ސުނާމީގައި ބޯހިޔާވަހިކަން ގެއްލުނު މީހުންނަށް އެކަން ހައްލު ކޮށްދެއްވީ، މުއިއްޒުގެ ވަޒީރުކަމުގައި، 100 ދުވަސް ތެރޭގައި
2004 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު، ދެކުނު އޭޝިއާ ސަރަހައްދަށް އައި ބާރުގަދަ ސުނާމީގައި ރާއްޖެއަށް ލިބުނު ގެއްލުންތަކުގެ ތެރެއިން، ގެދޮރު ގެއްލިގެން ދިޔަ މީހުންނަށް، ރައީސް ޔާމީންގެ ވެރިކަމުގައި 100 ދުވަހުގެ ތެރޭގައި ބޯހިޔާވަހިކަން ފޯރުކޮށްދީ ނިންމައިލައިފައިވާ ކަމަށް އެމަނިކުފާނުގެ ވެރިކަމުގައި އިސްލާމިކް މިނިސްޓަރަކަށް ހުންނެވި ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޑރ ޝަހީމު މިފަދައިން ވިދާޅުވެފައިވަނީ ގއ ވިލިގިލީގައި، އިދިކޮޅުން ބޭއްވި، އެ ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒުގެ ކެމްޕޭން ޖަލްސާގައި ވާހަކަދައްކަވަމުންނެވެ.
ޑރ ޝަހީމު ވިދާޅުވީ ގއ އަތޮޅަކީ ސުނާމީގެ އަސަރު ވަރަށް ބޮޑަށް ކުރި އަތޮޅެއް ކަމަށާއި، ކާރިސާއަށްފަހު ހާލުގައި ޖެހުނު މީހުންތަކެއް އުޅެމުން އައިސްފައިވާ އަތޮޅެއްކަމަށެވެ.
ރައީސް ޔާމީން ވެރިކަމާއި ހަވާލުވެވަޑައިގަތީ ސުނާމީ ކާރިސާއަށް 10 އަހަރުވެގައިވަނިކޮށް ނަމަވެސް އޭރު ވެސް ދާއިމީ ބޯހިޔާވަހިކަން ނުލިބޭ ފަރާތްތައް ރާއްޖޭގެ އެކި ކަންކޮޅުތަކުގައި އުޅެމުން ދިޔަކަން ޑރޝަހީމު ފާހަގަކުރެއްވިއެވެ. އެގޮތުން ގއ.އަތޮޅުގައި ވެސް ބޯހިޔާވަހިކަން ނުލިބޭ މީހުން އުޅެމުންދިޔަ ކަމަށް ވިދާޅުވިއެވެ.
ރައީސް ޔާމީން އެންމެ ފުރަތަމަ ބޭއްވެވި ކެބިނެޓް ބައްދަލުވުމުގައި، 100 ދުވަހުގެ ތެރޭގައި، ބޯހިޔާވަހިކަމުގެ މައްސަލަ ހައްލު ކުރަން، އޭރުގެ ހައުސިން މިނިސްޓަރު މުއިއްޒުއަށް އެންގެވުމުން، އެ މުއްދަތުގެ ތެރޭގައި ހައްލު ކުރެއްވިކަން ވެސް ޝަހީމް ފާހަގަހަގަކުރެއްވިއެވެ.
"ސުނާމީގައި ހާލުގައި ޖެހުނު މީހުންގެ ގެދޮރުގެ މައްސަލަ، ވަރަށް ބޮޑަށް ލަސްވެފައި އޮތްކަމެއް އެއީ. 10 ވަރަކަށް އަހަރު ލަސްވެފައި އޮތްކަމެއް އެއީ. ޑރ މުއިއްޒަށް ރައީސް އެންގެވީ 100 ދުވަސްތެރޭ މިކަން ހައްލުކުރަން ޖެހޭނެއޭ."
ރައީސް ޔާމީންގެ ވެރިކަމުގައި ކުރިއަށް ދިޔަ އެންމެ ބޮޑު އެއް މަޝްރޫޢުކަމުގައިވާ "ސިނަމާލެ" ބްރިޖްގެ މަޝްރޫޢު ވެސް ކުރިއަށް ގެންދެވުމުގައި، ވަޒީރެއްގެ ހައިސިއްޔަތުން، މުޢިއްޒުގެ ދައުރު ވެސް ބޮޑެވެ.
Ads by STO
