ބ. ހިތާދޫގައި ޕޮލިސް ސްޓޭޝަނެއް ހުޅުވައިފި
ބ. ހިތާދޫގައި ފުލުހުންގެ ޚިދުމަތްދިނުމަށް އެ ރަށުގައި ޕޮލިސް ސްޓޭޝަނެއް ހުޅުވައިފިއެވެ.
މި ޕޯސްޓު ހުޅުވާފައި ވަނީ މިއަދު ހެނދުނެވެ. ޕޮލިސް ޕޯސްޓު ހުޅުވައިދެއްވީ ކޮމިޝަނަރ އޮފް ޕޮލިސް ޢަލީ ޝުޖާއު އާއި ހިތާދޫ ކައުންސިލު ރައީސް އަބްދުލްއަޒީޒް މުހައްމަދުއެވެ.
މި ރަސްމިއްޔާތުގައި، ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ، ނޯތު ޕޮލިސް ކޮމާންޑަރ އެސިސްޓެންޓް ކޮމިޝަނަރ އޮފް ޕޮލިސް މޫސާ ޢަލީ، ބ. އަތޮޅު ކޮމާންޑަރ ޗީފް އިންސްޕެކްޓަރ އޮފް ޕޮލިސް އަފްރާ އާދަމް އަދި ފުލުހުންގެ ކޮމިޝަންޑު އޮފިސަރުންނާއި އެހެނިހެން ފުލުހުންގެ އިތުރުން ހިތާދޫ ކައުންސިލަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންނާއި އެހެނިހެން އިދާރާތަކުގެ މުވައްޒަފުން ވަނީ ބައިވެރިވެވަޑައިގެންފައިއެވެ.
ޕޮލިސް ޕޯސްޓު ހުޅުވައިދެއްވައި ކޮމިޝަނަރ އޮފް ޕޮލިސް ޢަލީ ޝުޖާއު ދެއްކެވި ވާހަަކަ ފުޅުގައި، އެމަނިކުފާނު ވަނީ ދިވެހި ފުލުހުން ރެއާއި ދުވާލު އެއްވެސް ވަރުބަލި ކަމެއްނެތި ކުރަމުން އަންނަ މަސައްކަތުގެ ބޭނުމަކީ ދިވެހި ރާއްޖެ އަކީ ރައްޔިތުންނަށް އަމާން ރައްކާތެރި ތަނަށްކަށް ހެދުންކަމަށް ވިދާޅުވެފައިއެވެ.
އިތުރުން ރައްޔިތުންގެ މުދަލާއި ގެދޮރު ހިމާޔަތްކޮށް، ރައްޔިތުންގެ ފުރާނަ ސަލާމަތްކުރުމަށް ޖާނާއި މާލުން ފުލުހުން ގުރުބާންވަމުންދަނީ ކޮންމެ ރައްޔިތަކަށް ވެސް ހިތްހަމަ ޖެހިލައިގެން އުޅެވޭނެ ފަހި މާހައުލެއް ތަނަވަސްކޮށްދިނުމަށް ކަމަށްވެސް ސީޕީ ވިދާޅުވިއެވެ.
ފުލުހުންގެ ހިދުމަތް ރާއްޖޭގެ އކި ކަންކޮޅުތަކުގައި ފުޅާކުރުމުގެ މަސައްކަތް ކުރަމުން ދާއިރު މިއަދު ވަނީ ބ. ކުޑަރިކިލުގައިވެސް ފުލުހުންގެ ޕޯސްޓެއް ހުޅުވާލާފައިއެވެ.
