ރޯވި ޔޮޓުގެ ބޮޑުބައެއް އަނދައި އަޅިއަށްވެއްޖެ

ރިޒްކާލްޓަން ރިސޯޓު ކައިރީގައި އޮތް ޔޮޓެއްގައި އަލިފާން ރޯވެ، ޔޮޓުގެ ބޮޑުބައެއް އަނދައި އަޅިއަށްވެއްޖެއެވެ.

Ads by STELCO

މެޖެސްޓީ 62 ނަމަކަށް ކިޔާ މި ޔޮޓުގައި އަލިފާން ރޯވިކަމުގެ މަޢުލޫމާތު ފަޔާ އެންޑް ރެސްކިއު ސާވިސަށް ލިބުނީ ހެނދުނު 7:30 ހާއިރުކަމަށެވެ. އަދި އަލިފާން ރޯވި ވަގުތު ޔޮޓުގައި ތިބި ފަތުރުވެރިންނާއި ޔޮޓުގެ ފަޅުވެރިން ސަލާމްތްކޮށްފައި ވަނީ ރިޒްކާލްޓަން ފަރި ރިސޯޓުގެ ލޯންޗަކުންކަމަށް އެމްއެންޑީއެފުން މަޢުލޫމާތުދީފައިވެއެވެ.

މެޖެސްޓީ 62 ނަމަކަށް ކިޔާ ޔޮޓުގައި އަލިފާން ރޯވެގެން އެމްއެންޑީއެފްގެ ފަޔާ އެންޑް ރެސްކިއު ޓީމުން ހަރަކާތްތެރިވަނީ، ފޮޓޯ: އެމްއެންޑީއެފް

މިއަދު ހެނދުނު ރޯވި އަލިފާންގަނޑު ކޮންޓްރޯލް ކުރެވިފައިވަނީ 9:48 ހާއިރުކަމަށާއި އަލިފާންގަނޑު އެއްކޮށް ނިއްވާލެވިފައިވަނީ 10:14 ހާއިރުކަމަށް އެމްއެންޑީއެފުން ވަނީ މަޢުލޫމާތުދީފައެވެ.

ފޮޓޯތަކުން ފެންނަ ގޮތުގައި ރޯވި ޔޮޓުގެ ބޮޑުބައެއް ވަނީ ވަރަށް ބޮޑަށް އަނގައިގެން ގޮސްފައެވެ. އަންދާޒާކުރެވޭގޮތުގައި މި ހާދިސާގައި ލިބުނު ގެއްލުން އެތައް މިލިއަނަކަށް އަރާނެއެވެ.