މަޖިލީހުގެ މިއަދުގެ ޖަލްސާ ފެށިޔަނުދީ މެންބަރުން އިހްތިޖާޖުކޮށްފި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އިތުބާރުނެތްކަމުގެ މައްސަލައިގެ ޤަރާރު އެޖެންޑާ ނުކުރާތީ، މިއަދުގެ ޖަލްސާ ކުރިއަށް ގެންދަން މަސައްކަތް ކުރުމުން އެމްޑީޕީގެ މެމްބަރުން ތަޅުމުގައި ހަޅުތާލުކޮށްފި އެވެ.
މީސްމީޑިޔާގައި ދައުރުވާ ވީޑިއޯތަކުން ފެންނަގޮތުގައި އެމްޑީޕީއަށް ނިޞްބަތްވާ މެންބަރުން ރިޔާސަތުގެ މޭޒުކޮޅު ކައިރިއަށް ވަޑައިގެން އަޑުގަދަކޮށް، ޖަލްސާ ފެށުމަށް ހުރަސް އަޅުއްވާފައިވާއިރު ބައެއް މެންބަރުން ވަނީ ދުންމާރި ހިފައިގެން މަޖިލީހުގެ ތަޅުމުގައި ކޮޅަށް ތެދުވެވަޑައިގެން އަޑުގަދަ ކުރައްވަމުންނެވެ.
މިއަދުގެ ޖަލްސާ ފައްޓަވަން، ވިލުފުށި ދާއިރާގެ މެމްބަރު ހަސަން އަފީފް ރިޔާސަތަށް ވަޑައިގެންނެވި އިރު ވެސް، ރިޔާސަތު ވަށާލައިގެން އެމްޑީޕީގެ ބައެއް މެމްބަރުން ތިއްބެވި އެވެ. އަދި އެބޭފުޅާ ގެންގުޅުއްވި ކަރުދާސްތަކެއްވެސް އަތުލައްވައި، ރިޔާސަތުގެ ގޮނޑީގައި އިށީނދެވަޑައިގެންނެވުމަށް ތަކުރާރުކޮށް ހުރަސްއަޅުއްވާ މަންޒަރު ފެނިގެންދިޔައެވެ.
އެމްޑީޕީން މިއަދު ހިތްހަމަނުޖެހިގެން ހަރުތާލުކުރަން ފަށާފައިވަނީ ރައީސް ނަޝީދުގެ އިތުބާރުނެތްކަމުގެ މައްސަލަ މިއަދުގެ އެޖެންޑާގައި ހިމަނާފައި ނުވާތީއެވެ. އެ މައްސަލަ މާދަމާ އަށް ފަސްކޮށް، މިއަދުގެ ޖަލްސާއަށް އެޖެންޑާކޮށްފައި އޮތީ އަންނަ އަހަރަށް ލަފާކުރާ ބަޖެޓާއި ސަޕްލިމެންޓަރީ ބަޖެޓު ހުށަހެޅުމަށްކަމަށް މަޖިލީހުން ވިދާޅުވެފައިވެއެވެ.
މަޢުލޫމާތުލިބިފައިވާގޮތުގައި ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ ހުށަހަޅާފައި އޮއްވާ، އިތުރު މަސައްކަތެއް ކުރުމަށް މަޖިލީހުން އެޖެންޑާ ނުކުރެވޭނެކަމަށް ބަންޑާރަނައިބުވެސް ވަނީ ލަފާދެއްވާފައެވެ. އެހެންކަމުން މިއަދުގެ ޖަލްސާގައި ބަޖެޓް ހުށަނޭޅުމަށް މިނިސްޓަރ އަމީރު ވަނީ ނިންމާފައެވެ.
ރައީސް ނަޝީދުގެ އިތުބާރު ނެތްކަމުގެ މައްސަލަ އެޖެންޑާކުރި ދެ ދުވަހުވެސް މަޖިލީހުގެ ނާއިބު ރައީސް އީވާ ޢަބްދުﷲ އާލާސްކަންފުޅާ އުޅުއްވާތީ، ދެ ދުވަހުގައިވެސް އެ މައްސަލަ ވަނީ ކުރިއަށް ގެންދެވޭގޮތް ނުވެފައެވެ. އަދި މިއަދުގެ ޖަލްސާއަށް ބަޖެޓުގެ ބަހުސްކުރުމަށް އެޖެންޑާކޮށްފައިވަނީ މިހެންވެކަމަށް މަޖިލީހުން ވަނީ ވިދާޅުވެފައެވެ.
އެހެން ނަމަވެސް، ރައީސް ނަޝީދުގެ މައްސަލައަށް ވަކި ގޮތެއް ނުނިންމައި ބަޖެޓުގެ މަސައްކަތައް އެއްބާރުލުން ނުދެއްވާނެކަމަށް އެމްޑީޕީގެ ޕީޖީ ލީޑަރު މުޙައްމަދު އަސްލަމް ވަނީ ވިދާޅުވެފައެވެ.
ސާޅީސްނުވަ މެންބަރުންގެ ސޮޔާއެކު ރައީސް ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅާފައިވާއިރު، އެމްޑީޕީން ވަނީ ރައީސް ނަޝީދު ރިޔާސަތުގައި އިންނަވައިގެން އިންތިޚާބީ ރައީސް ޑރ. މުޙައްމަދު މުއިއްޒު ހުވާކޮށްފިނަމަ، އެ މަނިކުފާނު ކުރައްވާ ހުވާ ސައްޙަ ނުވާނެކަމަށާއި އެމަނިކުފާނުގެ ކެބިނެޓަށް ރުހުން ނުދޭނެކަމަށް ބުނެފައެވެ.
