ކޯރަމް ހަމަނުވެގެން މަޖިލީހުގެ މިއަދުގެ ޖަލްސާ ނިންމާލައިފި
ޖަލްސާ ބޭއްވުމަށް ބޭނުންވާ ކޯރަމް ހަމަނުވެގެން ރައްޔިތުންގެ މަޖިލީހުގެ މިއަދުގެ ޖަލްސާވެސް ނިންމާލައިފިއެވެ.
މިއަދުގެ ޖަލްސާގައި ކޯރަމް ހަމަނުވާތީ ޖަލްސާ ނުފެށި ނިންމާލިކަން ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވަނީ ވިދާޅުވެފައެވެ.
"މިއަދުގެ ޖަލްސާ ފެށުމަށް ބޭނުންވާ ގާނޫނީ އަދަދު، ކޯރަމް ހަމަނުވާތީ އަޅުގަނޑު މިއަދު ރައްޔިތުންގެ މަޖިލީހުގެ ޖަލްސާ މި ހިސާބުން މި ނިންމާލީ. ވަރަށް ބޮޑަށް ޝުކުރިއްޔާ. ދެން ޖަލްސާއެއް އޮންނާނެ ވަގުތު އަންގާލާނަން،" އީވާ ވިދާޅުވި އެވެ.
ކޯރަމް ހަމަނުވެގެން މިއަދުގެ ޖަލްސާ ނިންމާލާފައިވާއިރު، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ މިހާރުވަނީ މަޖިލީހަށް ހުށަހަޅާފައެވެ. އަދި އެމްޑީޕީ ޕާލިމެންޓަރީ ގުރޫޕުން މިއަދު އެ މައްސަލައިގެ ކަރުދާސް ހުށަހަޅުއްވާނެކަމަށް ވިދާޅުވެފައިވެއެވެ.
48 މެމްބަރުންގެ ސޮޔާއެކު އިއްޔެ މަޖިލީހަށް އެ މައްސަލަ ހުށަހަޅާފައިވާއިރު، އެމްޑީޕީގެ ޕާލަމެންޓަރީ ގްރޫޕުން އެ މައްސަލަ ފާސްކުރީ އިއްޔެ ބޭއްވި އެމްޑީޕީގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.
މަޖިލީހަށް ހުށަހަޅާފައިވާ ރައީސް ނަޝީދުގެ އިތުބާރު ނެތްކަމުގެ މައްސަލައިގެ ގަރާރުގައި ބަޔާންކޮށްފައިވަނީ މަޖިލީހުގެ އެޖެންޑާ ކަނޑައެޅުމާއި މަޖިލީހުގެ ތަޅުމަށް ކަންކަން ގެނައުމުގައި އެމަނިކުފާނުގެ އަމިއްލަ މަސްލަހަތު އިސްކޮށް ވަކި ފަރާތަކަށް ބުރަވެ، މަޖިލީހުގެ ގަވާއިދާ ޚިލާފަށް ކަންކަން ނިންމަމުންދާ ކަމަށާއި، މުޅި މަޖިލީހުގެ ނިޒާމު ހިފެހެއްޓުމުގެ ބަދަލުގައި މަޖިލީހުގެ ނިޒާމު ގެއްލުވާލުމަށް މަސައްކަތް ކުރާ ފަރާތްތަކަށް ރައީސް ނަޝީދު ވާގިވެރިވަމުން ގެންދާ ކަމަށެވެ.
މީގެ އިތުރުން، މަޖިލިސް އެތައް ދުވަހެއް ވަންދެން ހުއްޓުވާފައި ބޭއްވުމަށް ފަހު، އެ މަނިކުފާނުގެ މަސްލަހަތު އޮތް އެހެން މައްސަލަތަކެއް މަޖިލީހަށް ތާވަލު ކުރުމަށް ފަހު އެ މައްސަލަ ކުރިއަށް ގެންދިއުމަށް ޖަލްސާތައް ބާއްވާފައިވާކަމަށްވެސް އެ ގަރާރުގައި ބަޔާންކޮށްފައިވެއެވެ.
