އިސްރާއީލުން ޣައްޒާ ވަށާލިތާ މަހެއް: ހަނގުރާމަ ހުއްޓާލުމުގެ އެއްވެސް ވިސްނުމެއް ނެތް
ފަލަސްޠީނުގެ ޣައްޒާއަށް، ޔަހޫދީން ބޮން އަޅަމުން އަންނަތާ މަސް މަސްދުވަސް ވީއިރު، ހަނގުރާމަ ހުއްޓާލުމުގެ އެއްވެސް ވިސްނުމެއް ޔަހޫދީންގެ ނެތެވެ.
ފާއިތުވި މަހެއްހާ ދުވަހުގެ ތެރޭގައި ޣައްޒާގައި ފަލަސްތީނުގެ 10،000 އަށް ވުރެ ގިނަ މީހުން ޝަހީދުކޮށްލާފައިވާއިރު އޭގެ ތެރޭގައި 4،000 އަށް ވުރެ ގިނަ ކުޑަކުދިން ވެސް ހިމެނެއެވެ. އޮކްޓޯބަރު މަހުގެ 7 ވަނަ ދުވަހުން ފެށިގެން ޣައްޒާގައި ޝަހީދުވި ފަލަސްތީނުގެ ދެބައިކުޅަ އެއްބަޔަކީ ކުޑަކުދިންނާއި އަންހެނުންނާއި އުމުރުން ދުވަސްވީ މީހުންނެވެ.
ފަލަސްތީނުގެ ކުށެއް ނެތް ރައްޔިތުންނާމެދު ހިންގާ މި ލާއިންސާނީ ޢަމަލުތަކުގައި، ޝަހީދުވި ފަލަސްތީނުގެ ކުޑަކުދިންގެ އަދަދު 2019 ވަނަ އަހަރުން ފެށިގެން ދުނިޔޭގެ އެކި ކަންކޮޅުތަކުގައި ހިނގަމުންދާ ހަމަނުޖެހުންތަކުގައި، އަހަރަކު މަރުވާ ކުޑަކުދިންގެ އަދަދަށްވުރެ މާ ގިނައެވެ.
މިހެން މިކަން އޮތްއިރު، ފަލަސްޠީނުގެ އެތައްހާސް ބަޔަކު އިމާރާތްތަކުގެ ދަށުގައި ތާށިވެފައި ތިބިއިރު، އޭގެ ތެރޭގައި ގާތްގަނޑަކަށް 1400 އަށްވުރެ ގިނަ ކުޑަކުދިން ހިމެނޭކަމަށް ބެލެވެއެވެ. އޭގެ ތެރެއިން ގިނަ ކުދިންނަކީ މަރުވެފައިވާ ކުދިންކަމަށްވެސް ބެލެވެއެވެ.
މި މުއްދަތުގެ ތެރޭގައި ޣައްޒާގައި ތިބި ފަލަސްތީނުގެ 26،000 އަށްވުރެ ގިނަ މީހުން ޒަޚަމްވެފައިވާއިރު، އޭގެ ތެރެއިން ގިނަ ބައެއްގެ ހާލު ސީރިއަސްއެވެ.
މީގެ އިތުރުން، ޔަހޫދީންގެ އެންމެ ބޮޑު އަމާޒަކަށް މިހާރު ވެފައިވަނީ ޣައްޒާގައި ބަލިމީހުންނާއި، ގެދޮރު ގެއްލިފައިވާ މީހުން ހިމާޔަތް ހޯދަމުންއަންނަ އެންމެ ބޮޑު ހޮސްޕިޓަލް، އައްޝިފާ ހޮސްޕިޓަލެވެ. އެ ހޮސްޕިޓަލް ވަށައިގެން ބޮމުގެ ހަމަލާތައް ދޭތާވެސް އެތައް ދުވަހެއްވެފައިވާއިރު އަލްޝިފާ ހޮސްޕިޓަލަކީ ޣައްޒާގައި ހިނގަމުންދާ ހަމަނުޖެހުންތަކުގައި އެތައް ހާސް ބަޔަކު ދިރިއުޅެމުންދާ އެންމެ ބޮޑު މެޑިކަލް ފެސިލިޓީއެވެ.
ޔަހޫދީންގެ މި ލާއިންސާނީ ޢަމަލުތަކުގެ ސަބަބުން ފަލަސްތީނުގެ ދެ މިލިއަނަށްވުރެ ގިނަ މީހުން ބަނޑުހައިހޫނުކަމާއި ތިބިއިރު، އެތައް ހާސް ބަޔަކު ވަނީ އަސާސީ އެތައް ބޭނުންތަކަކުން މަޙްރޫމްވެފައެވެ. މީސްމީޑިއާގައި ދައުރުވަމުންދާ ވީޑިއޯތަކުން ފެންނަގޮތުގައި ޣައްޒާގެ ރައްޔިތުން ކާއެތިކޮޅެއް ހޯދަން 6 ގަޑިއިރަށްވުރެ ގިނަ އިރު ކިޔުތަކުގައި މަޑުކޮށްލައިގެން ތިބޭތަން ފެނެއެވެ.
މިގޮތަށް މީހުން މަޑުކޮށްލައިގެން ތިބޭ ކިޔޫތަކަށްވެސް އިސްރާއީލުގެ ހަމަލާތައް އަމާޒުވަމުންދާއިރު، މި ލާއިންސާނީ ޢަމަލުތައް ކުށްވެރިކުރުން ފިޔަވައި ދުނިޔޭގެ ބޮޑެތި ޤައުމުތަކުން އިތުރުކަމެއް ކުރާތަން ނުފެނެއެވެ. އިސްލާމީ ބޮޑެތި ޤައުމުތަކުންވެސް މި މަންޒަރުތައް ބަލަން ހިމޭނުން ތިބީއެވެ.
ޒަރޫރީ ބޭނުންތަކަށް ފަލަސްތީނުގެ އެތައް ހާސް ބަޔަކަށް ސާފު ފެން ލިބުމުގައިވެސް އެތައް ދަތިތަކެއް ކުރިމަތިކޮށްފައިވާއިރު، އެ ރައްޔިތުން މިއަދު ޖެހެނީ ތަޣައްޔަރުވެފައިވާ ފެން ބޭނުންކުރަން މަޖުބޫރުވެފައެވެ.
ޣައްޒާގެ އެތައް ބައެއްގެ ފުރާނަ ގެއްލުނު ނަމަވެސް، ހަނގުރާމަ ހުއްޓާލުމަށް ގޮވާލާ ގޮވާލުންތަކަށް މިހާތަނަށް ޔަހޫދީން އިޖާބަ ދީފައި ނުވެއެވެ.
ފަލަސްތީނާ ދެކޮޅަށް އިސްރާއީލުން ހިންގަމުންދާ ހުރިހާ ޖަރީމާތަކެއް ނިމުމަކަށް ގެނައުމަށް ބައިނަލްއަޤްވާމީ މުޖުތަމައުން އަވަސް ފިޔަވަޅުތަކެއް އެޅުމަކީ ކޮންމެހެން ކުރަން ޖެހިފައިވާ ކަމެކެވެ. ހަމައެކަނި ނެރެލާ ބަޔާނަކުން މި ޢަމަލުތައް ކުށްވެރިކުރުމަކުން އެކަމަށް އެކަށޭނަ ފިޔަވަޅު އެޅުނުކަމަކަށް ނުވާނެއެވެ.
