މާލޭގައި ފެންހިންދާ ނިޒާމްގެ ކެޕޭސިޓީ 2 ގުނައަށް އިތުރުކުރަނީ
މާލޭގެ މަގުތަކުގައި ފެން ބޮޑުވާ މައްސަލަ ހައްލުކުރުމަށް މިހާރު އޮތް ސްޓޯރމް ވޯޓަރ މެނޭޖްމަންޓް ސިސްޓަމް 2 ގުނައަށް އިތުރުކުރުމުގެ މަސައްކަތް ފައްޓަވާފައިވާ ކަމަށް އެމްޑަބްލިއުއެސްސީގެ މެނޭޖިންގ ޑިރެކްޓަރ އަބްދުލް މަތީން މުޙައްމަދު ވިދާޅުވެއްޖެއެވެ.
މަތީން ވިދާޅުވީ ފެންބޮޑުވެ ރައްޔިތުންގެ ތަކެއްޗަށް ބޮޑެތި ގެއްލުންތަކެއްވާކަން ފާހަގަކުރެވޭތީ ޕަންޕް ސްޓޭޝަންގެ މިހާރު ހުރި ކެޕޭސިޓީ ގާތްގަނޑަކަށް 4 ގުނައަށް އިތުރުކުރަން ސަރުކާރުގެ އިދާރާތަކާއި ގުޅިގެން މަޝްވަރާކުރެވިފައިވާ ކަމަށެވެ.
“އޭގެ މާނައަކީ މިހާރު ޕަންޕް ސްޓޭޝަނެއްގައި ގާތްގަނޑަކަށް 400 ކިޔުބިކް މީޓަރުގެ ފެން ގަޑިއެއްގެ ތެރޭގައި އުކާލެވޭކަމަށްވަންޏާ ޕަންޕްތަކުގެ ކެޕޭސިޓީ 2 ގުނަ އެކުރެވެނީ” މަތީން ވިދާޅުވިއެވެ.
މަތީން ވިދާޅުވީ އެއިން ކޮންމެ ޕަންޕް ސްޓޭޝަނެއްގެ ކެޕޭސިޓީ 4 ގުނައަށް އިތުރުވެގެންދާނެ ކަމަށާއި އެގޮތަށް ކެޕޭސިޓީ އިތުރުކުރެވެނީ އަމީނީމަގުގެ 4 ސްޓޭޝަންގައި ކަމަށެވެ.
މިދިޔަ ހުކުރު ދުވަހު މާލެ އަށް ކުރި ވިއްސާރައިގައި ފެން ބޮޑުވެ، ގެތަކަށް ވަނީ ވަރަށް ބޮޑަށް ގެއްލުންވެފައެވެ. ނޭޝަނަލް ޑިޒާސްޓާ މެނޭޖްމަންޓު އޮތޯރިޓިން ބުނީ ލިބުނު ގެއްލުމުގެ އަގު މިލިއަނަކަށް ވުރެ ބޮޑު ކަމަށެވެ. އެހީގެ ގޮތުގައި އެ ގެތަކަށް 711،541ރ. ދޭން ނިންމާފައިވާ ކަމަށް ވެސް އެ އޮތޯރިޓީން ބުންޏެވެ.
