ރައީސާއި ވަޒީރުން ރައްޔިތުންގެ ކުރިމައްޗަށް, ވިދާޅުވީ ޖަވާބު ނުދެވޭ ސުވާލެއް ނޯންނާނެ ކަމަށް
ރައީސް އާއި އެމަނިކުފާނުގެ ކެބިނެޓާއި، ރައްޔިތުން ބޭނުންވާ ސުވާލުތަކަށް ޖަވާބު ލިބޭ ފޯރަމްތަކެއް ބާއްވަން ހަމަޖެހިފައިވާ ކަމަށް ޑރ މުހައްމަދު މުއިއްޒު ވިދާޅުވެއްޖެއެވެ.
މާލޭގެ މޭޔަރާއި ކައުންސިލު މެމްބަރުން ހުވާކުރުމަށް ބޭއްވި ދަރުބާރުގައި ވާހަކަފުޅު ރައީސް މުއިއްޒު ވިދާޅުވީ ސަރުކާރުންކުރާ މަސައްކަތްތައް، ރައްޔިތުންނަށް ގާތުން އޮޅުންފިލުވައި ދިނުމަކީ ރާވަފައިވާ ކަމެއް ކަމަށެވެ.
އެހެންވެ، ދެ މަހުން އެއް މަހު ސަރުކާރުންކުރާ ކަންތައް ކިޔައި ދިނުމަށާއި ރައްޔިތުންގެ ސުވާލުތަކަށް ވަގުތުން ވަގުތައް ޖަވާބު ލިބޭ ގޮތް ގޮތަށް ހަމަޖެއްސުމަކީ އެމަނިކުފާނުގެ ވައުދެއް ކަމަށް ރައީސް ވިދާޅުވިއެވެ. އޭގެ ފުރަތަމަ ފޯރަމް އޮންނާނީ މި ހަފްތާ ތެރޭގައެވެ.
''އެ ފޯރަމްގައި ބޭނުން ސުވާލެއް އެވަގުތު ބައިވެރިވާ ވަޒީރުންގެ ދާއިރާތަކުން ކުރުމުގެ ފުރުސަތު ދޭނަން'' ރައީސް ވިދާޅުވީ ދެ މަހުން އެއް މަހު ބާއްވާ ކޮންމެ ފޯރަމްގައި ފަސް ވަޒީރަކު ބައިވެރިވެވަޑައިގަންނަވާނެ ކަމަށެވެ.
އަދި އެމަނިކުފާނާ، ސުވާލުކުރެވޭ ޕަބްލިކް ފޯރަމެއްވެސް ބާއްވައި ސުވާލުކުރުމުގެ ފުރުސަތު ރައްޔިތުންނަށް ދޭނެ ކަމަށް ވިދާޅުވިއެވެ. އެ ފޯރަމް އޮންނަނީ ކޮންމެ ތިން މަހުން އެއް މަހުއެވެ.
''އަޅުގަނޑުމެންނަށް ޖަވާބު ނުދެވޭ ސުވާލެއް ނުހުންނާނެ. އަޅުގަނޑުމެން ކުރަނީ ރައްޔިތުން ހަވާލުކުރި މަސައްކަތް'' އެމަނިކުފާނު ވިދާޅުވިއެވެ.
ސަރުކާރުން ރާވަފައިވާ ކަންތައްތަކާއި ގުޅޭ ގޮތުން ވާހަކަފުޅު ދައްކަވަމުން ރައީސް ވިދާޅުވީ، ސަރުކާރުގެ މެދު އަދި ދުރު ރާސްތާގެ މާސްޓަ ޕްލޭންގައި ހިމެނޭ ކަންތައްތަކުގެ ތެރޭގައި އާބާދީއާ ތަރައްގީ އެއްފަސް ކުރުމުގެ ސިޔާސަތައް މަގުފަހި ކުރުމަށްޓަކައި ރައްޔިތުންގެ ފުރިހަމަ މަޝްވަރާއާ އެކީގައި 20 އަހަރު ދުވަހަށް ޕްލޭން ކުރެވޭ މަސްޓަޕްލޭނެއް ފަށާނެ ކަމަށެވެ. އެއީ އިންތިހާބުގެ ކެމްޕޭނުގައި އެމަނިކުފާނު ވައުދުވެވަޑައިގެންފައިވާ ކަމަށް ވިދާޅުވިއެވެ. ރައީސް ވިދާޅުވީ އެ ޕްލޭން އެކުލަވާލާނީ ކައުންސިލްތަކާއި ރައްޔިތުންގެ މަޝްވަރާ ހޯދައިގެން ކަމަށެވެ. އުތުރާއި ދެކުނުގައި އާބަން ރީޖަންތަކެއް ގާއިމްކުރުންވެސް އޭގެ ތެރޭގައި ހިމެނޭ ކަމަށް ވިދާޅުވިއެވެ.
ރައީސް ވިދާޅުވީ ދެމެހެއްޓެނިވި ގޮތެއްގައި ތަރައްގީ ހާސިލުނުކުރެވޭނަމަ ރައްޔިތުންނަށް އެންމެ އެކަށީގެންވާ ގޮތަށް ހިދުމަތް ނުދެވޭނެ ކަމަށާއި، ތަރައްގީގެ މިސްރަބު ބަދަލުކުރުމަކީވެސް ރައްޔިތުންނަށް އެންމެ ރަނގަޅު ގޮތް ނޫން ކަމަށެވެ.
