މުޢިއްޒުގެ ކެބިނެޓުގައި ތިއްބަވާނީ އެމަނިކުފާނު ބޭނުންފުޅުވާ މިންވަރަށް މަސައްކަތްވކުރެއްވޭނެ ބޭފުޅުން: ޢަބްދުއްރަޙީމް

އިންތިޚާބީ ރައީސް، ޑރ.މުޙައްމަދު މުޢިއްޒުގެ ކެބިނެޓްގައި ހިމެނިވަޑައިގަންނަވާނީ، އެމަނިކުފާނު ބޭނުންފުޅުވެލައްވާ މިންވަރަށް މަސައްކަތް ކުރެއްވޭނެ ހިތްވަރު ހުރި ބޭފުޅުން ކަމަށް ޕީއެންސީގެ ޗެއާޕާސަން ޢަބްދުއްރަޙީމް ވިދާޅުވެއްޖެއެވެ.
ޓްރާންސިޝަން ކޮމިޓީގެ ޗެއާ، ޢަބްދުއްރަޙީމް މިހެން ވިދާޅުވީ އިންތިޤާލީ މަރުޙަލާގެ ކަންކަމާއި ގުޅޭ އެންމެ ފަހުގެ މަޢުލޫމާތު ދިނުމަށް އިންތިޚާބީ ރައީސުލްޖުމްހޫރިއްޔާގެ އޮފީހުގެ ފަރާތުން މިއަދު ބޭއްވި ޕްރެސް ކޮންފަރެންސްގައެވެ.
އިދިކޮޅު ލީޑަރު، ރައީސް ޔާމީން ޢަބްދުލްޤައްޔޫމްގެ ވެރިކަމުގައި ކެބިނެޓުން ފެނުނު ބޭފުޅުން، މިފަހަރު ފެންނާނެތޯ ނޫސްވެރިޔަކު ސުވާލު ކުރުމުން ޢަބްދުއްރަޙީމް ވިދާޅުވީ، މުޢިއްޒުގެ ކެބިނެޓު އެކުލަވައިލަން އަދި މަހެއްހައި ދުވަސް އޮތްއިރު، ކެބިނެޓަށް ބޭފުޅުން އައްޔަނު ކުރެއްވުމަކީ މުޢިއްޒު ކުރައްވާނެ ކަމެއް ކަމަށާއި، އެކަމާއި ގުޅޭ މަޢުލޫމާތަކީ އޭނާއަށް ހާމަ ކުރެވޭނެ މަޢުލޫމާތެއް ނޫން ކަމަށެވެ. މުޢިއްޒުގެ ކެބިނެޓުގައި ތިއްބަވާނީ ވަރަށް ޤާބިލު، އަދި އެމަނިކުފާނު އެދިވަޑައިގަންނަވާ ގޮތަށް މަސައްކަތް ކުރައްވާނެ ބޭފުޅުން ކަމަށް ވެސް އޭނާ ވިދާޅުވިއެވެ.
"ކެމްޕެއިން ތެރޭގައި ވިދާޅުވި، އެމަނިކުފާނު ކެބިނެޓަށް ގެންނަވާނީ މެންދަމުން އަލިވެ ތިނެއް ޖަހާއިރު ގުޅުއްވާފަ، މިވެނި ކަމެއް ކިހިނެއްތޯ އެއްސެވީމަ ވެސް، އެއަށް އެ ވަގުތު ޖަވާބު ދެއްވޭ، ޤާބިލު، އަދި އެކަމަށް ކެރޭ ހީވާގި ބޭފުޅުންނޭ." އޭނާ ވިދާޅުވިއެވެ.ޑރ.މުޢިއްޒު ރިޔާސީ ކެމްޕެއިން ތެރޭގައި ތަކުރާރުކޮށް ވިދާޅުވަމުން ގެންދެވި އެއް ވާހަކަ އަކީ، އެމަނިކުފާނުގެ ވެރިކަމެއްގައި ނަތީޖާ ނެރުއްވާނެ ކަމަށާއި، މަސައްކަތް ކުރައްވާނީ އެވަރުގެ ޓީމަކާއި އެކުގައި ކަމަށެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.