އިންތިގާލީ ތަރުޖަމާނަކަށް ފިރުޒުލް ހަމަޖައްސައިފި
އިންތިހާބީ ރައީސް ޑރ. މުހައްމަދު މުއިއްޒުގެ އައު ސަރުކާރުގެ އިންތިގާލީ ތަރުޖަމާނުގެ މަޤާމަށް މުހައްމަދު ފިރުޒުލް އަބްދުﷲ ހަލީލް ހަމަޖައްސައިފި އެވެ.
ނިމިދިޔަ ރިޔާސީ އިންތިޚާބުގެ ދެވަނަ ބުރު ކާމިޔާބު ކުރެއްވި އިންތިޚާބީ ރައީސް މުޢިއްޒުގެ ސަރުކާރު ފެށުމަށް މަސައްކަތްތައް ފަށާފައިވާއިރު އެކަމަށް ޚާއްސަ ކޮމިޓީއެއްވެސް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުވަނީ އުފައްދަވާފައެވެ. އެ ކޮމިޓީގެ ރައީސަކަށް ހަމަޖައްސާފައިވަނީ ޕީއެންސީގެ ޗެއާޕާސަން އަބްދުއް ރަހީމް އަބްދުﷲ އެވެ.
އައު ސަރުކާރުގެ އިންތިގާލީ ތަރުޖަމާނުކަމަށް ކަނޑައެޅުއްވި ފިރުޒަލްއަކީ މިސްރުގެ އަޒްހަރު ޔުނިވާސިޓީން ޝަރީއާ އެންޑް ލޯ އިން މަތީ ތައުލީމް ހާސިލް ކުރައްވައިފައިވާ ބޭފުޅެކެވެ. އެބޭފުޅާއަކީ ދ. ކުޑަހުވަދޫއަށް ނިސްބަތްވެވަޑައިގަންނަވާ ބޭފުޅަކަށްވާއިރު މީގެ ކުރިން އެބޭފުޅާވަނީ ދަ އިލްމު އިންސްޓިޓިއުޓުގެ ޑެޕިއުޓީ ޑިރެކްޓަ ޖެނެރަލްގެ މަގާމު ފުރުއްވާފައެވެ.
