އިންޑިއާ ސިފައިން ބޭލުމުގެ މަސައްކަތް ފެށީ އަޅުގަނޑު, މާޒް ސަލީމްގެ ވާހަކައިން ހައިރާންކަން ލިބުނު: އުމަރު

އިންޑިއާ ސިފައިން ރާއްޖެއިން ބޭލުމުގެ މަސައްކަތް ފެށީ އެމަނިކުފާނު ކަމަށާއި އަހުމަދު ސަލީމް (މާޒް ސަލީމު)ގެ ވާހަކައިން ހައިރާންކަން ލިބުނު ކަމަށް ރިޔާސީ އިންތިޚާބުގައި އަމިއްލަ ގޮތުން ވާދަކުރެއްވި އުމަރު ނަސީރު ވިދާޅުވެއްޖެއެވެ.
ފޭސްބުކްގައި ހިއްސާ ކުރެއްވި ވީޑިއޯއެއްގައި އުމަރު ވިދާޅުވީ މާޒް ސަލީމް އެމްޑީޕީގެ ޕޯޑިއަމަކުން ފެނިގެން ދިޔުމަކީ ވަރަށް ހައިރާން ކުރުވި ކަމެއް ކަމަށެވެ. އަދި އެންމެ ބޮޑަށް ހައިރާންވީ އިންޑިއާ ސިފައިން ރާއްޖޭގައި ނެތް ކަމަށް ދޭހަވާ ގޮތަށް ވާހަކަދެއްކުމުން ކަމަށް އުމަރު ވިދާޅުވިއެވެ.
"ޚުދު ސަލީމަކީ އަޅުގަނޑާއެކު މަގުމަތީގައި ޕިކަޕުތަކަށް އަރައިގެން އަޑުގަދަކުރާއިން އިންޑިއާ ސިފައިން ބާލަން ގޮވަމުން ދިޔަ މީހެއް. މިއަދު އެހން ޕޯޑިއަމަކަށް އަރާ އެހެން ގޮތަކަށް ވާިަކަ ދެއްކީމަ މުޅިން ހައިރާންވެއްޖެ" އުމަރު ވިދާޅުވިއެވެ.
އުމަރު ވިދާޅުވީ އިންޑިއާ ސިފައިން ރާއްޖޭގައި އެބަތިބި ކަމަށާއި އެމީހުން ރާއްޖެއިން ބާލަން ޖެހޭ ކަމަށެވެ. އަދި އިންޑީއާ ސިފައިން ރާއްޖެއިން ބޭލުމުގެ މަސައްކަތަކީ އެމަނިކުފާނު ފެއްޓެވި މަސައްކަތެއް ކަމަށާއި އެ މަސައްކަތުގައި އަބަދުވެސް ދެމި ހުންނާނެ ކަމަށް އުމަރު ވިދާޅުވިއެވެ.
"ތިބޭފުޅުން ވެސް އެ މަސައްކަތުގައި ދެމި ތިއްބަވާތި. ރާއްޖޭގައި އިންޑިއާ ސިފައިން ތިބި ތިބުމަކީ ރާއްޖޭގެ މިނިވަންކަމަށް އޮތް ނުރައްކަލެއް. އެ ނުރައްކަލުން ރާއްޖެ ސަލާމްތަކުރަން ޖެހޭ" އުމަރު ވިދާޅުވިއެވެ.







ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.