ފްލެޓް ދިނުމުގެ މަސައްކަތް މަޑުޖައްސައިލަން ދުންޔާ ވެސް ގޮވައިލައްވައިފި

މި ސަރުކާރުގެ "ގެދޮރުވެރިޔާ" ސްކީމްގެ ދަށުން 4،000 ފްލެޓް ލިބުނު މީހުންނަށް ފްލެޓް ދޫކުރުން މަޑުޖައްސައިލުމަށް ކުރީގެ ފޮރިން މިނިސްޓަރު ދުންޔާ މައުމޫން ގޮވައިލައްވައިފިއެވެ.

Ads by Sosun Fihaara

ދުންޔާ މިހެން ވިދާޅުވީ މިރޭ އެކްސްގައި ކުރައްވައިފައިވާ ޕޯސްޓެއްގައެވެ. އެކަމަނާ ވިދާޅުވީ، ރައްޔިތުންގެ ތާއީދު ނެތް ސަރުކާރެއް ނިމެން 10 ދުވަހަށް ވުމުން އަވަސްއަރުވާލާފައި ފްލެޓް ދިނުމަށް މަސައްކަތްކުރާތީ ކޮރަޕްޝަނަށް އިނގިލި ދިއްކުރަން ފުރުސަތު ލިބިގެންދާ ކަމަށެވެ.

"ފްލެޓްތައް އޭގެ އަސްލު ހައްގުވެރިންނަށް ދިނުމަށް މިމަސައްކަތް މަޑުޖައްސާލަން ޖެހޭ!" ދުންޔާ ވިދާޅުވިއެވެ.

އިންތިޚާބީ ރައީސް ޑރ.މުޙައްމަދު މުޢިއްޒު ވަނީ، ފްލެޓް ދޫކުރުމުގެ ކަންކަން މަޑުޖައްސައިލަން އެދިވަޑައިގެންފައެވެ.

ނަމަވެސް ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން، މިއަދު ނޫސްވެރިންނާއި ބައްދަލުކުރައްވައި ވިދާޅުވީ، ފްލެޓް ދޫކުރުމުގެ ކަންކަން ހުއްޓައިލުމުގެ ވިސްނުމެއް ނެތް ކަމަށާއި، އެކަމަށް އޮތް ޤާނޫނީ ހުރަހެއް ވެސް ނެތް ކަމަށެވެ.

މި ސަރުކާރުން 4000 ‏‏ފްލެޓް ދޫކުރި ގޮތާއިމެދު، އާއްމުން ހިތްހަމަނުޖެހުން ފާޅު ކުރަނީ ޕޮއިންޓު ދީފައި ހުރި ގޮތުން އެތައް ކަންބޮޑުވުމެއް ހުރި ކަމަށް ބުނެއެވެ.