢުވާލިބޭ, މއ.ކުރިކީލަހިޔާ, އަޙްމަދު ކްރިކް ރިޟާގެ މައްޗަށް ކުރި ދައުވާ ފަހުން ކޯޓަށް ހުށައެޅުމަށް، މިވަގުތަށް ދައުވާ އަނބުރާ ގެންދިއުމަށް ޕްރޮސެކިއުޓަރ ޖެނެރަލް އޮފީހުން ނިންމައިފިއެވެ.
ޕީޖީ އޮފީހުން ނެރުނު ބަޔާނެއްގައި ބުނެފައިވަނީ، ކުރިކު ރިޒާ ހުށަހެޅި މެޑިކަލް ޑޮކިއުމެންޓުތަކަކާ ގުޅިގެން އެ މައްސަލަ ކޯޓުގެ ތާވާލަ އެއްގޮތަށް ކުރިއަށް ގެންދެވިފައިނުވާކަމަށެވެ. އަދި ރިޒާގެ ފަރާތުން ހުށަހެޅި ދިފާއީ ހެކިތަކުގެ ސައްހަކަން ކަށަވަރުކުރުމަށް ފުލުހުން ދަނީ އިތުރަށް ބަލަންޖެހޭ ބެލުންތައް ބަލަމުން ކަމަށެވެ.
އަދި ކުރިކްގެ ބައިގައި ދިމާވި މި ޙާލަތާ ގުޅިގެން އެބައި ވަކިން ކޯޓުގައި ކުރިއަށްގެންދެވޭނެ ގޮތެއް އޮތްތޯ ބެލިއިރު އެ މަގު ޤާނޫނީ ގޮތުން އޮތީ ބަންދުވެފައި ކަމަށާއި މި މައްސަލައަކީ އާންމު މަސްލަހަތު މަތީ މިންވަރަކަށް އެކުލެވޭ މައްސަލައަކަށްވާތީ މައްސަލައިގައި ދައުވާ ލިބޭ އެކެއްގެ ބައިގައި ދިމާވި ހާލަތަކާ ކޯޓުގެ ތާވަލާ އެއްގޮތަށް މައްސަލަ ކުރިއަށް ނުގެންދެވި ވުމަކީ އާންމު މަސްލަހަތު އޮތްގޮތް ކަމުގައި ނުފެންނާތީ ރިޒާގެ މައްސަލަ މިވަގުތަށް އަނބުރާ ގެންނަނީކަމަށް ޕީޖީން ބުނެފައިވެއެވެ.
ފުއްގިރި މައްސަލައިގައި މިދިޔަ މަހުގެ 19 ވަނަ ދުވަހާއި 20 ވަނަ ދުވަހާއި އަދި މިމަހުގެ ދެވަނަ ދުވަހާއި ހަތަރުވަނަ ދުވަހު ބާއްވަން ހަމަޖެއްސި ޝަރީއަތްވެސް ކެންސަލް ކުރީ ކްރިކް ރިޒާގެ ސިއްހީ ހާލަތު ހުރި ގޮތުންނެވެ.
