މިހާ އަވަހަށް މަގުބޫލުކަން ދަށްވި ސަރުކާރެއް އޭޝިއާ ސަރަހައްދަކު ނެތް: ރާއީ
މި ސަރުކާރާމެދު ރައްޔިތުން ފޫހިވެއްޖެ ކަމަށާއި, މިހާ އަވަހަށް ސަރުކާރެއްގެ މަޤްބޫލުކަން ދަށްވި ސަރުކާރެއް މި އޭޝިއާ ސަރަހައްދުގައި ވެސް ނެތް ކަމަށް މަކުނުދޫ ދާއިރާގެ އެމްޑީޕީ މެމްބަރު މުހައްމަދު ރާއީ ރޭ ވިދާޅުވެއްޖެއެވެ.
އެމްޑީޕީން ބޭއްވި ހަރުގެ ޖަލްސާގައި ވާހަކަ ދައްކަވަމުން ރާއީ ވަނީ މި ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. ވިދާޅުވީ އޭނާ އަކީ ވެސް ދުނިޔޭގެ މަޝްރަޙް ބައްލަވާ ބޭފުޅެއް ކަމަށާއި, އެހާ އަވަހަށް ސަރުކާރެއްގެ މަގުބޫލުކަން ވެއްޓުނު ސަރުކާރެއް މި ނޫނީ ނެތް ކަމަށެވެ. އަދި ރައްޔިތުން ތިބީ ރައީސް ޑރ. މުހައްމަދު މުއިއްޒުގެ ސަރުކާރާމެދު ފޫހިވެފައި ކަމަށެވެ. މި ސަރުކާރުގެ ވަޒީރުންގެ ގާބިލުކަން މި ފަހުން ހިނގައިދިޔަ ކަންކަން ވަރަށް ސާފުކޮށް އެނގިގެން ގޮސްފައިވާ ކަމަށެވެ. ވަޒީރުންނަށް ރުހުން ދިނުމާއި ނުދިނުން ކުރިއަށް ގެންދާނީ އެމްޑީޕީން ނިންމާ ގޮތެއްގެ މަތިން ކަމަށް ވިދާޅުވިއެވެ.
''އޭޝިއާ ސަރައްދުގައި މިހާ ބޮޑަށް ޕޮޕިއުލާރިޓީ ދަށްވި ސަރުކާރެއް. ވަރަށް އަވަހަށް ރައްޔިތުން ފޫހިވި ސަރުކާރެއް މިއީ'' ރާއީ ވިދާޅުވިއެވެ.
މަޖިލީހުގެ މެޖޯރިޓީ އޮތީ އެމްޑީޕީގައިކަން ފާހަގަކުރައްވާ ރާއީ ވިދާޅުވީ އެމްޑީޕީ ތެރެއިން ބަޔަކު އެހެން ޕާޓީތަކާއި ގުޅުނަސް ހިތްވަރަށް ބަދަލެއް ނައަންނަ ކަމަށެވެ. އޭނާ ވިދާޅުވީ ކުރިއަށް އޮތް މަޖިލީސް އިންތިހާބު ކާމިޔާބުކުރުމުގެ ފުރަތަމަ ބިންގަލަކީ މާލޭގެ މޭޔަރު އިންތިހާބު ކާމިޔާބު ކުރުން ކަމަށެވެ. މޭޔަރުގެ އިންތިހާބު ކާމިޔާބު ކުރެއްވީ އެމްޑީޕީގެ ކެންޑިޑޭޓް އަދި އެމްޓީސީސީގެ ކުރީގެ ސީއީއޯ އާދަމް އާޒިމެވެ.
ރާއީ ވިދާޅުވި މަޖިލީސް އިންތިހާބު ކާމިޔާބު ކުރުމަށް ފަހު ދެން އަމާޒު ހިފާފައިވަނީ އެމްޑީޕީގެ ވެރިކަން އަލުން އިޔާދަކުރުން ކަމަށެވެ. ސަޕޯޓަރުންނަށް ދެއްވި ޔަގީންކަމަކީ ފެށި ދަތުރު ނިންމާލާނީ އެމްޑީޕީ ވެރިކަމަށް ގެނައުމަށް ފަހު ކަމެވެ. ރާއީ ވިދާޅުވި ގޮތުގައި އެމްޑީޕީގެ ''ފުލް ސްޓްރެންތު'' ދާދި އަވަހަށް ފެނިގެންދާނެއެވެ.
Ads by STO
