ނައިފަރާއި ހިންނަވަރު ބްރިޖަކުން ގުޅައިލަން ޤާސިމްގެ ވަޢުދެއް
ޅ. ނައިފަރާއި އެ އަތޮޅު ހިންނަވަރު ބްރިޖަކުން ގުޅުވައިލުމަށް ޖުމްހޫރީ ޕާޓީގެ ރިޔާސީ ކެންޑިޑޭޓް، އަދި މަޖިލީހުގެ މާމިގިލި ދާއިރާގެ މެމްބަރު، ޤާސިމް އިބްރާހީމް ވައުދުވެވަޑައިގެންފިއެވެ.
އަތޮޅަށް ކުރެއްވި ދަތުރުގައި މަޑިވަރު އެއާޕޯޓުގައި އިންނަވައި ޤާސިމް ވިދާޅުވީ ކުރިއަށް އޮތް ރިޔާސީ އިންތިޚާބުގައި ދިވެހި ރައްޔިތުން އެމަނިކުފާނަށް ވެރިކަމަށް އިންތިހާބުކޮށްދެއްވައިފިނަމަ ޅ. ހިންނަވަރާއި، އަދި ނައިފަރާއި ދެމެދުގައި ހުރި ފަޅުތައް ބުރިޖަކުން ގުޅާލާ، ނައިފަރާއި، މަޑިވަރާއި، ހިންނަވަރު ބޮޑު ސިޓީ އަކަށް ހަދާނެ ކަމަށެވެ.
ޤާސިމް ވިދާޅުވީ އޭނާ ވެރިކަމަށް ހޮވިވަޑައިގެންފި ނަމަ, ނައިފަރާއި ހިންނަވަރާ ދެމެދު އޮތް މަޑިވަރާއި ފެލިވަރުގެ އިތުރުން ގޭރިފަރު ހިމެނޭހެން ބްރިޖަކުން ގުޅާލާނެ ކަމަށެވެ.
އަދި އެ ރަށްތަށް ގުޅާލުމުން އެސަރަހައްދަށް އިގްތިސޯދީ ގޮތުން ކުރިއެރުންތައް އަންނާނެ ކަމަށް ގާސިމް ވިދާޅުވިއެވެ.
އަދި އެރަށްތައް ގުޅާލުމުން އާބަން ސިޓީއެއްގެ ގޮތުގައި އެސަރަހައްދު ތަރައްގީ ކުރެވޭނެ ކަމަށް ވެސް ޤާސިމް ވިދާޅުވިއެވެ.
