އަނބުރާ ފޮނުވާލި އިންތިހާބު ބިލް މާދަމާގެ އެޖެންޑާ އަށް
ކުރިއަށް އޮތް ރައްޔިތުންގެ މަޖިލީހުގެ އިންތިހާބު ރޯދަ މަހުގެ ފަހުން ބާއްވަން އިންތިހާބުތަކާ ބެހޭ އާންމު ގާނޫނަށް އިދިކޮޅު އެމްޑިޕީގެ މެޖޯރިޓީ އޮންނަ މަޖިލީހުން ފާސްކުރި ބިލު، ތަސްދީގު ނުކުރައްވައި ރައީސް ފޮނުއްވާލުމުން މާދަމާގެ އޮންނަ މަޖިލީހުގެ ޖަލްސާގައި އެޖެންޑާގައި ހިމަނައިފިއެވެ.
މާދަމާ އެކެއް ޖަހާއިރު ފަށާ ފުރަތަމަ ދައުރުގެ 11 ވަނަ ޖަލްސާގައި އެޖެންޑާގައި އިންތިހާބުތަކާއި ބެހޭ ގާނުނަށް ފަސް ވަނަ އިސްލާހު ގެނައުމުގެ ބިލާމެދު އަލުން ވިސްނުމަށް ރައީސް ފޮނުއްވާފައިވާ މައްސަލަ ހިމަނާފައިވެއެވެ.
ގާނޫނުއަސާސީގެ 91 ވަނަ މާއްދާގެ ށ. ގައި ބުނެފައިވާ ގޮތުންނަމަ ރައްޔިތުންގެ މަޖިލީހަށް ރައީސުލްޖުމްހޫރިއްޔާ އަނބުރާ ފޮނުވާ ބިލަކާމެދު އަލުން ވިސްނުމަށްފަހު، އެ ބިލަށް އެއްވެސް ބަދަލެއް ނުގެނެސް، އެ ބިލު ރައްޔިތުންގެ މަޖިލީހުގެ ޖުމްލަ މެންބަރުންގެ އަގުލަބިއްޔަތުން ފާސްވެއްޖެނަމަ، އެ ބިލެއް ރައީސުލްޖުމްހޫރިއްޔާ ތަސްދީގުކޮށް، ސަރުކާރުގެ ގެޒެޓްގައި ޝާއިުކުރާންވާނެއެވެ.
އެ މާއްދާގެ ނ. ގައިވާ ގޮތުންނަމަ ރައްޔިތުންގެ މަޖިލީހުން ފާސްވެގެން ރައީސުލްޖުމްހޫރިއްޔާ ތަސްދީގުކުރުމަށް ފޮނުވާ ބިލެއް ތަސްދީގުކުރާން އޮންނަ މުއްދަތުގެ ތެރޭގައި އެ ބިލަކާމެދު އަލުން ވިސްނުމަށް ނުވަތަ އިސްލާހެއް ގެނައުމަށް ރައްޔިތުންގެ މަޖިލީހަށް އަނބުރާ ނުފޮނުވައިފިނަމަ، ރައީސުލްޖުމްހޫރިއްޔާ އެ ބިލު ތަސްދީގުކުރީ ކަމަށް ބަލައި، ސަރުކާރުގެ ގެޒެޓްގައި ޝާއިއުކުރާންވާނެއެވެ.
މި ވަގުތު މަޖިލީހުގައި 87 މެމްބަރުން ތިއްބެވިއިރު ބިލު ފާސްކުރަން ބޭނުންވާނީ 44 މެެެމްބަރުންގެ ވޯޓެވެ.
