ޑޮކްޓަރުން ދިން ފެއާވެލް ޕާޓީއަކާއެކު، ޔޫން ހޮސްޕިޓަލުން ދޫކޮށްލައިފި

މިއަދަކީ ފިލްމީތަރި މުޙައްމަދު ޔުނާން އާއި އޭނާގެ އަނބިމީހާ ފާތިމަތު ރިހްލާ (ރިހޫ) ގެ އިތުރުން، އެމީހުންގެ ތުއްތު ދަރިފުޅު ޔޫން މުޙައްމަދު ޔުނާން ދެކެ ލޯބިވާ އަދި ޔޫންއަށް ހެޔޮއެދޭ އެންމެހާ ފަރާތްތަކަށް ވަރަށް އުފާވެރި ދުވަހެކެވެ.

Ads by MWSC

ހިތުގެ ބޮޑު އޮޕަރޭޝަނެއް ކުރުމަށް ބޭސް ފަރުވާއަށް އިންޑިއާ އަށް ގޮސް ލިސީ ހޮސްޕިޓަލުގައި 25 ދުވަސް ހޭދަ ކުރުމަށް، މިއަދު ޔޫން ވަނީ އެހޮސްޕިޓަލުން ޑިސްޗާޖް ކޮށްފައެވެ.
އުމުރުން ނުވަ މަހުގެ ޔޫން އަކީ ما شاء الله‌‎ ވަރަށް ގިނަ މީހުންގެ ލޯބި ލިބިފައިވާ ކުއްޖެކެވެ. އެލިސްޓުގެ އެންމެ ކުރީގައި ޔޫން އަށް ފަރުވާދިނުމަށް ހަރަކާތްތެރިވި ޑޮކްޓަރުން ވެސް ހިމެނެއެވެ.

މިއަދު ޔޫން އެމީހުންނާއި ވަގުތީގޮތުން ވަކިވާއިރު، އެހޮސްޕިޓަލުގެ ޑިރެކްޓަރާއި ޑޮކްޓަރުންގެ ފަރާތުން ޔޫން އަށް ވަނީ ސަޕްރައިޒް ފެއާވެލް ޕާޓީއެއް ވެސް ބާއްވައިދީފައެވެ.

"ދެން" އަށް މައުލޫމާތު ދެމުން ރިހޫ ބުނީ، ޑިސްޗާޖް ކުރުމުގެ ކުރިން މިއަދު އެކޯއެއް ހަދާފައިވާ ކަމަށާއި ހުރިހާ ކަމެއް ވެސް ރަނގަޅު ކަމަށް ޑޮކްޓަރުން ބުނި  ކަމަށެވެ.

އުފަންވިއިރު ވެސް ހިތުގެ މައްސަލަތަކެއް ހުރި ޔޫންގެ، އަށް ގަޑިއިރުގެ އޮޕަރޭޝަނެއް ކުރީ މިމަހުގެ 14 ވަނަ ދުވަހުގައެވެ. މާތް ﷲ ގެ އިރާދަފުޅާއެކު އެއޮޕަރޭޝަން ކާމިޔާބު ވިއެވެ. ނަމަވެސް އޮބްޒަވޭޝަނަށް ތިން ދުވަސް ވަންދެން އެންއައިސީޔޫ ގައި ބޭއްވިއެވެ.

"މިއަދު ހޮސްޕިޓަލުން ޑިސްޗާޖް ކުރީ. ދެން ފުރަން ވަންދެން ތިބޭނީ ހޮޓަލެއްގައި. އާސަންދައިން ބުނީ އަންގާރަ ދުވަހު އެބައިނޭ ފްލައިޓެއް އެކަމަކު އަދި ޔަގީންކަމެއް ނުދޭ. ލިސްޓުގައި ނަން ނޯޓު ކޮށްފައި އިންކަމަށް މައުލޫމާތު ދިން" ކޮޗީގައި މިވަގުތުހުރި ރިހޫ ބުންޏެވެ.

ޔޫންގެ އޮޕަރޭޝަން ކާމިޔާބުވި ކަމުގައި ވިޔަސް އަދި ފޮލޯއަޕަށް އަނެއްކާވެސް ވަރަށް އަވަހަށް އިންޑިއާއަށް ދާން ޖެހެއެވެ.

"ޑޮކްޓަރުން ބުނީ ރާއްޖޭގައި ހޭދަކުރަން ޖެހޭ 14 ދުވަހުގެ ހޯމް ކަރަންޓީނުގެ މުއްދަތަށްފަހު ފޮލޯއަޕަށް އަނެއްކާވެސް ގެންނަން. ދަރިފުޅުގެ ފޮލޯއަޕް ދެން ހަދާނީ ޑރ. އެލީނާ. އޭގެ އެއް އަހަރު ފަހުން ފޮލޯއަޕަކަށް އަނެއްކާވެސް އަންނަން ޖެހޭ. އެ ފޮލޯއަޕް ހަދާނީ ޑރ. ސުނީލް" ރިހޫ ބުންޏެވެ.

ޔޫން އަށް ފަރުވާ ލިބުމުގައި މިފަހަރު ވަރަށް ގިނަ ގޮންޖެހުންތަކަކާއި ކުރިމަތިވިއެވެ. އެތަކެއް ދަތިތަކަކާއި ކުރިމަތިވުމަށްފަހު، އެތުއްތު ދަރިފުޅަށް ބޭސް ކުރަން އިންޑިއާ އާއި ހަމައަށް ދެވުނީ އެތައް ބައެއްގެ އެހީތެރިކަމާއެކުގައެވެ.

"މިފުރުސަތުގައި، މިހާތަނަށް ޔޫން އަށް އެކި ގޮތްގޮތުން އެހީތެރިވި ހުރިހާ ފަރާތްތަކަށް ވަރަށް ބޮޑަށް ޝުކުރު އަދާ ކުރަން. ސޯޝަލް މީޑިއާ ގެ ޕޭޖުތަކަށާއި، މީޑިއާ ތަކަށް ވެސް ވަރަށް ބޮޑަށް ޝުކުރު އަދާކުރަން ޔޫންގެ ޕޯސްޓުތައް ހިއްސާ ކޮށްލަދީ، ޚަބަރުތައް ގެނެސްދިނީތީ. މީގެ އިތުރުން މިނިސްޓަރ މަޙްލޫފް އަދި އޭނަގެ އަނބިކަނބަލުން ނަޒޫ އަށް ވަރަށް ބޮޑަށް ޝުކުރު އަދާ ކުރަން. ޚާއްސަ ޝުކުރެއް ވިޔަފާރިވެރިޔާ މަންޑޭ އަށާއި ޑރ. ސުނީލް އަދި ޑރ. އެލީނާ އަށްވެސް އަދާ ކުރަން" ރިހޫ ބުންޏެވެ.

ޔޫން އާއި ބެހޭގޮތުން އިންޑިއާގެ މީޑިއާތަކުންނާއި ލިސީ ހޮސްޕިޓަލުގެ މީޑިއާއިން ވެސް ވަނީ އިންޓަވިއު ނަގާފައެވެ.

މީގެއިތުރުން އެހޮސްޕިޓަލުގެ ޑިރެކްޓަރ ފާދަރ ޕޯލް ކަރޭދަން މިއަދު ވަނީ ޔޫން އަށް އިންޑިއާގެ ސަގާފީ ހެދުމެއް ވެސް ހަދިޔާ ކޮށްފައެވެ. އެހެދުމަށް އިންޑިއާ މީހުން ކިޔަނީ "އޮނަ ކޮޑި" އެވެ.