ހިޔާގައި އިތުރު ލިފްޓު ހަރުކުރަން އެެއްބަސްވުން ހަދަމުންދާ ކަމަށް ރައީސް ވިދާޅުވެއްޖެ
ހިޔާ ފްލެޓުގައި އިތުރު ލިފްޓުތައް ހަރުކުރުމުގެ މަސައްކަތް އެއްބަސްވުން ހަދަން ފަށައިފި ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އިއްޔެ ހުޅުމާލޭ ދެވަނަ ފިޔަވަހީގައި އަލަށް އިމާރަތްކުރާ ސްކޫލުގެ ބިންގާ އެޅުމުގެ ރަސްމިއްޔާތުގައި ވާހަކަފުޅުދައްކަަވަމުން ރައީސް ވިދާޅުވީ ހުޅުމާލޭގެ ދެވަނަ ފިޔަވައްސަކީ، މާ ބޮޑަށް އަޅައިނުލެވި އޮތް ހިސާބެއް ކަމަށަށެވެ.
ރައިސް ވިދާޅުވީ ކެމްޕެއިންގައި އެމަނިކުފާނު ވައުދުވި ގޮތަށް އިއްޔެ އެޅިގެން ދިޔަ ސްކޫލުގެ ބިންގަލަކީ، އޭގެ ހުރިހާ މާނައެއްގައިވެސް ދެވަނަ ފިޔަވަހީގެ ސަރަހައްދު ތަރައްގީ ކުރުމުގެ ބިންގާ ކަމަށެވެ. ޕާކުތަކާއި، މައިދާންތަކާއި، އިޖުތިމާޢީ އެކިއެކި ބޭނުންތަކަށް ބިނާކުރެވޭ އިމާރާތްތަކާއި، އަދި އިގްތިސާދީ އެކި އެކި ބޭނުންތަކަށް ތަރައްގީ ކުރެވޭ ތަންތަން ކަމަށް ވިދާޅުވިއެވެ.
ހުރިހާ ކަމެއް ހިމެނިގެންދާ ގޮތަށް، ދެވަނަ ފިޔަވަހީގައި ދިރިއުޅޭ ހުރިހާ ރައްޔިތުންނަށް ފުރިހަމަކަން ގެނެސްދިނުމަކީ ސަރުކާރުގެ މުހިންމު ސިޔާސަތެއް ކަމަށާއި އެޗްޑީސީގެ ފަރާތުން ކުރިއަށްގެންދާ މަސައްކަތްތަކުގައިވެސް ސިޔާސަތު އެޗްޑީސީ އިން އެގޮތުން ތަންފީޒު ކުރާނެ ކަމަށް ވިދާޅުވިއެވެ.
ދެވަނަ ފިޔަވަހީގައި މިހިރަ ޓަވަރުތަކުގައި އިތުރު ލިފްޓް ހަރުކުރުމަކީ، އަޅުގަނޑު ވީ ވަޢުދެކޭ. އަދި ވަޢުދުވީ ގޮތަށް އިރާދަކުރެއްވިއްޔާ، ކޮންމެ ޓަވަރެއްގައި ހަރުކުރަން ނިންމާފައިވާ ގޮތަށް، ދެ ލިފްޓް ހަރުކުރުމަށް ބޭނުންވާ ނިންމުންތައް ނިންމައި، އެގްރީމަންޓް ހެދުމުގެ މަސައްކަތް ކުރިއަށް އެދަނީ.
ހަފްތާ 14ގެ ތެރޭގައި އެ ތާވަލު ކުރެވުނު ގޮތަށް އެ މަސައްކަތް ފެށިގެންދާނެ ކަމަށް ވިދާޅުވިއެވެ. ތާވަލް ކުރެވިފައިވާ ގޮތަށް އެ ސަރަހައްދުގައި ކުރިއަށް ގެންދިޔުމަށް ރޭވިފައިވާ އެހެން މަސައްކަތްތައްވެސް ދާނީ ކުރިއަށް ކަމަށް ވިދާޅުވިއެވެ. ރައީސް ދެއްވި ޔަގީން ކަމަކީ ހައުސިން އަށް ގެންނަންޖެހޭ ހައްލުތައްވެސް ރައްޔިތުންނަށް ބޭނުންވެފައިވާ ގޮތަށް، އެކަންކަން ތާވަލް ކުރެވިގެން ކުރިއަށްދާނެ ކަމަށް ރައީސް ވިދާޅުވިއެވެ.
ތައުލީމީ ނިޒާމަށް އަލިއަޅުއްވާލަމުން ރައީސް ވިދާޅުވީ މުޅި ރާއްޖޭގައި އެއްކޮޅުން އަނެއްކޮޅަށް ބަލައިލިއިރުގައި، ފަށާފައި ނުނިމިފައި ހުރި ވަރަށް ގިނަ ސްކޫލް އިމާރާތްތައް އެބަހުރި ކަމަށާއި މަލްޓި ޕާޕަސް ހޯލްތަކާއި އެފަދަ ތަންތަން އެބަހުރި ކަމަށެވެ.
ބަޖެޓް މިހާރު ވަނީ ފާސްވެފައި. އަދި ތަންފީޒު ކުރުމުގެ މަރުޙަލާގެ ތެރެއަށް އަޅުގަނޑުމެންނަށް މި ދެވެނީ. މިގޮތަށް ހުއްޓިފައި ހުރި ގިނަ އިމާރާތްތަކެއްގެ މަސައްކަތް، މި އަންނަ އަހަރު ފެށިގެން ދާއިރުގައި، ބާރުމިނުގައި އިރާދަކުރެއްވިއްޔާ ކުރިއަށްދާނެ.
މެނިފެސްޓޯގައި ހިމަނާފައިވާ ކެމްޕެއިންގައި ވީ ވައުދުތަކާ އެއްގޮތަށް އަދި އޭގެ އިތުރަށްވެސް، ތައުލީމީ ނިޒާމު ހަރުދަނާ ކުރުމަށްޓަކައި އަޅަންޖެހޭ އެކި ކަހަލަ ސްކޫލް އިމާރާތްތަކާއި، އެކި ކަހަލަ މަލްޓި ޕާޕަސް ހޯލުތަކާއި، އެކިއެކި ފެސިލިޓީތައް ގާއިމުކުރުމުގެ މަސައްކަތް، ވަރަށް ބޮޑު އިސްކަމެއްދީގެން ކުރިއަށް ގެންދާނެ ކަމަށް ވިދާޅުވިއެވެ.
ފެސިލިޓީގެ ގޮތުން މިހާތަނަށް އަމަލީގޮތުން ގާއިމު ކުރެވިފައިވާ އެންމެ ރަނގަޅު ފެންވަރުގެ، ތައުލީމީ ނިޒާމަށް ބޭނުންވާ ފެންވަރުގެ ކަންކަން ކުރިއަށް ހުރި އަހަރުތަކުގެ ބަޖެޓުގެ ތެރެއިން ހަމަޖެހިގެންދާނެ ކަމަށް ވިދާޅުވިއެވެ.
