ސުޕްރީމް ކޯޓުގެ އަމުރާ ހިލާފަށް, މެންބަރުންގެ ޖުމްލަ އަދަދަށް ހުސްގޮނޑި ނުގުނަން ފާސްކޮށްފި
މަޖިލީހުގެ މެންބަރުންގެ އަދަދަކީ 87 ކަމެއް ކަމުގައި ބެލުމަށް ސުޕްރީމް ކޯޓުން ނެރުނު ވަގުތީ އަމުރަށް އަމަލުނުކޮށް, މަޖިލީހުގެ މެންބަރުންގެ އަދަދު ގުނުމުގައި ހުސްގޮނޑި ނުގުނަން ރައްޔިތުން މަޖިލީހުގެ އަޣްލަބިއްޔަތުން މިއަދު ފާސްކޮށްފިއެވެ.
ރައްޔިތުންގެ މަޖިލީހުގެ ޖަލްސާތަކުގެ ކޯރަމް ކުރިން ވެސް ގުނަމުން އައި ގޮތަށް، މިހާރު ހުސްވެފައިވާ މަޖިލީހުގެ ދާއިރާތަކުގެ ގޮނޑިތައް ވެސް ހިމަނައިގެން ގުނަން ސުޕްރީމް ކޯޓުން ރައްޔިތުންގެ މަޖިލީހަށް އަންގައި، އަމުރެއް ވަނީ ނެރެފައެވެ.
އެ އަމުރު ނެރެފައިވަނީ ރައްޔިތުންގެ މަޖިލީހުގެ ޖުމުލަ މެންބަރުންގެ އަދަދު ގުނާ ގޮތަށް ގަވާއިދަށް ގެނައި އިސްލާހުތައް ބާތިލް ކުރުމަށް ބަންޑާރަ ނައިބުގެ އޮފީހުން ސުޕްރީމް ކޯޓަށް ހުށަހެޅި މައްސަލާގައި އެ ކޯޓުން ނެރުނު ވަގުތީ އަމުރުގަ އެވެ.
އެ މައްސަލައިގައި އަމަލުކުރާނެ ގޮތަކާމެދު މަޝްވަރާކުރުމަށް މަޖިލީހުގައި މިއަދު ބޭއްވި ޖަލްސާ ފައްޓަވަމުން އަސްލަމް ވަނީ ކޯޓުގެ ނިންމުމަށް އިހުތިރާމް ކުރުމުގެ ގޮތުން މިއަދުގެ ޖަލްސާގައި ހުސްގޮނޑި ގުނައިގެން, މެންބަރުންގެ ޖުމްލަ އަދަދަކީ 87 ކަމަށް ކުރިއަށް ގެންދިއުމަށް ނިންމައިފައެވެ. ނަމަވެސް, މި މައްސަލައިގައި އަމަލުކުރާނެ ގޮތެއް ނިންމާނީ މެންބަރުން ކަމަށް އޭނާ ވިދާޅުވިއެވެ.
ބަހުސަށްފަހު މި ކަމުގައި ގޮތެއް ނިންމަން އެހި ވޯޓުގައި 45 މެންބަރުން ވަނީ 80 މެންބަރުންނަކީ މަޖިލީހުގެ މެންބަރުންގެ އަދަދު ކަމަށް އަމަލު ކުރަން ވޯޓު ދެއްވައިފައެވެ. ހުސްގޮނޑި ގުނަން ޖެހޭނެ ކަމަށް އެއްވެސް މެންބަރަކު ވޯޓު ދެއްވާފައިނުވެ އެވެ.
ވޯޓަށް މިއަދު އަހާފައިވަނީ ޖުމްލަ އަދަދަކީ 87 މެންބަރުން ކަމަށް ބަލައިގެންނެވެ. ނަމަވެސް މި އިސްލާހު ފާސްވުމާއެކު އަސްލަމް ވަނީ މީގެ ފަހުން ޖުމްލަ އަދަދު ކަމަށް ބަލާނީ 80 ކަމަށެވެ.
Ads by STO
