ފުށިދިއްގަރު ހިއްކަނީ ދުނިޔޭގެ ދެވަނަ އަށް އެންމެ ބޮޑު ޑްރެޖަރުން: ސަރުކާރު

ފުށިދިއްގަރުފަޅު ހިއްކައިގެން "ރަސްމާލެ" ގެ ނަމުގައި މުޅިން އާ ސަހަރެއް ބިނާކުރަން ކުރިއަށް ގެންދާ މަޝްރޫއު ކުރިއަށް ދާނީ ''މުއިއްޒު ދުވެލީ" ގައި ކަމަށާއި، އެ ތަން ހިއްކަން ބޭނުންކުރަނީ ދުނިޔޭގެ ދެވަނަ އަށް އެންމެ ބޮޑު ޑްރެޖަރު ކަމަށް އެމްބެސެޑާ އެޓްލާޖް  މުހައްމަދު ޝަރީފް (މުންދު) ވިދާޅުވެއްޖެއެވެ.

Ads by STELCO

ރާއްޖޭގައި ހިންގާ ބިންހިއްކުމާއި ބޯހިޔާވަހިކަމުގެ އެންމެބޮޑު މަޝްރޫއު ކަމަށްވާ "ރަސްމާލެ" ބިން ހިއްކުމުގެ މަޝްރޫއު ރައީސް ޑރ. މުހައްމަދު މުއިއްޒު އިފްތިތާހު ކޮށްދެއްވީ މިދިޔަ ހޯމަ ދުވަހުއެވެ. އެ މަސައްކަތް ފަށާތާ އަށްމަސްދުވަހުގެ ތެރޭގައި ފުށިދިއްގަރު ފަޅުން 1153 ހެކްޓަރުގެ ބިން ހިއްކާނެ ކަމަށް ރައީސް ވިދާޅުވެފައިވެއެވެ.

ރޭ ޕީއެސްއެމްގެ ''ރާއްޖެ މިއަދު'' ޕްރޮގްރާމްގައި އެ މަޝްރޫއުއާ ގުޅޭ ގޮތުން ވާހަކަ ދައްކަވަމުން މުންދު ވިދާޅުވީ ރާއްޖޭގެ ސިޔާސީ ނިޒާމު އޮންނަ ގޮތުން ދެމެހެއްޓެނިވި ގޮތަށް ސަރުކާރުތަކުން މުސްތަގުބަލަށް ވިސްނައިގެން ހިންގޭ މަޝްރޫއުތައް މަދު ކަމަށެވެ. ނަމަވެސް ރަސްމާލެ މަޝްރޫއު އަކީ ކުރިއަށް އޮތް 20 އަހަރު ނުވަތަ އެއަށްވުރެ ދިގު މުއްދަތަކަށް ރާއްޖޭގައި ހުރި ގިނަ މައްސަލަތަކަށް ބޮޑު ހައްލެއް ގެނެވޭނެ އެންމެ މުހިއްމު މަސައްކަތް ކަމަށެވެ. މި ފަސް އަހަރު ތެރޭގައި ހިންގާނެ އެހެން މަޝްރޫއުތަކާއި ރަސްމާލޭގެ މަޝްރޫއއާ ނުބައްދަލު ކަމަށްވެސް ވިދާޅުވިއެވެ.

ހުރި މައްސަލަތަކަށް އަންނާނެ ހައްލު ކޮންމެ ކޮންމެ ބޭފުޅަކަށް ހަގީގަތުގައި ތަސައްވަރު ނުކުރެވުނަސް މީގެއިން ރާއްޖެ އެހެން އުސްމިނަކަށް އެހެން ހިސާބަކަށް އަޅުގަނޑުމެންގެ ކަންކަން މީގެ ކުރިން ނުލިބޭ ވަރުގެ ހައްލެއް ލިބުގެންދާނެ

އޭނާ ވިދާޅުވި ގޮތުގައި އެ މަޝްރޫއު ވެގެންދާނެ ކުރިއަށް އޮތް ޖީލުތަކުންވެސް އެ ވާހަކަ ދައްކާނެ ފަދަ މަޝްރޫއުއަކަށް ކަމަށާއި، މިއީ ރާއްޖެއަށް އިންގިލާބީ ބަދަލެއް ގެންނާނެ ފަދަ މަޝްރޫއުއެއް ކަމަށް ވިދާޅުވިއެވެ.

...މި ގައުމުގެ ކަންތައްތައް ވާސިލުވެފައި މިއޮތީ ވަރަށް ރަނގަޅަށޭ ބުނާ ވަރުގެ އިންގިލާބީ ބަދަލެއް މި ގައުމަށް އަންނާނެ

އެ ދެ ކުންފުންޏަކީވެސް ރާއްޖޭގައި މަޝްރޫއުތަކެއް ހިންގައި އަދި މިހާރުވެސް ހިންގަމުންދާ ދެ ކުންފުނިކަން ފާހަގަކުރައްވަމުން މުންދު ވިދާޅުވީ، އެ މަސައްކަތް ކުރިއަށް ދާނީ އަވަސް ސްޕީޑުގައި ނުވަތަ މުންދު ވިދާޅުވި ގޮތުންނަމަ ''މުއިއްޒު ސްޕީޑު''ގައެވެ.ެ

އެކަން ކުރަން ގެންނަނީ ދުނިޔޭގައި މިވަގުތު އޮތް ދެވަނަ އަށް އެންމެ ވަރުގަދަ ބޮޑު ޑްރެޖަރު. އެހެންވީމަ އެ މަސައްކަތް ވަރަށް އަވަސް ދުވެލީގައި ކުރިން ދެންނެވިހެން މުއިއްޒު ދުވެލީގައި ދާނީ

ރަސްމާލެ މަޝްރޫއާ އެކު މާލެ ސަރަހައްދުގެ ބޯހިޔާވަހިކަމުގެ މުޅި މައްސަލައަށް ޙައްލު ގެނެސްދެއްވާނެކަމުގައި ރައީސްވަނީ ވިދާޅުވެފައެވެ.

ޖުމްލަ 65،000 ގޯތި ނުވަތަ ފްލެޓް ތަރައްގީ ކުރާއިރު މިއީ ޒަމާނުއްސުރެ މާލެ ސަރަޙައްދުގައި ހައްލުނުވެ އޮތް ބޯހިޔާވަހިކަމުގެ މައްސަލައަށް ދާއިމީ ހައްލު ލިބޭނެކަމެެއް ކަމަށް އެމަނިކުފާނު ފާހަގަކުރައްވާފައިވެއެވެ. މީގެ އިތުރުން ޕްލޭންކޮށްފައި ވަނީ މާލެ ސަރަހައްދުން ގޯތިގެދޮރު ބޭނުންވާ ރާއްޖޭގެ އެހެން ރަށްރަށުގެ މީހުންނަށްވެސް އެފުރުސަތު ލިބޭނެގޮތަށް ކަމުގައި އެމަނިކުފާނު ވިދާޅުވެފައިވެއެވެ.