ރީއެކްސްޕޯޓާއި ޓްރާންސްޝިޕްމަންޓް ވިޔަފާރި އަށް ހާއްސަކޮށް ސަރުކާރުގެ ކުންފުންޏެއް
އިގުތިސޯދު ފުޅާކުރުމުގެ މަސައްކަތުގެ ދަށުން ރީއެކްސްޕޯޓާއި ޓްރާންސްޝިޕްމަންޓުގެ ވިޔަފާރި އަށް ހާއްސަކޮށްގެން 100 ޕަސަންޓު ދިވެހި ކުންފުންޏެއް އުފައްދަން ސަރުކާރުން ނިންމައިފިއެވެ.
އިކޮނޮމިކް މިނިސްޓަރު މުހައްމަދު ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ އިގުތިސޯދީ ރައްކާތެރިކަން ކަށަވަރުކުރުމާއި ވެލިއުއެޑް ކުރުމާއި ޓްރާންޝިޕްމަންޓް އަދި ރިއެކްސްޕޯޓް ވިޔަފާރި އަށް ހާއްސަކޮށް 100 ޕަސެންޓު ދިވެހި ކުންފުންޏެއް، މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯންގެ ނަމުގައި އުފެއްދެވުމަށް ރައީސް ޑރ. މުހައްމަދު މުއިއްޒު ނިންމަވާފައިވާ ކަމަށެވެ.
އެކަމާއި ގުޅޭ ގޮތުން ސައީދަށް ގުޅާލުމުން ފޯނަށް ޖަވާބު ދެއްވާފައިނުވާތީވެ އިތުރު މައުލޫމާތު ލިބޭގޮތް ވަނީ ނުވެފައެވެ.
ނަމަވެސް ބައެއް މީޑީއަތަކާއި ވާހަކަ ދައްކަވަމުން ސައީދު ވިދާޅުވީ، އެގޮތަށް ރައީސް ނިންމަވާފައިވަނީ ރާއްޖެ އޮތް ލޮކޭޝަންގެ ގޮތުން ރާއްޖެއަށް ޓްރާންސްޝިޕްމަންޓާއި، ރީއެކްސްޕޯޓުގެ ވިޔަފާރި ފުޅާކުރެވިދާނެ ކަމަށް ފެންނާތީ ކަމަށެވެ.
