ރައީސްގެ ބަހުގެ ހަމަލާތައް އެމްޑީޕީއަށް؛ ދޮގު ހެދުން ނޫން ކަމެއް ނުކުރޭ

އިދިކޮޅު އެމްޑީޕީން ދޮގު ހެދުން ނޫން ކަމެއް ނުކުރާ ކަމަށް ވިދާޅުވެ ރައީސް ޑރ. މުހައްމަދު މުއިއްޒު އެ ޕާޓީއަށް ވަރަށް ބޮޑަށް ފާޑުވިދާޅުވެއްޖެއެވެ.

Ads by Sosun Fihaara

ރޭ އެމްޑީޕީގެ މެމްބަރުންތަކެއް ޕީއެންސިއާ ގުޅުމަށް ބޭއްވި ޖަލްސާގައި ރައީސް ވިދާޅުވީ ހުރިހާ އެންމެން މާލެއަށް ތޮއްޖައްސަން ސަރުކާރުން ނިންމާފައިވާ ކަމަށް ބުނެ އެމްޑީޕީން ''ދޮގު'' ވާހަކަތައް ފަތުރަމުންދާ ކަމަށެވެ.

''މިއީ އެއްވެސް ވަރެއްގެ ތެދެއް ނެތް ވާހަކައެއް'' ރައީސް ވިދާޅުވީ، ކެމްޕޭނު ތެރޭގައިވެސް އެމަނިކުފާނު ތަކުރާރު ކުރެއްވި އެއް ވާހަކަ އަކީ ކުދި އަދި ބޮޑު ރަށެއް ތަފާތުނުކޮށް ހުރިހާ ރަށެއް ތަރައްގީ ކުރައްވާނެ ވާހަކަ ކަމަށެވެ.

އެމަނިކުފާނު ވިދާޅުވީ، ސަރުކާރު ޕްލޭންގައި އޮތީ މުޅި ރާއްޖެ ތަރައްގީ ކުރުން ކަމަށެވެ. އެއީ އެންމެ އުތުރުގައި ނޮދަން ޑިވޮލޮޕްމެންޓް ޒޯންގެ ގޮތުގައި ސަރަހައްދެއް ކަނޑައަޅައި އެ ސަރަހައްދުގައި ތިބެގެން ގެދޮރުވެރިކަމާއި ހުރިހާކަމެއް ހަމަޖެހޭ ފެންވަރަކަށް ޒޯނެއް އުފެއްދުން ކަމަށެވެ. އެފަދަ ޒޯނެއް އެންމެ ދެކުނުގައި އުފެއްދުމާއި އަދި ކަނޑައެޅޭ ވަކި ހަތް ރަށެއްގައި ތަރައްގީކުރެވިފައިވާ މަތީ ފަންތީގެ އާބަސް ސެންޓަތަކަށް ހެދުމުގެ އިތުރަށް މާލެ ސަރަހައްދު ތަރައްގީކުރުން ހިމެނޭ ކަމަށެވެ.

ކެމްޕޭނު ލޯންޗިން ރޭވެސް ދެއްކި ވީޑީއޯގައިވެސް އަޅުގަނޑު ދެއްކި ވާހަކަގައި ވެސް ދެއްކި އެ ވާހަކަ. މިއަދާއި ހަމަޔަށް ދެއްްކި ވާހަކައެއްގައި ތަފާތެއް ނުހުންނާނެ.. އޮޅުވާލަން މިކިޔަނީ ރާއްޖޭގެ އެހެންތަނެއް ތަރައްގީނުކުރާނެ ގޮތަށް ނިންމައިފިއޭ. މާލެ ސަރަހައްދު އެކަންޏޭ. ހުރިހާ އެންމެން މާލެ ކައިރިއަށް ތޮއްޖަސަންށޭ އުޅޭނީ މިއީ އެއްވެސް ތެދެއް ނެތް ވާހަކައެއް.

ރައީސް ވިދާޅުވީ، މިދިޔަ ސަރުކާރުގައި ގިރާވަރު ފަޅާއި، ގުޅިފަޅުގެ އިތުރުން ހުޅުމާލެއިން ގޯތި ލިބުނު ފަރާތްތައް ރަސްމާލެއަށް ބަދަލުކުރަން ނިންމާފައިވާ ކަމަށް ބުނެވެސް އެމްޑީޕީން ދޮގު މައުލޫމާތުތަކެއް  ރައްޔިތުންނަށް ދެމުންދާ ކަމަށެވެ.

ނަމަވެސް ރައީސް ދެއްވި ޔަގީންކަމަކީ އެ ތަންތަނުން ގޯތި ލިބުނު މީހުންގެ ގޯތި ރަސްމާލެއަށް ބަދަލުނުކުރާނެ ކަމެވެ. އޭގެ ބަދަލުގައި މިދިޔަ ސަރުކާރުން ނިންމާފައިވާ ވަރަށްވުރެވެސް ބޮޑުކޮށް ގިރާވަރު ފަޅުން އިތުރުން 50 ހެކްޓަރު އަދި ގުޅިފަޅުންވެސް އިތުރު 80 ހެކްޓަރު ހިއްކާނެ ކަމަށް ވިދާޅުވިއެވެ. ހުޅުމާލެ ފަޅުންވެސް ހިއްކަން ފަށާފައިވާ ސަރަހައްދުވެސް ހިއްކާނެ ކަމަށް ވިދާޅުވިއެވެ.

ދޮގު ހެދުން ނޫން ކަމެއް، ޝޯޝަލް މީޑިއާގައިވެސް އަދި މެއިން ސްޓްރީމް މީޑިއާގައިވެސް އެއްވެސް ވަރަކަށް ދޮގު ނޫން ކަމެއް ނެތް ފެތުރުން. ތިމަންނަމެންނަށް ވިއްކާނެ އެއްޗެއް ނެތީމާ ވާގޮތެއް ކަމަށްވެދާނެ

އެމަނިކުފާނު ވިދާޅުވީ، ރާވާފައިވާ ޕްލޭނާއި އެއްގޮތަށް އެއްވެސް ރައްޔިތަކު ތަފާތުނުކޮށް އެއްވެސް ރަށެއް ތަފާތުނުކޮށް ތަރައްގީކުރާނެ ކަމަށް ވެ ވައުދުވެޑައިގެންނެވީ ގޮތަށް މަސައްކަތް ކުރިއަށްދާ ކަމަށެވެ.

ރައީސް ވިދާޅުވީ މި ފަސް އަހަރު ނިމޭއިރު ގެދޮރުގެ މައްސަލަ ހައްލުނުވާ ރައްޔިތަކުން ނުހުންނާނެ ކަމަށާއި، ފަސް ޕަސެންޓަށްވުރެ ދަށް އިންޓްރެސްޓު ރޭޓުގައި ލޯނު ދޫކުރުމަށް ކުރަން ޖެހޭ މަސައްކަތްތައް ވަރަށް ބާރު ސްޕީޑުގައި ކުރިއަށާ ކަމަށެވެ.

ރައީސް ވިދާޅުވީ ސަރުކާރަށް މިވީ 40 ދުވަހުގެ ތެރޭގައި ހަފްތާ14 ގައި ކަަނޑައަޅާފައިވާ ކަންތައްތައް ކުރެވެމުންދާ ކަމަށެވެ.