ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރުގެ ފުރަތަމަ ޖަލްސާ ހޯމަ ދުވަހަށް ތާވަލުކޮށްފި
ބޮޑު ޗުއްޓީއަށްފަހު ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރުގެ ފުރަތަމަ ޖަލްސާ ހޯމަ ދުވަހުގެ ހެނދުނު 9:00 ގައި ބާއްވާގޮތަށް ތާވަލުކޮށްފިއެވެ.
2023 ވަނަ އަހަރުގެ ދެވަނަ ދައުރުގެ ޖަލްސާތައް 22 ޖޫން 2023 ވީ ބުރާސްފަތި ދުވަހު ނިންމާލާފައިވަނީ، މަޖިލީހުގައި މަސައްކަތްތައް ނުނިމި ހުރުމާއެކު ދައުރު ދިގުދަންމާލުމަށް މެމްބަރުން އެދިވަޑައިގަންނަވަމުން ދަނިކޮށެވެ. މަޖިލީހުގެ ފަހު ޖަލްސާގައިވެސް މެމްބަރުން ވަނީ ކުރަން ހުރި މަސައްކަތްތައް ނުނިންމައި ޗުއްޓީއަށް ދާތީ އެކަމުގެ ކަންބޮޑުވުން ފާޅުކުރައްވާފައެވެ.
މަޖިލީހުން އެންމެ ފަހުން ބޭއްވި ޖަލްސާ ކުއްލިގޮތަކަށް ނިންމާލާފައިވާއިރު، އެމްޑީޕީގެ ޕީޖީ ގްރޫޕުން ވަނީ މަޖިލީހުގެ މަސައްކަތްތައް ނިންމުމަށް އެދި ރައީސް ނަޝީދަށް ސިޓީއެއްވެސް ހުށަހަޅާފައެވެ. އެހެން އަހަރުތަކުގައި ދައުރު ނިންމާލާއިރު މަޖިލީހުގެ މަސައްކަތްތައް ދިޔަ ގޮތާމެދު މަޖިލީހުގެ ރައީސް ވާހަކަފުޅުދައްކަވާއިރު ނިމުނު މުހިންމު މަސައްކަތްތަކަށް އަލިއަޅުއްވާލައްވައެވެ.
މެމްބަރުންގެ ކަންބޮޑުވުންތައް ފާޅުކުރައްވައި މަޖިލީހުގެ ތިން ބައިކުޅަ އެއް ބައި މެމްބަރުންގެ ސޮޔާއެކު، ދައުރުން ބޭރުން މަޖިލީހުގެ ޖަލްސާތަކެއް ބާއްވާދިނުމަށް އެދި ސިޓީއެއް ހުށަހެޅުއްވުމާއި ގުޅިގެން ދައުރުން ބޭރުން ދެ ޖަލްސާއެއް ތާވަލުކުރެވިގެން ދިޔައެވެ. އެގޮތުން، ފުރަތަމަ ޖަލްސާ ކުރިއަށް ގެންގޮސްފައިވަނީ 03 ޖުލައި 2023 ވީ ހޯމަ ދުވަހުގެ ހެނދުނެވެ. އަދި އެ ޖަލްސާ ވަނީ 3 މިނެޓުގެ ތެރޭގައި ނިންމާލާފައެވެ.
ދައުރުން ބޭރުން ބޭއްވި ދެވަނަ ޖަލްސާ 10 ޖުލައި ވާ ހޯމަ ދުވަހު ކުރިއަށް ގެންގޮސް، ކޮމިޓީތައް އެކުލަވާލާނެ ގޮތާއި ގުޅޭ ރިޕޯޓު ފާސްކޮށްފައިވާއިރު، މި ދެ ޖަލްސާގެ ރިޔާސަތު ބަލަހައްޓަވާފައިވަނީ މެންބަރު ޙަސަން އަފީފެވެ.
ރައްޔިތުންގެ މަޖިލީހުގައި ނުނިމި ހުރި މަސައްކަތްތަކުގެ ތެރޭގައި، މަޖިލީހުގެ ކޮމިޓީތައް އެކުލަވާލުމުގެ މަސައްކަތާއި މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ ހިމެނެއެވެ. އަދި ބަންޑާރަނައިބު އިބްރާހީމް ރިފްއަތާއި ފޮރިން މިނިސްޓަރ އަބްދުﷲ ޝާހިދުގެ އިތުބާރު ނެތްކަމުގެ މައްސަލަވެސް، ނުނިމި ހުރި މަސައްކަތްތަކުގެ ތެރޭގައި ހިމެނެއެވެ.
Ads by STO