''ރައްޔިތުން އެންޑޯސްކުރާ ރައްޔިތުންގެ ތެރެއިން އުފެދިގެން އަންނަ މާސްޓަ ޕްލޭނެއް. އަދި އެ މާސްޓަ ޕްލޭނަށް ގާނޫނެއް ފަރުމާކޮށް ރައްޔިތުންގެ މަޖިލީހުން އެ މާސްޓަ ޕްލޭނާ ބެހޭ ގޮތުން ގާނޫނު ފާސްކޮށް އެ ގާނޫނުގައި އޮންނާނެ އެ މާސްޓަ ޕްލޭނަށް ބަދަލު ދެން ގެނެވޭނެގޮތާއި ކުރެވޭނެ ކަންކަންވެސް''
ރާއްޖޭގެ އެންމެ ބޮޑު މައްސަލައަކީ ބޯހިޔާވަހިކަމުގެ މައްސަލަކަން ފާހަގަކުރައްވާ އެމަނިކުފާނު ވިދާޅުވީ، އެކަން ހައްލުކުރުމަކީ އެމަނިކުފާނުގެ އެންމެ މުހިއްމު ވައުދެއް ކަމަށާއި ގައުމީ ބޮޑެތި ކަންކަން ފިޔަވައި އެންމެ މުހިއްމީ ގެދޮރު މައްސަލަ ހައްލުކުރުން ކަމަށް ވިދާޅުވިއެވެ. މި ފަސް އަހަރުގެ ތެރޭގައި ގެދޮރުގެދަތިކަން ދިމާވެފައިވާ އެއްވެސް ރައްޔިތަކު ނުހުންނާނެކަމުގެ ޔަގީންކަން ރައީސް މުއިއްޒު ދެއްވިއެވެ.
''މިއީ ސިޔާސީ ކަމެއް ނޫން. މިއީ ގައުމީ ކަމެއް'' ރައީސް ވިދާޅުވި ގޮތުގައި ކަނޑައަޅާ ސިޔާސަތުވެގެންދާނީ މާލޭގެ ރައްޔިތުންނަށް އެކަށީގެންވާ ހައްލެއް ގެނެސްދޭ ސިޔާސަތަކަށެވެ. އެމަނިކުފާނު ވިދާޅުވީ ގުޅިފަޅާއި، ގިރާވަރުފަޅުގެ ޕްލޭން ހެދުމުގެ މަސައްކަތް ކުރަމުންދާ ކަމަށެވެ.
އެ ދެ ސަރަހައްދުން ބިން އިތުރަށް ހިއްކާނެ ކަމަށާއި، އެތަނުގައި ޕޯޓް އެޅުމަކީ އެންމެ ރަނގަޅުކަމަކަށް ނުވާތީވެ ތިލަފުއްޓަށް ޕޯޓު ބަދަލުކޮށް ގިރާވަރުފަޅުން ލިބެން އޮތް އެންމެ ބޮޑު ޖާގައެއް ގެދޮރަށް ހާއްސަ ކުރެވިގެންދާނެ ކަމަށެވެ. ތިލަފުއްޓަކީ ބައިނަލްއަގްވާމީ ފެންވަރު ރަނގަޅު ބަނދަރަކަށް ހެދިގެންދާނެ ކަމަށް ވިދާޅުވިއެވެ. މިހާރު އަޅާ ބްރިޖު އަދި ގުޅުވާލަނީ ތިލަފުއްޓާއި ހަމަޔަށް ކަމަށާއި އޭގެ އިތުރަށް އިތުރުތިލަފަޅާއި ހަމަޔަށް ދެ ބްރިޖު އަޅަން ޖެހޭ ކަމަށާއި އެކަމުގެ މަސައްކަތް ކުރަމުންދާ ކަމަށް ވިދާޅުވިއެވެ.
ރައީސް ވިދާޅުވީ ގެދޮރުގެ މައްސަލަ ހައްލުކުރުމަށް އެކި ރަށްރަށުގައި ބިން ހިއްކުމުގެ މަޝްރޫއު ހިއްކާނެ ކަމަށާއި، އިތުރު ބިން ނުހިއްކާ މައްސަލަ ހައްލުނުވާނެތީވެ ރަސްމާލެ މަޝްރޫއު ފެށި ކަމަށް ވިދާޅުވިއެވެ. ވެ.
ފޭދޫ ފިނޮޅު އިރުން އޮތް ގަލު ފަޅު އަދި އާރަށް ހުޅަނގުން އޮތް ދިޔަނެރު ފަޅު ވެސް ހިއްކާލާ މާލޭގެ ކޮމާރޝަލް ޕޯރޓް އުތުރުން 5 ހެކްޓަރުގެ ބިން ހިއްކާލާ އަދި ގަލު ފަޅާއި ދިޔަނެރު ފަޅާއި މާލެ ގުޅުވާލާ އެތަންތަނަށް ރާއްޖޭގެ ރިސޯރޓް ތަކުގެ މާލެ އޮފީހާއި އަދި މާލޭގައި ހުރި އަމިއްލަ ކުންފުނި ތަކުގެ އޮފީސް ބަދަލު ކުރަންވީއޭ 100 ބުރިއަށް ކޮންކްރީޓް އިމާރާތް ތައް ކޮށްގެން އެއިރުން މާލެ އަށް ހައްލު ލިބިގެންދާނީ ވިޔާފާރިވެރިންނާއި މެދު ސަރުކާރުން ނުވިސްނައޭދޯ