ގަވާއިދާ ހިލާފަށް ޕާކުކުރާ އުޅަނދުތަކާ މެދު ފިޔަވަޅު އަޅަނީ
ހުޅުމާލެ ފޭސް އެކެއް އަދި ދޭއްގައި ގަވާއިދާ ހިލާފަށް ޕާކުކުރާ އުޅަނދުތަކާ މެދު މިމަހުގެ ހަތްވަނަ ދުވަހުގެ ފަހުން ފިޔަވަޅު އަޅާނެ ކަމުގެ އިންޒާރު ފުލުހުން މިއަދު ދީފިއެވެ.
ފުލުހުންގެ އިދާރާއިން ނެރުނު ނެރުނު ނޫސްބަޔާނެއްގައި ބުނީ މަގުމަތީގައި ހިނގާ ބިނގާވެ އުޅޭ މީހުންނަށާއި މަގުމަތީގައި އުޅަނދު ދުއްވާ މީހުންގެ އިތުރުން ޕަބްލިކް ޓްރާސްޕޯޓަށް އަދި އެމެޖެންސީގައި ދުއްވާ އުޅަނދުތަކަށް ދަތިވާ ގޮތަށް ބައެއް ފަރާތްތަަކުން އުޅަނދުތައް ޕާކު ކުރަމުންދާ ކަމަށެވެ. އެހެންވެ އުޅަނދުތައް ޕާކިން ޒޯނެއް ކަމަށް ކަނޑައަޅާފައިވާ ތަނެއްގައި ޕާކު ކުރުމަށް ފުލުހުން ވަނީ އެދިފައެވެ.
"ހުޅުމާލެ ފޭސް އެކެއް އަދި ފޭސް ދޭއްގައި ގަވާއިދާ ހިލާފަށް ޕާކުކުރާ އުޅަނދުތަކާ މެދު 2024 މާޗު ހަތްވަނަ ދުވަހުގެ ފަހުން، އެއްގަމު ދަތުރުފަތުރުގެ ގާނޫނުގެ ހަތް ވަނަ މާއްދާގެ (ނ) އަދި އެއްގަމު އުޅަނދު ޕާކުކުރުމުގެ ގަވާއިދުގެ 14 ވަނަ މާއްދާގެ (ށ)ގެ ދަށުން ފިޔަވަޅު އަޅާނެ ވާހަކަ ދަންނަވަމެވެ" ފުލުހުންގެ ބަޔާނުގައި ބުންޏެވެ.
އަދި އެއްގަމު އުޅަނދު ޕާކުކުރުމުގެ ގަވާއިދުގެ 14 ވަނަ މާއްދާގެ (ށ) ބަޔާންކޮށްފައިވާ ގޮތަށް ގަވާއިދާ ހިލާފަށް ޕާކުކުރުމުގެ ސަބަބުން އުޅަނދެއްގައި ޕާކިން ވަޔަލޭޝަން ސްޓިކާ ޖަހާ ހާލަތްތައް ފިޔަވައި، މި ގަވާއިދާ ހިލާފުވާ ފަރާތްތައް 750 ރުފިޔާއިން ޖޫރިމަނާ ކުރެވޭނެ ކަމަށް ފުލުހުން ބުންޏެވެ.
