އެޗްޕީއޭގެ ގައިޑްލައިނާ ހިލާފުވި 11 ތަނެއް ބަންދުކޮށްފި
މާލެ ސަރަހައްދުގައި ހެލްތު ޕްރޮޓެކްޝަން އެޖެންސީ (އެޗްޕީއޭ) އާއި ފުލުހުން ގުޅިގެން ކުރިއަށްގެންދާ އިންސްޕެކްޝަނުގައި މިހާތަނަށް 11 ތަނެއް ބަންދުކޮށްފިއެވެ.
ފުލުހުން މިއަދު ބުނީ އެޗްޕީއޭގެ ގައިޑްލައިންތައް ތަންފީޒް ކުރުމަށް ފުލުހުން ކުރަމުންދާ މަސައްކަތުގެ ތެރެއިން ހިންގާ މާސް އިންސްޕެކްޝަންގައި މިހާތަނަށް 343 ތަނެއް އިންސްޕެކްޓް ކޮށްފައިވާ ކަމަށެވެ. އޭގެ ތެރޭގައި 236 ފިހާރައަކާއި ކެއުމުގެ ހިދުމަތްދޭ 90 ތަނަކާއި 15 ސެލޫން އަދި ޖިމަކާއި މާރުކޭޓެއް ހިމެނޭ ކަމަށް ފުލުހުން ބުނެއެވެ.
އޭގެތެރެއިން 11 ތަނެއް ގައިޑްލައިނާ ހިލާފުވެފައިވާތީ ބަންދު ކޮށްފައިވާ ކަމަށްވެސް ފުލުހުން ބުނެއެވެ.
އެޗްޕީއޭގެ ގައިޑްލައިނާ އެއްގޮތަށް އަމަލުކުރޭތޯ ބެލުމަށް ހިންގާ އޮޕަރޭޝަންގައި އުސޫލާއި ހިލާފަށް ހިދުމަތްދޭ ތަންތަން ފުރަތަމަ ފަހަރަށް 48 ގަޑިއިރަށް ބަންދުކުރާނެ ކަމަށާއި އެ ތަނެއް ދެން ހުޅުވޭނީ 48 ގަޑިއިރުފަހުން ކަމަށް އެޗްޕީއޭ އިން ބުނެއެވެ. އަދި ދެވަނަ ފަހަރަށް ތަކުރާރު ކޮށްފިނަމަ ތަން ބަންދުކުރުމަށް 1،000 ރުފިޔާ އިން ޖޫރިމަނާ ކުރާނެ ކަމަށާއި އެ ތަނެއް ދެން ހުޅުވޭނީ ތިން ދުވަސް ފަހުން ކަމަށް އެޗްޕީއޭ އިން ބުނެއެވެ.
މީގެއިތުރުން އެކަން ތިންވަނަ ފަހަރަށް ތަކުރާރު ކޮށްފިނަމަ އެތަނެއް ބަންދުކުރުމަށްފަހު 1000 ރުފިޔާ އިން ޖޫރިމަނާ ކުރާއިރު އެ ތަނެއް ދެން ހުޅުވޭނީ ފަސް ދުވަސް ފަހުން ކަމަށް އެޗްޕީއޭ އިން ހާމަކުރެއެވެ.
